މެންޗެސްޓާ (ނޮވެމްބަރު 5) - މެންޗެސްޓާ ޔުނައިޓެޑްގެ ކޯޗުކަމާ ހަވާލުވާން ލިބުނު އޮފާ ގަބޫލުކުރީ ފައިސާ އަކަށް ނޫން ކަމަށާއި އެއީ އަބަދުވެސް ބޭނުންވެފައި ހުރި ފުރުސަތެއް ކަމަށް އެ ޓީމުގެ ކޯޗުކަމާ ހަވާލުވާން ތައްޔާރުވަމުން އަންނަ ރުބެން އަމޮރިމް ބުނެފި އެވެ.
އަމޮރިމް، 39، ކޯޗަކަށް ގެންނަން ޔުނައިޓުން ހުރިހާ ކަމެއް ނިންމައި، އިއުލާނުކުރި ނަމަވެސް އޭނާ އަށް ޔުނައިޓެޑްގެ ކޯޗުގެ ޒިންމާއާ ހަވާލުވެވޭނީ 10 ދުވަސް ފަހުން ކަމަށް ޔުނައިޓެޑުން ވަނީ ބުނެފަ އެވެ.
ސްޕޯޓިންގެ އެއްބަސްވުމުގައިވާ ނޯޓިސް މުއްދަތު ހަމަކޮށް، މި މަހު 11 ވަނަ ދުވަހު، އަމޮރިމް ޔުނައިޓެޑާ އެކު މަސައްކަތް ފަށާނީ 2027 ވަނަ އަހަރުގެ ޖޫން މަހުގެ ނިޔަލަށް އޮތް ކޮންޓްރެކްޓެއްގަ އެވެ.
ޔުނައިޓެޑާ ހަވާލުވާން ނިންމައި، މި ހޭދަކުރި ހަފްތާއެއްހާ ދުވަަހަކީ އޭނާގެ ހަޔާތުގައި ހަނދާނުން ފޮހެލަން ދަތި ދުވަސްތަކެއް ކަމަށް އަމޮރިމް ވަނީ ބުނެފަ އެެވެ. އެއީ، ދޫކޮށްލަން ޖެހޭ ޓީމަކީ ހަޔާތުގައި ވަރަށް ހާއްސަ ޓީމެއް ކަމަށްވާއިރު، ހަވާލުވާން ނިންމާފައި އޮތް ޓީމު، ޔުނައިޓެޑަކީ ދުނިޔޭގެ އެންމެ ބޮޑު އެއް ކްލަބަށް ވުމުން ކަމަށް އަމޮރިމް ވަނީ ބުނެފަ އެވެ.
"ހަގީގަތުގައި ޔުނައިޓެޑަކީ ދުނިޔޭގެ އެންމެ ބޮޑު އެއް ކްލަބް. އަަހަރެން ބޭނުންވީ ވެސް މި ކްލަބް. އެހެން ކްލަބްތަކުން އަހަންނަށް އެތައް ގުނައެއް ރަނގަޅު މުސާރަ ދޭން އެއްބަސްވެފައި އޮތީ. އެކަމަކު، އަހަރެން ޔުނައިޓެޑާ ގުޅުނީ ފައިސާއަކަށް ނޫން ކަން ދައްކައިދޭން ބޭނުމީ، އަހަރެން ގަޔާވީ އެ ކްލަބް އޮތް ހާލަތާއި ޕްރޮޖެކްޓަށް،" ޗެމްޕިއަންސް ލީގުގައި މިރޭ މެންޗެސްޓާ ސިޓީއާ ކުޅޭ މެޗުގެ ކުރިން ސްޕޯޓިންގެ ކޯޗުގެ ޒިންމާއާ އަދި ހަވާލުވެހުރި އަމޮރިމް ބުންޏެވެ.
ސްޕޯޓިންގެ ޑިރެކްޓަރު، ހޫގޯ ވިއާނާ، މި ސީޒަން ނިމުމުން މެންޗެސްޓާ ސިޓީގެ އެ މަގާމާ ހަވާލުވާއިރު، އަމޮރިމް އަންނަ ހަފްތާގައި ގުޅެނީ ސިޓީގެ ވާދަވެރި ޔުނައިޓެޑާ އެވެ. އަމޮރިމް ބުނީ، އޭނާ އާއި ވިއާނާއާ ދެމެދު އޮންނަ ގުޅުން އަބަދުވެސް ދެމިއޮންނާނެ ކަމަށެވެ.
