މި އަހަރުގެ މަސްވެރިންގެ ދުވަސް ފާހަގަކުރުމުގެ މުނާސަބަތުގައި ފިޝަރީޒް މިނިސްޓްރީ އާއި ޝެފްސް ގިލްޑް އޮފް މޯލްޑިވްސް (ސީޖީއެމް) ގުޅިގެން އަންނަ ހޮނިހިރު ދުވަހު މާލޭގައި "ރަހަވަރު" ގެ ނަމުގައި ކެއްކުމުގެ މުބާރާތެއް ބޭއްވުމަށް ހަމަޖެހިއްޖެ އެވެ.
އެ މުބާރާތް ކުރިއަށް ގެންދިޔުމަށް ހަމަޖެހިފައި ވަނީ އެ ދުވަހު ހަވީރު 4:00 އިން ފެށިގެން އިރުއޮއްސި 06:00 ޖެހުމާ ހަމައަށް މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ހޮސްޕިޓާލިޓީ ފެކަލްޓީގަ އެވެ.
ފިޝަރީޒް މިނިސްޓްރީން ބުނީ މި މުބާރާތުގެ މަގުސަދަކީ ރާއްޖޭގައި ކާބޯތަކެތީގެ ރައްކާތެރިކަމަށް މަސްވެރިކަމުން ހިއްސާކުރާ މިންވަރު ފާހަގަކުރުމާއި ދިވެހިންގެ ކެއުން ބުއިމުގެ އާދަތަކަށް އަންނަމުންދާ ބަދަލުތަކުގެ ސަބަބުން، ތަފާތު އައު ބާވަތްތަކުގެ މަހުގެ އުފެއްދުންތައް އުފައްދާ ބޭނުން ކުރުމުގެ މިހިންމުކަން ދައްކުވައި ދިނުމަށް ކަމަށެވެ.
މިއީ މަސްވެރިންގެ ދުވަހާ ގުޅިގެން ބާއްވާ ހަރަކާތެއްގައި ކެއްކުމުގެ މުބާރާތެއް ބާއްވާ ފުރަތަމަ ފަހަރުކަން ވެސް ފިޝަރީޒް މިނިސްޓްރީން ވަނީ ފާހަގަކޮށްފަ އެވެ.
އެ މުބާރާތުގެ ތެރެއިން ދޮޅު ގަޑިއިރު ތެރޭގައި މުށިމަހާއި ފާނަ ހިމެނޭ ދެ ޑިޝް ތައްޔާރުކުރަން ޖެހޭއިރު، ޑިޝް ތައްޔާރު ކުރުމަށް ބޭނުންވާ މަސް މިނިސްޓްރީން ފޯރުކޮށްދެ އެވެ.
މުބާރާތައި ބައިވެރިވުމުގެ ސުންގަޑި ޑިސެމްބަރު 3، ވާ އަންގާރަ ދުވަހުގެ ނިޔަލަށް އޮތްއިރު، އިތުރު މައުލޫމާތު ލިންކެއް މެދުވެރިކޮށް ލިބޭނެ މަގު ވަނީ ތަނަވަސްކޮށްދީފަ އެވެ.
މުބާރާތުގެ އެއްވަނައަށް 10،000ރ. ލިބޭއިރު، ދެވަނައަށް 7،000ރ. ލިބެ އެވެ. އަދި ތިންވަނައަށް ދާ ފަރާތަކަށް 5،000ރ. ގެ ފައިސާގެ އިނާމު ލިބެ އެވެ.
މަސްވެރިންގެ ދުވަސް ފާހަގަ ކުރުމުގެ ގޮތުން ފިޝަރީޒް މިނިސްޓްރީން ގިނަ ހަރަކާތްތަކެއް އަންނަ ހަފްތާއިން ފެށިގެން ބޭއްވުމަށް ވަނީ ނިންމާފަ އެވެ. އެގޮތުން މަސް ރޭހަކާއި، މަސްވެރިންގެ ފޯރަމަކާއި، އާޓް އެގްޒިބިޝަނެއްގެ އިތުރުން ކުޑަ ކުދިންގެ ހަވީރަކާއި ރަސްމީ ޖަލްސާއެއް ބާއްވާނެ އެވެ.
މި އަހަރުގެ މަސްވެރިންގެ ދުވަހުގެ ހާއްސަ ޖަލްސާ ބޭއްވުމަށް ހަމަޖެހިފައި ވަނީ ޑިސެމްބަރު 13، ގައެވެ. އެ ޖަލްސާ ޝަރަފުވެރިކޮށްދެއްވާނީ ރައީސް ޑރ. މުހައްމަދު މުއިއްޒު އެވެ.
