މެންޗެސްޓާ (ނޮވެމްބަރު 16) - މެންޗެސްޓާ ޔުނައިޓެޑާ ހަވާލުވި ޕޯޗުގީސް ޒުވާން ކޯޗު، ރުބެން އަމޮރިމްގެ މައިގަނޑު ވިސްނުމަކީ، ޒަމާނުއްސުރެ މެންޗެސްޓާ ޔުނައިޓެޑް އޮތް ކާމިޔާބު ލެވަލް އަދި އެ ޓީމަށް އެންމެ ހައްގުވާ މަގާމަށް އެ ކްލަބް ގެންގޮސްދިނުމަށް ކަމަށް ބުނެފި އެވެ.
އެރިކް ޓެން ހާގް، ދެ އަހަރާއި ބައިގެ މުއްދަތަކަށް ފަހު، ޔުނައިޓެޑްގެ ކޯޗުކަމުން ވަކިކުރިއިރު، ޔުނައިޓެޑުން ވަނީ ބަދަލެއްގެ ގޮތުގައި ބަހާލައިގެން ޓެން ހާގަށް 20 މިލިއަން ޑޮލަރު ދައްކަން ނިންމައިފަ އެވެ. އަދި ޔުނައިޓެޑުން އާ ކޯޗަކަށް ގެނައި އަމޮރިމް، އެ ޓީމަށް ގެންނަަން ސްޕޯޓިން އަށް ދެއްކި ފީ 10 މިލިއަން ޑޮލަރަށް ވުރެ އިތުރެވެ.
ޔުނައިޓެޑާ ރަސްމީކޮށް ހަވާލުވުމުގެ ކުރިން، ވިސާ ކަންކަން ފުރިހަަމަ ކުރަމުން އަންނަ އަމޮރިމް އަކީ 2013 ވަނަ އަަހަރު އަލެކްސް ފާގަސަން ރިޓަޔާކުރި ފަހުން، ޔުނައިޓެޑާ ހަވާލުވާނެ 10 ވަނަ ކޯޗެވެ. އޭގެ ތެރޭގައި ހިމެނެނީ، ފަސް ފުލް ޓައިމް ކޯޗުންނާއި ހަތަރު ކެއާޓޭކާ/އިންޓަރިމް ކޯޗުންނެވެ.
ޔުނައިޓެޑްގެ މީޑިއާ ޓީމަށް ދިން އިންޓަވިއުއެއްގައި އަމޮރިމް ބުނީ، ޔުނައިޓެޑަކީ އަބަދުވެސް ކާމިޔާބު ޓީމެއްގެ ގޮތުގައި އޮންނަން ޖެހޭ ލެވަލްގެ ކްލަބެއް ކަމަށެވެ. އަދި އަހަރުތަކެއް ވަންދެން، ޔުނައިޓެޑަށް އެ މަގާމަށް ނުދެވި އޮތް އޮތުން ބަދަލުކުރަން އޭނާ މަސައްކަތްކުރާނެ ކަމަށް އަމޮރިމް ވަނީ ބުނެފަ އެވެ.
"އަހަރެން ގަބޫލުކުރަން، މި ކްލަބަށް ހައްގުވާ މަގާމަށް މި ޓީމު ގެންދަން އަހަންނަށް ކާމިޔާބު މަސައްކަތެއް ކުރެވޭނެ ކަމަށް،" އަމޮރިމް ބުންޏެވެ.
ކުރިން ޕޯޗުގަލް ގައުމީ ޓީމަށް ކުޅުނު އަމޮރިމް، ވަނީ ސްޕޯޓިން އަށް ދެ ފަހަރު ޕޯޗުގީސް ލީގު ކާމިޔާބުކޮށްދީފަ އެވެ. އޭގެ ތެރެއިން ފުރަތަމަ ފަަހަރަކީ، 19 އަހަރު ތެރޭ ސްޕޯޓިން އަށް ލީގު ލިބުނު ފުރަތަަމަ ފަހަރެވެ.
އަމޮރިމް ބުނީ ޔުނައިޓެޑްގެ ކާމިޔާބު ތާރީހުން އިބުރަތް ހޯދައި، އުނދަގޫ ވަގުތުތަކުގައި ވެސް ކްލަބްގެ އެންމެން އެއް ވިސްނުމެއްގައި ހުރެގެން ހާސިލްކުރި ކަންކަން ޓީމުގެ ކުޅުންތެރިންނާއި އެންމެން ދަސްކޮށް އެ ކަންކަމާ ވިސްނަން ޖެހޭ ކަމަށެވެ.
"އެބަ ހުރި ފެންނަން މި ޓީމު ހޯދި ތަށިތަށް. ދެން މި ކްލަބުން ތަހައްމަލުކުރި ހިތްދަތި، އުނދަގޫ ކަނކްަން ވެސް އެ ހުރީ ފެންނަން، އެހެންވީމަ، އެ ހުރިހާ ކަމަކުން ވެސް ހިތްވަރު ހޯދައި އަހަރެމެން އެބަޖެހޭ މި ކަންކަން ރަނގަޅުކުރަން،" އަމޮރިމް ބުންޏެވެ.
އިނގިރޭސި ޕްރިމިއާ ލީގުގައި ޔުނައިޓެޑް އޮތީ 11 މެޗުން 15 ޕޮއިންޓާ އެކު، 13 ވަނައިގަ އެެވެ. އަދި ޔޫރޮޕާ ލީގުގައި ޔުނައިޓެޑް އޮތީ، ހަތަރު މެޗުން ހަ ޕޮއިންޓާ އެކު, 15 ވަަނައިގަ އެެވެ.
އަމޮރިމް ބުނީ, މި ސީޒަނުގައި ޔުނައިޓެޑަށް ދިމާވެފައި ހުރި މައްސަލަތަކަށް ހައްލެއް ލިބޭނެ ގޮތަށް ނަތީޖާ ނެރެ ޓީމު މުބާރާތްތަކުގެ ތާވަލުތަކުގައި އޮތް ހިސާބު ބަދަލުުކުރަން ޕްލޭނެއް އެބައޮތް ކަމަށެވެ.
ޔުނައިޓެޑުން ދެން އެންމެ އަވަހަށް ކުޅޭ މެޗުގައި ބައްދަލުކުރާނީ ލީގުގައި އިޕްސްވިޗު ޓައުންއާ ދެކޮޅަށެވެ.
