މިފްކޯގެ ޑިރެކްޓަރުންގެ ބޯޑުގެ ޗެއާޕާސަން އަހުމަދު ޝަރީފް، މޯލްޑިވްސް ފިޝަރީސް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ލިމިޓެޑް (އެމްފޯމްޕީސީ) ގެ ޑިރެކްޓަރުންގެ ބޯޑުގެ ޗެއާޕާސަންގެ މަގާމަށް މިއަދު ބަދަލުކޮށްފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ބުނީ މިފްކޯގެ ޗެއާޕާސަންގެ މަގާމުން ޝަރީފް މިއަދު ވަކިކޮށް، އެމްފޯމްޕީސީގެ ޗެއާޕާސަނަކަށް އައްޔަނު ކޮށްފައިވާ ކަމަށެވެ. މިފްކޯގެ ޗެއާޕާސަނަކަށް ޝަރީފް އައްޔަނު ކުރީ މިދިޔަ އަހަރުގެ ޑިސެމްބަރު 9، ގަ އެވެ.
ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަގުވާމީ ބާޒާރުގައި އިޝްތިހާރުކޮށް ޕްރޮމޯޓް ކުރުމަށް ސަރުކާރުގެ 100 ޕަސަންޓު ހިއްސާ އޮންނަ އެމްފޯމްޕީސީ ރައީސް ޑރ. މުހައްމަދު މުއިއްޒު އުފެއްދެވީ މިދިޔަ ފެބްރުއަރީ 4، ގަ އެވެ.
އެ ކުންފުނި އުފެއްދީ ރާއްޖޭގެ މަސްވެރިކަމުގެ ސިނާއަތް އިތުރަށް ފުޅާކޮށް މުޖުތަމައުއަށް އެ ސިނާއަތުން ލިބޭ މަންފާ އިތުރު ކުރަން އެކުއާކަލްޗާ އާއި މެރިން ކަލްޗާފަދަ ވަސީލަތްތަކުން އުފައްދާ އުފެއްދުންތައް ވެސް ބޭރު ދުނިޔޭގައި އިސްތިހާރު ކުރުމަށެވެ.
މީގެ އިތުރުން ރާއްޖޭގެ މަސްވެރިކަމަށް ހާއްސަ ބްރޭންޑެއް ތައާރަފުކޮށް، ގައުމީ ބާޒާރާއި ބައިނަލްއަގުވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުން ވެސް އެ ކުންފުނީގެ މަސްއޫލިއްޔަތުގެ ތެރޭގައި ހިމެނެ އެވެ.
