ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން އެމްއެމްއޭއިން މަޖުބޫރުކޮށް ނެރުނު އާ ގަވާއިދާ ގުޅިގެން ރިސޯޓު ވިޔަފާރިވެރިންގެ ޖަމިއްޔާ މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) ގެ ކަންބޮޑުވުންތަކެއް އޮއްވައި، ޓޫރިޒަމް މިނިސްޓަރު އިބްރާހިމް ފައިސަލްއާއެކު ބައްދަލުވުމެއް ފަށައިފި އެވެ.
އެ ބައްދަލުވުން ޓޫރިޒަމް މިނިސްޓްރީގައި މިހާރު ކުރިއަށްދާއިރު، އެ ބައްދަލުވުމުގައި ބައިވެރިވެވަޑައިގަތުމަށް މިނިސްޓަރު ފައިސަލް ވެލާނާ ގެއަށް ވަން މަންޒަރު "އަދަދު" ގެ ނޫސްވެރިންނަށް ވަނީ ފެނިފަ އެވެ. މަޓީގެ ބައެއް އިސް ފަރާތްތައް ވެސް އެ ބައްދަލުވުމުގައި ބައިވެރިވެ އެވެ.
ޑޮލަރު ތާށިކަމުގެ މައްސަލަ ހައްލުކުރުމަށް ބޭރު ފައިސާ މާރުކުރުމުގެ ގަވާއިދާއި ބޭރު ފައިސާއާ ބެހޭ ގަވާއިދަށް އެމްއެމްއޭއިން ބަދަލު ގެނައީ ހުށަހެޅި އެއްވެސް ކަންބޮޑުވުމަކަށް އިޖާބަ ނުދީ ކަމަށް މަޓީން މިއަދު ވަނީ ބުނެފަ އެވެ.
"އެމްއެމްއޭގެ އެދިވަޑައިގަތުމަކަށް މި ޖަމިއްޔާއާއެކު ބޭއްވުނު ބައްދަލުވުމުގައި, ބޭރު ފައިސާ އާއި ބެހޭ އާ ގަވާއިދުގައި ހިމެނުއްވުމަށް އެ އޮތޯރިޓީން ހުށަހަޅުއްވާފައިވާ ހުށަހެޅުންތަކަކީ, މި ޖަމިއްޔާއަށް އެއްބަސްވެވޭނެ ކަންތައްތަކެއް ނޫން ކަމުގައި ވާނީ ދަންނަވާފައި. ގަވާއިދު ގެޒެޓު ކުރެވުނުއިރު, މި ޖަމިއްޔާގެ ފަރާތުން ހުށަހަޅި އެއްވެސް ކަންބޮޑުވުމަކަށް އެމްއެމްއޭގެ ފަރާތުން އިޖާބަ ދެއްވާފައި ނުވާކަން ފާހަގަކުރަން," މަޓީގެ ބަޔާނުގައި ބުނެފައިވެ އެވެ.
އިއްޔެ ގެނައި ބަދަލުގެ ސަބަބުން، ޑޮލަރު މާރު ކުރަން ޖެހޭނީ ޓުއަރިސްޓުން އެ ފެސިލިޓީއަކަށް އަންނަ މިންވަރަކުންނެވެ. ރިސޯޓުތަކަށް އަންނަ ކޮންމެ ޓުއަރިސްޓަކަށް 500 ޑޮލަރު އެ ފެސިލިޓީއަކުން މާރު ކުރަންޖެހެ އެވެ. ގެސްޓްހައުސްތަކަށް އަންނަ ކޮންމެ ޓުއަރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަންޖެހެ އެވެ.
ބޭރު ފައިސާއިން ލިބޭ އާމްދަނީ މާރުކުރަން، އާ ގަވާއިދުގެ ދަށުން ވަނީ، ޓޫރިޒަމް ދާއިރާގައި ހަރަކާތްތެރިވާ ވިޔަފާރިތައް އެމްއެމްއޭގައި ރަޖިސްޓްރީ ވާން 30 ދުވަހުގެ މުހުލަތެއް ދީފަ އެވެ. އަދި އަލަށް ރަޖިސްޓްރީ ކުރާ ވިޔަފާރިތަކުން ވެސް މީރާގައި ރަޖިސްޓްރީ ކުރާތާ 30 ދުވަހުގެ ތެރޭގައި މި ރަޖިސްޓްރޭޝަނަށް އެމްއެމްއޭއަށް ހުށަހަޅަން ޖެހެ އެވެ.
