އުޒްބެކިސްތާންގައި މިހާރު ކުރިއަށްދާ, ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެމްޕިއަންޝިޕްގައި ރާއްޖޭން ލީގު ބުރުގައި ކުޅުނު ފަހު މެޗުގައި ތަޖިކިސްތާން އަތުން 3-1 އިން މޮޅުވެއްޖެ އެވެ.
ހަ ޓީމު ވާދަކުރާ މި މުބާރާތުގައި ރާއްޖޭން ފުރަތަމަ ކުޅުނު ހަތަރު މެޗުން ވެސް ވަނީ ބަލިވެފަ އެވެ. ތުރުކުމެނިސްތާން އަތުން ރާއްޖެ 3-2 ސެޓުން ބަލިވިއިރު، ދެން ކުޅުނު ތިން މެޗުގައި، ކިރްގިސްތާން، އަފްގާނިސްތާން އަދި އުޒްބެކިސްތާން އަތުން ރާއްޖެ ބަލިވީ ސީދާ ތިން ސެޓުންނެވެ.
އުޒްބެކިސްތާންގެ ޓަޝްކެންޓް ވޮލީބޯޅަ ކޯޓުގައި މިއަދު ކުޅުނު މެޗުގެ ސެޓުތައް ދިޔައީ، 25-20، 20-25، 25-23 އަދި 25-22 އިންނެވެ.
މި މެޗުގެ ފުރަތަމަ ސެޓުގައި ރާއްޖޭން ރަނގަޅު ފޯމެއްގައި ކުޅެ، ސެޓަރު، އިޝާން މުހައްމަދު (ބަޓިސް)ގެ ތަޖުރިބާގެ ބޭނުންހިފައި، އެޓޭކަރުން ކަމަށްވާ، ކެޕްޓަން، އިސްމާއިލް ސާޖިދު (ކުޑަކާއްޓެ) އަދި ޒުވާން ތަރި، ޝަމާއިލް ހުސެއިންގެ ބާރު ބޯޅަތަކާ އެކު، އިތުބާރު ހުރި ކުޅުމެއް ދައްކައި، ސެޓު ގެންދިޔަ އެވެ. އެކަމަކު، ދެ ވަނަ ސެޓުގެ މުހިންމު ވަގުތުގައި އާދައިގެ ގޯސްތަކެއް ހެދިގެން، ރާއްޖެ އަތުން ސެޓު ގެއްލި، 1-1 އިން އެއްވަރުވީ އެވެ.
އެކަަމަކު، ފުރަަތަމަ ސެޓުގައި އެ ދެއްކި ރޫހާ އެކު، ތިން ވަނަ ސެޓުގައި އެނބުރި އައިސް ވަރުގަދަ ކުޅުމެއް ދެއްކި އެވެ. މުހައްމަދު އަހުސަން އާއި އާދަމް ފައިރޫޒް ވެސް މި ސެޓުގައި ކުޅުން ރަނގަޅުކުރިއިރު، ފަހު ސެޓުގައި ވެސް މުޅި ޓމުން ހިތްވަރު ގަދަ ކުޅުމެއް ދެއްކި އެވެ. ފަހު ސެޓުގެ އެންމެ މުހިންމު ވަގުތުގައި ޓީމު މޮޅުކޮށްދިނުމުގައި އެޓޭކިންގައި ތަފާތު ދެއްކީ މިއަދުގެ މެޗުގައި ޖުމްލަކޮށް މޮޅަށް ކުޅުނު ޝަމާއިލް އެވެ.
މުހައްމަދު ޝަރަފްގެ ކޯޗުކަމުގައި ގައުމީ ފިރިހެން ޓީމުން މި މުބާރާތާ ކުރިމަތިލާއިރު، ދެން އެ ޓީމަށް އޮތީ ރޭންކިން މެޗެވެ. އެ މެޗުގައި ވެސް ކުޅެން ޖެހޭނީ، ތަޖިކިސްތާނާ ދެކޮޅަށެވެ. މެޗު އޮތީ މާދަމާ އެވެ.
