މެންޗެސްޓާ (ޑިސެމްބަރު 14) - މެންޗެސްޓާ ޔުނައިޓެޑުން މި ވަގުތު ފޯކަސް ކުރަމުން އަންނަނީ އެ ކްލަބްގައި ހުރި "މައްސަލަތައް" ހައްލުކުރުމަށް ކަމަށާއި އެހެން ޓީމުތަކަށް ހުރި ކަންކަމާ ގުޅޭގޮތުން ވާހަކަ ދެއްކޭނީ ފަހުން ކަމަށް ޔުނައިޓެޑްގެ ކޯޗު ރުބެން އަމޮރިމް ބުނެފި އެވެ.
އިނގިރޭސި ޕްރިމިއާ ލީގުގައި ޔުނައިޓެޑުން މާދަމާ ރަށުންބޭރުގައި ވާދަވެރި މެންޗެސްޓާ ސިޓީއާ ކުޅޭއިރު، އެ ކްލަބްގެ ފޯމު އޮތީ ވަރަށް ބޮޑަށް ދަށްވެފަ އެވެ. ސިޓީން އެންމެ ފަހުން ކުޅުނު 10 މެޗުން މޮޅުވެފައިވަނީ އެއް މެޗުންނެވެ. ހަތް މެޗުން ބަލިވިއިރު، ދެ މެޗު ވަނީ އެއްވަރުވެފަ އެވެ.
"ތި ކަހަލަ ކަންކަމަށް (ސިޓީ މި ވަގުތު އޮތް ފޯމަށް) އަހަރެން ނުވިސްނަން. އަހަރެމެން ކުޅެން މި ޖެހެނީ ވަރަށް ރަނގަޅު ޓީމަކާ. އަހަރެމެން ވިސްނަންވީ އަމިއްލަ މައްސަލަތަކަށް، އަހަރެންގެ ފޯކަސް އަކީ އަހަރެމެން ރަނގަޅުކުރަން ހުރި ކަންތައްތައް،" އަމޮރިމް ބުންޏެވެ.
އަމޮރިމް، ޔުނައިޓެޑާ ހަވާލުވުމުގެ ކުރިން ސްޕޯޓިން ލިޒްބަންގެ ކޯޗަކަށް ހުރެ، މި ސީޒަނުގެ ޗެމްޕިއަންސް ލީގުގައި ސިޓީ އަތުން ވަނީ 4-1 އިން މޮޅުވެފަ އެވެ. އަމޮރިމް ވަނީ ސްޕޯޓިންގައި އޭނާ ހުރެ ކުރިމަތިލި މެޗާއި ކުރިއަށް އޮތް މެޗާ ހުރިހާ ގޮތަކުން ވެސް ތަފާތު ކަމަށެވެ.
"ސިޓީ އަކީ ވަރުގަދަ ޓީމެއް. އެ ޓީމަށް ކުރީގެ ފޯމުގައި ކުޅެލަން މާ އުނދަގުލެއް ނުވާނެ. ކުޅެން ޖެހޭ ވައްޓަފާޅި ނޫނީ ސިސްޓަމް ދެނެގަނެގެން ކުޅެލަން ބަލާއިރު، އަހަރެމެންނަށް ވުރެ އެ މީހުންގެ ގޭމް ވިސްނުން އަދި ރަނގަޅުވާނެ. އަހަރެމެން މި އަންނަނީ އެކަންކަން ދަސްކުރަމުން،" އަމޮރިމް ބުންޏެވެ.
ޔުނައިޓެޑާ ހަވާލުވުމުގެ ކުރިން، އަމޮރިމް ވަނީ ސިޓީއާ މަޝްވަރާކޮށްފައި ކަމަށް އިނގިރޭސި މީޑިއާތަކުން ކުރިން ރިޕޯޓްކޮށްފައިވެ އެވެ. އަމޮރިމް ބުނީ، ޔުނައިޓެޑަކީ އަބަދުވެސް އިންގްލެންޑްގައި އޭނާ ކޯޗުކޮށްދޭން ބޭނުންވި ޓީމު ކަމަށާއި އޮފާ ލިބުމާ އެކު އަވަހަށް ފުރުސަތުގެ ބޭނުންހިފީ އެހެންވެ ކަމަށް އަމޮރިމް ވަނީ ބުނެފަ އެެވެ.
