ދ. ބަނޑިދޫގެ ލޭންޑް ޔޫސް ޕްލޭނާ ހިލާފަށް އެ ރަށުގެ ޓޫރިޒަމް ބިންތައް ވަގުތީ ގޮތުން އިންޑަސްޓްރިއަލް މަސައްކަތްތަކެއް ކުރުމަށް ދޫކުރާތީ އެކަމާ ދެކޮޅަށް ޕެޓިޝަނެއް ކައުންސިލަށް ހުށަހަޅައިފި އެވެ.
ބަނޑިދޫގެ 102 މީހުން ސޮއިކޮށްފައިވާ އެ ޕެޓިޝަނުގައި ރަށުގެ ދިރާގު އެންޓަނާއިން ފެށިގެން މަސްޖިދުލް އީމާންއާ ހަމައަށް ގޮނޑުދޮށުން، ބަނޑިދޫ ލޭންޑް ޔޫސް ޕްލޭންގައި ފާހަގަކޮށް ޓޫރިޒަމް އެކިއެކި ބޭނުންތަކަށް ދޫ ކުރުމަށް ފާސް ކޮށްފައިވާ ބިންތައް ވަގުތީ ގޮތުން ނަމަވެސް އެހެން ބޭނުންތަކަށް ނުދޭން އެދިފައިވެ އެވެ.
"ޓޫރިޒަމްއަށް ހާއްސަ ކުރެވިފައިވާ މި ބިންތަކުގައި ޓޫރިޒަމް ނޫން އިންޑަސްޓްރިއަލް މަސައްކަތްތަކެއް ކުރުމަށް ވަގުތީ ގޮތުން ދޫ ކުރުމަށް ކައުންސިލަށް މިހާރު ހުށަހަޅާފައިވާ ޕްރޮޕޯސަލްއާ އެއްގޮތަށް ޓޫރިޒަމް ޒޯންއިން އެ ބިން ދޫނުކުރުމަށް އެދެން،" ޕެޓިޝަންގައި ބުންޏެވެ.
އޭގެއިތުރުން އެ ޕެޓިޝަނުގައި ރަށުގެ އަމިއްލަ ބައެއް ފަރުދުން މިހާރު ވެސް ބަނޑިދޫގައި ޓޫރިޒަމް ކުރި އެރުވުމަށް މަސައްކަތް ކުރަމުންދާތީ، ބަނޑިދޫ ލޭންޑް ޔޫޒް ޕްލޭންގައި ޓޫރިޒަމަށް ދޫ ކުރުމަށް ހާއްސަ ކޮށްފައިވާ ބިންތައް ޓުރިޒަމްގެ އެކި ބޭނުންތަކަށް ދޫ ކުރެވޭނެ އަވަސް އިންތިޒާމް ހަމަޖެއްސުމަށް ވެސް ގޮވާލާފައިވެ އެވެ.
ޓޫރިޒަމް ބިންތައް އެހެން ބޭނުންތަކަށް ދޫކުރާތީ ރަށުގެ ރައްޔިތުންގެ ކަންބޮޑުވުން ހައުސިން މިނިސްޓަރު ޑރ. އަލީ ހައިދަރުއާ ވެސް ވަނީ ހިއްސާކޮށްފަ އެވެ.
ހައިދަރުއަށް ފޮނުވި ސިޓީގައި ބުނީ ލޭންޑް ޔޫސް ޕްލޭނުގައި ވޯޓާ ސްޕޯޓްސް އަދި ބީޗް އެކްޓިވިޓީތަކަށް ހާއްސަ ކޮށްފައިވާ ސަރަހައްދުގައި ފައިބާ މަސައްކަތް ކުރުމަށް ވިޔަފާރި އުސޫލުން ދޫކޮށްފައިވާ ބިންތަކާއި ދ. މާދަލި ރިސޯޓަށް ކޮންސްޓްރަކްޝަން މެޓީރިއަލްސް ޑެލިވާ ކުރަން ހަމަޖެހިފައިވާ ބިލްޑިން ސިސްޓަމްސް އެންޑް ސާވިސްއަށް 50،000 އަކަ ފޫޓުގެ ބިމެއް އެ ސަރަހައްދުން ދޫކުރަން ކައުންސިލުން މަސައްކަތް ކުރަމުންދާ ކަމަށެވެ.
އެ ސިޓީގައި ތުހުމަތު ކޮށްފައިވާ ގޮތުގައި ގާނޫނާއި ހިލާފަށް ބަނޑިދޫއިން އެ ބިން ހޯދުމަށް މަސައްކަތް ކުރަމުންދަނީ އޭގައި ފޮރުވިފައި ހުރި ކަންތައްތަކެއް ހުރުމުންނެވެ. އެގޮތުން ރިސޯޓު ހެދުމަށް އެތެރެ ކުރާ މުދަލަށް އިމްޕޯޓް ޑިއުޓީ ދައްކަން ނުޖެހޭއިރު ސީދާ ދ. މާދަލިއަށް މުދާ ގެންދިއުމުގެ ބަދަލު އެ މުދާ ބަނޑިދޫއަށް ގެނެސް ދ. އަތޮޅާއި އަދި އަތޮޅުތަކަށް ވިއްކައި ލޯންޑާކޮށް ނާޖާއިޒް ފައިދާ ހޯދުން އެއީ އެއް މަގުސަދު ކަމަށް ބެލެވޭ ކަމަށެވެ.
"ހަމަ އެހެންމެ އެ ފަރާތުގެ ޕްރޮޕޯޒަލްގައި މުދާ އަރުވާ ބޭލުމަށް އެ ސަރަހައްދުން ކަނޑަށް ފާލަމެއް އަޅަން ހުށަހަޅާފައިވުމީ ބަނޑިދޫގެ ނާޒުކް ފަރު ހަލާކުވުން ފަދަ ރަށުގެ ތިމާވެއްޓަށް އެކަމުގެ ނޭދެވޭ އަސަރު ވަރަށް ބޮޑަށް ކުރާނެ ކަމުގައި ވެސް ދަންނަވަން،" ސިޓީގައި ބުންޏެވެ.
އެގޮތުން ބަނޑިދޫގެ ބިންތައް ލޭންޑް ޔޫޒް ޕްލޭނާ ހިލާފަށް ދޫކުރުން ހުއްޓުވައި ދިނުމަށް ސިޓީގައި ވަނީ އެދިފަ އެވެ.
ލޭންޑް ޔޫޒް ޕްލޭނާ ހިލާފަށް ބަނޑިދޫއިން ބިން ދޫ ނުކުރުމަށް އިލްތިމާސްކޮށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ބަނޑިދޫ ކައުންސިލަށް ފޮނުވި ސިޓީގައި ބުނީ ކައުންސިލަށް އެއްވެސް ބޭނުމެއްގައި ބިމެއް ދޫކުރެވޭނީ ފާސްކޮށްފައިވާ ލޭންޑް ޔޫޒް ޕްލޭންގައިވާ ބޭނުމަށް ކަމަށެވެ.
އެގޮތުން އެ ނޫން ބޭނުމެއްގައި ބިން ދޫކުރާނަމަ ކަމާއި ގުޅޭ އިދާރާއަކަށް ލިޔެ އެކަމުގެ ހުއްދަ ލިޔުމުން ހޯދަން ޖެހޭނެ ކަމަށް ވެސް އެލްޖީއޭއިން ވަނީ ފާހަގަކޮށްފަ އެވެ.
