ދަރަނި ދެއްކޭނެ ކަމުގެ އިތުބާރު ދަމަހައްޓަން އުފައްދާފައިވާ ސޮވެރިން ޑިވެލޮޕްމަންޓު ފަންޑު (އެސްޑީއެފް) އަށް ޖަމާކުރި ޑޮލަރުގެ ތެރެއިން ބައެއް ބޭނުންކުރީ ގައުމު ބަނގުރޫޓުވާ ހާލަތައް ދިޔައިމަ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މަޝްރޫއުތަކެއް އިފުތިތާހު ކުރުމަށް މިރޭ ބޭއްވި ރަސްމިއްޔާތެއްގައި ވާހަކަ ދައްކަވަމުން ސައީދު ވިދާޅުވީ، މި ސަރުކާރުން ވެރިކަމާ ހަވާލުވިއުރު އެސްޑީއެފްގައި ހުރީ އެންމެ ތިން މިލިއަން ޑޮލަރު ކަމަށެވެ. ނަމަވެސް މި ސަރުކާރުން 70 އެތައް މިލިއަން ޑޮލަރު ޖަމާކުރި ކަމަށެވެ.
"އާދެ، ރާއްޖެ ބަނގުރޫޓުވެގެންދާނެހެން ހީވި ހާލަތްތަކުގަ އެ ފަންޑު ބޭނުންކޮށްފަ ހުންނާނެ. އެ ވާހަކަ ރައީސުލްޖުމްހޫރިއްޔާ ކުރީރޭ އެ ވިދާޅުވީ،" ޕީއެންސީ ކޯލިޝަނުގެ ފުރަތަމަ ވެރިކަމުގައިވެސް އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވި އެވެ.
ނަމަވެސް، އެސްޑީއެފްގައި ސަރުކާރުން އަތްލީ އަނބުރާ ދައްކާ ގޮތަށް ގާނޫނީ ޒިންމާގެ ތެރެއިން ކަމަށާއި، މި ސަރުކާރުން އެސްޑީއެފް އަށް އާ ގާނޫނެއް އެކުލަވާލަމުންދާ ކަމަށްވެސް އޭނާ މިރޭ ވިދާޅުވި އެވެ.
އެސްޑީއެފް އަށް ޖަމާކުރި ޑޮލަރުގެ ތެރެއިން ބައެއް ފައިސާ ބޭނުންކޮށްފައިވާ ކަމަށް ރައީސް ޑރ. މުހައްމަދު މުއިއްޒު އެއްބަސްވެވަޑައިގެންނެވީ ޖުމްހުރީ ދުވަހުގެ ރަސްމީ ޖަލްސާގަ އެވެ. މިއީ މިކަމަށް ސަރުކާރުން އެއްބަސްވި ފުރަތަމަ ފަހަރެވެ. ނަމަވެސް އެސްޑީއެފް އިން ކުރި ހަރަދުގެ ތަފުސީލެއް އެމަނިކުފާނު ނުދެއްވަ އެވެ.
ސަރުކާރުން ނުބުނި ނަމަވެސް، އިތުބާރު ހުރި މަސްދަރުތަކާ ހަވާލާދީ "އަދަދު" އިން ވާނީ އެސްޑީއެފްގައި ހުރި ފައިސާ އެކި ފަހަރު މަތިން ބޭނުންކޮށްފައިވާ ކަމުގެ ހަބަރުތައް ގެނެސްދީފަ އެވެ.
މައުލޫމާތު ހޯދައި ލިބިގަތުމުގެ ހައްގުގެ ދަށުން ފިނޭންސް މިނިސްޓްރީން ހުށަހަޅައިގެން ހޯދި މައުލޫމާތުން ދައްކާ ގޮތުގައި އެސްޑީއެފްގައި ހުރި ޑޮލަރު ބޭނުންކުރީ ރަސްމީ ޑޮލަރު ރިޒާވު ރަނގަޅު ކުރުމަށެވެ. މިކަން އެނގެނީ މިދިޔަ އޮގަސްޓު 15، ގައި އެސްޑީއެފްގައި 56 މިލިއަން ޑޮލަރާ ގާތްކުރާ އަދަދަކަށް ހުރުމަށް ފަހު، އެ މަސް ނިމުނުއިރު ހުރި ފައިސާގެ އަދަދު 49 މިލިއަން ޑޮލަރަށް ވެއްޓިފައިވާތީ އެވެ.
އަންނަ އަހަރަށް ލަފާކުރާ ބަޖެޓުގެ ޕޮޒިޝަން ރިޕޯޓުގައިވާ ގޮތުން، ނިމިދިޔަ ސެޕްޓެމްބަރު މަސް ނިމުނުއިރު އެސްޑީއެފްގެ ޑޮލަރު އެކައުންޓުގައި ކޭޝް ބެލެންސްގެ ގޮތުގައި ހުރީ 18 މިލިއަން ޑޮލަރެވެ. އެހެންކަމުން މި ސަރުކާރުން ޖަމާކުރި 78 މިލިއަނުގެ ތެރެއިން 60 މިލިއަން ވަނީ ބޭނުންކޮށްފަ އެވެ.
