މެންޗެސްޓާ (ޑިސެމްބަރު 24) - އިނގިރޭސި ޕްރިމިއާ ލީގުގައި ބޯންމައުތު އަތުން މެންޗެސްޓާ ޔުނައިޓެޑް ބަލިވުމާ އެކު މިހާރު ހާލަތު އޮތް ގޮތުން ޔުނައިޓެޑްގެ ސަޕޯޓަރުން ތިބީ މާޔޫސްވެފައިކަން އެނގޭ ކަމަށް ޔުނައިޓެޑްގެ ކޯޗު ރުބެން އަމޮރިމް ބުނެފި އެވެ.
އަމިއްލަ ދަނޑުގައި ބޯންމައުތު އަތުން ޔުނައިޓެޑް ބަލިވީ 3-0 ގެ ނަތީޖާ އަކުންނެވެ. މިއީ، ޖެހިޖެހިގެން ދެ ވަނަ ސީޒަނުގައި ޔުނައިޓެޑުންް އަމިއްލަ ދަނޑުގައި ބޯންމައުތު އަތްދަށުވި ފަހަރެވެ.
އަމޮރިމް ބުނީ ކޯޗެއްގެ ހައިސިއްޔަތުން އޭނާގެ ޒިންމާތައް ބޮޑު ކަމަށާއި، ޔުނައިޓެޑް ކަހަލަ ޓީމަކަށް އަމިއްލަ ދަނޑުގައި އެ ފަދަ ނަތީޖާ އަކުން ބަލިވުން އެއީ ބޮޑު ކަމެއް ކަމަށެވެ. އެކަމަކު، މިހާރުގެ ހަގީގަތަކީ ޔުނައިޓެޑަށް މިއީ އުނދަގޫ ހާލަތެއްކަން އަމިއްލަ އަށް ވެސް ގަބޫލުކޮށް އެކުގައި މަސައްކަތް ކޮށްގެން ކަންކަން ރަނގަޅުކުރުން ކަމަށް އަމޮރިމް ވަނީ ބުނެފަ އެވެ.
"ޔުނައިޓެޑްގެ ސަޕޯޓަރުން ތިބީ ވަރުބަލިވެފައި. އެކަން ދަނޑުން ވަރަށް ރަނގަޅަށް އެނގޭ. އެކަމަކު، މި ހާލަތު ބަދަލުކުރެވޭނެ އެކަން ކުރުން އެއީ އަހަރެންގެ ޒިންމާ އެއް." އަމޮރިމް ބުންޏެވެ.
އަމޮރިމް ބުނީ, ޔުނައިޓެޑްގެ ކުޅުން ގޯސް ނޫން ކަމަށާއި, އެކަމަކު ރަނގަޅު ކުރަން ޖެހޭ ގިނަ ކަންކަން އަދިވެސް އެބަހުރި ކަމަށެވެ. އެކަންކަން ރަނގަޅުކޮށް ޔުނައިޓެޑްގެ އަސްލު ފެންވަރަށް ގެންދެވޭނެ ކަމަށް އަމޮރިމް ގަބޫލުކުރެ އެވެ.
އަމޮރިމް ބުނީ ޔުނައިޓެޑްގެ ހާލަތު ބަދަލުކުރަން ބަލާއިރު އެ ކްލަބްގެ ސަޕޯޓަރުންނާއި ކުޅުންތެރިންގެ އިތުރުން މެނޭޖުމަންޓް ވެސް ތިބީ ބައެއް ކަންކަމާ ހެދި "ވަރުބަލިވެފައި" ކަމަށެވެ.
ޔުނައިޓެޑުން އެންމެ ފަހުން ކުޅުނު ތިން މެޗުގައި ވެސް ސްކޮޑުގައި މާކަސް ރެޝްފޯޑް ނުހިމެނެ އެވެ. ރެޝްފޯޑް ދިން އިންޓަވިއުއެއްގައި ޔުނައިޓެޑް ދޫކޮށްލާ ވާހަކަ ދައްކާފައިވާއިރު، އެ އަށް އިޝާާރާތްކޮށް އަމޮރިމް ވަނީ ބައެއް ކުޅުންތެރިންނަކީ އަމިއްލަ އަށް ވިސްނައިނުލައި ކައިރީގައި ތިބޭ މީހުންގެ އިރުޝާދަށް ކުރަން ނުޖެހޭ ކަންކަން ވެސް ކުރެވޭ ބައެއް ކަމަށް ބުނެފަ އެވެ.
