ރައްޔިތުންގެ މަޖިލިސް މަސައްކަތް ކުރަނީ ސަރުކާރުން ބޭނުންވާހާ ގޮތަކަށް ކަމަށާއި ސަރުކާރުން ބޭނުންވާ ނަމަ ރަބަރު ސްޓޭމްޕު ޖަހަމުންދާ ގޮތަށް އިޒްރޭލުގެ ޕާސްޕޯޓު ނިކަން އަވަހަށް މަނާކޮށްލެވޭނެ ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
ޕީއެންއެފް އިން ބޭއްވި ޖަލްސާއެއްގައި ވާހަކަ ދައްކަވަމުން ޔާމީން ވިދާޅުވީ އިޒްރޭލު ޕާސްޕޯޓު މަނާ ކުރުން ލަސްކޮށް އެކަމަށް ވެރިކަން ހިންގާ ޕީއެންސީއިން ކޮންޓްރޯލް ކުރާ މަޖިލީހުން އުޒުރު ދައްކަނީ، ޕާސްޕޯޓު މަނާ ކުރަން ރައީސް ޑރ. މުހައްމަދު މުއިއްޒު ބޭނުންވެވަޑައިނުގަންނަވާތީ ކަމަށެވެ.
"ރައްޔިތުންގެ މަޖިލީހަކީ ސަރުކާރުގެ ރަބާ ސްޓޭމްޕް. ސަރުކާރުން ކުރަން ބޭނުންވީމަ ތިން ގަޑިއިރު، ހަތަރު ގަޑިއިރު ތެރޭ މުޅި ގާނޫނުއަސާސީ އިސްލާހުކޮށްލެވޭ. އެހެންވީމާ އެއްގޮތަކަށް ވެސް އަޅުގަނޑުމެންނަށް ވިސްނައިދެއްވަން ނުއުޅުއްވާ ރައްޔިތުންގެ މަޖިލީހަކީ މާ ވަރުގަދަ މަސައްކަތް ކުރާ ބަޔެކޭ. މިއީ ރަބާ ސްޓޭމްޕް ކުރާ ބައެއް. މިތާ ނެތޭ ރައްޔިތުންގެ ހައްގުގައި ބަޓަނަކަށް ފިތާލަން ކެރޭ މީހަކު ވެސް،" ޔާމީން ވިދާޅުވި އެވެ.
ޔާމީން ވިދާޅުވީ އިޒްރޭލު ޕާސްޕޯޓުގައި ދިވެހިރާއްޖެއަށް އެތެރެވުން މަނާ ނުކުރަނީ ރައީސް މުއިއްޒު އެކަން ކުރަން ބޭނުންވެވަޑައިނުގަންނަވާތީ ކަމަށެވެ.
"މުއިއްޒުގެ ވިލިންގްނެސް ނެތީ. މުއިއްޒުގެ ވިލިންގްނެސް ނެތީ އިޒްރޭލުގެ ޕާސްޕޯޓު މަނާ ކުރުމުގެ ހަމަ ވިލިންގްނެސް އިނގެތޯ. ނަތަންޔާހޫ ދިވެހިރާއްޖެއަށް އަރައިފިއްޔާ ހައްޔަރު ކުރާނެ ކަމަށް އެބަ ބުނޭ. އެއީ އެބަ އިނގޭ ނަތަންޔާހޫ ދިވެހިރާއްޖެއަކަށް ނާންނާނެކަން،" އެމަނިކުފާނު ވިދާޅުވި އެވެ.
އިޒްރޭލު ޕާސްޕޯޓު މަނާ ކުރަން އިދިކޮޅު އެމްޑީޕީން ބިލެއް ހުށަހެޅީ މެއި، 2024، ގަ އެވެ. އޭގެ ފަހުން ޖޫން 2، 2024، ގައި ވަޒީރުންގެ މަޖިލީހުން ވެސް ވަނީ ޕާސްޕޯޓު މަނާ ކުރަން ނިންމައިފަ އެވެ. ނަމަވެސް މިހާތަނަށް ވެސް ޕާސްޕޯޓު މަނާކޮށްފައެއް ނުވެ އެވެ.
މީކާއީލް ހުށަހެޅުއްވި ބިލުގެ މަސައްކަތް މިއަދު ކޮމިޓީގައި ކުރިއަށްގެންދިޔައިރު ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވީ، އިޒްރޭލު ޕާސްޕޯޓު މަނާ ކުރުމުގެ ކުރިން ދުނިޔޭގެ ބޮޑެތި ގައުމުތަކުގެ ބަހެއް ވެސް ހޯދަންޖެހޭ ކަމަށެވެ.
"... އަދި، އަރަބި އެހެން ގައުމުތަކާ ދުނިޔޭގެ އެހެން ބޮޑެތި ގައުމުތަކުގެވެސް ކަމާ ގުޅުންހުރި އިދާރާތަކުގެ ލަފަޔާ މަޝްވަރާ މިކަމުގެ ހޯދަން ޖެހޭނެ ކަމަށް އަޅުގަނޑު ގަބޫލުކުރަނީ،" ފަލާހު ވިދާޅުވި އެވެ.
އިޒްރޭލުގެ ޕާސްޕޯޓު މަނާ ކުރުމުގެ ބިލު އެމްޑީޕީން ހުށަހެޅީ ސަރުކާރަށް އުނދަގޫ ކުރަން ކަމަށް ވެސް މީގެ ކުރިން ޕީއެންސީގެ ބައެއް މެންބަރުން ވިދާޅުވި އެވެ. އަދި އެ ބިލުގެ މަސައްކަތް ކުރިއަށްގެންދިޔުމާމެދު ވިސްނަންޖެހޭ ކަމަށް ތިނަދޫ އުތުރު ދާއިރާގެ މެންބަރު ސަައުދުﷲ ހިލްމީ ވަނީ ވިދާޅުވެފަ އެވެ.
"އަޅުގަނޑު ހަމަ ދަންނަވަން ބޭނުންވަނީ މި ބިލު އަޅުގަނޑުމެން ކުރިއަށްގެންދިޔުމާ ދޭތެރޭގައި އިތުރަށް ވިސްނައިލަން އެބަޖެހޭ ނޫނިއްޔާމު އަޅުގަނޑުމެންގެ ދާއިރާގެ ރައްޔިތުންގެ ހިޔާލު ހޯދާލަންޖެހޭ،" ސައުދުﷲ ވިދާޅުވި އެވެ.
