ދުނިޔޭގެ ހުރިހާ ގައުމެއް ވެސް މިވަގުތު އޮތީ ކޮންމެވެސް ކާރިސާއެއްގައި ކަމަށާއި އޭގެ ތެރެއިން ގިނައީ އިންސާނުންގެ ސަބަބުން އުފެދިފައިވާ ކާރިސާތައް ކަމަށް އދ. ގެ 79 ވަނަ އާންމު ޖަލްސާގެ ބަހުސްގައި ތަގުރީރު ކުރައްވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރައީސްގެ ވިދާޅުވީ، ހަމަނުޖެހުންތަކާއި މޫސުމީ ބަދަލުތަކާއި ބަނޑުހައިހޫނުކަމާއި ފަގީރުކަމާއި މުއްސަނދިންނާއި ފަގީރުންނާ ދެމެދު ހުރި ތަފާތުގެ ބޮޑުކަން ފަދަ ކަންކަމުގެ ސަބަބުން އިންސާނީ ދަރިފަސްކޮޅު އޮތީ ވަރަށް ބޮޑު މައްސަލަގަނޑެއްގެ ތެރޭގައި ކަމަށެވެ.
"އަޅުގަނޑުގެ އަތުގައި މި އޮތް ދުނިޔޭގެ ޗާޓުން ރަތް ކުލައިން ތިޔަ ފެނިވަޑައިގަންނަވަނީ ކޮންމެވެސް ކާރިސާއެއްގައި އުޅޭ ގައުމުތައް. އެއްވެސް ކާރިސާއެއް ނެތް، ފެހި ކުލައިން ފާހަގަކޮށްފައިވާ ގައުމެއް އެބަ ފެނިވަޑައިގަންނަވާތޯ؟ އޭގެ ސަބަބުން އެނގިވަޑައިގަންނަވާތޯ؟ އަޅުގަނޑުމެން އެންމެން މި ތިބީ ގަދަ ރަތުގައި. އިންސާނީ ދަރިފަސްކޮޅު މި އޮތީ ކާރިސާއެއްގައި،" ރައީސް މުއިއްޒު ވިދާޅުވި އެވެ. "މީގެ ތެރެއިން ގިނައީ އިންސާނުން އަމިއްލައަށް އުފެއްދި ކަންކަން."
ރައީސް ވިދާޅުވީ ދުނިޔޭގެ މައްސަލަތައް އިތުރުވަމުން، ބޮޑުވަމުންދިޔަ ނަމަވެސް ދައްކަމުން ދަނީ އެއް ވާހަކަތަކެއް ކަމަށާއި ކިޔަމުންދަނީ ހަމަ "އެއް ލަވައެއް" ކަމަށެވެ. އަދި ވިދާޅުވީ ދުނިޔެއަށް ބޭނުން ވަނީ އދ. އިން އެކަތިގަނޑަކަށްވެ މަސައްކަތް ކުރަން ކަމަށެވެ.
ރައީސް މުއިއްޒު ދެއްވި ތަގުރީރުގައި ދިވެހިރާއްޖެއާމެދު އެމަނިކުފާނު ގެންގުޅުއްވާ ވިޝަން ވެސް ހިއްސާ ކުރެއްވި އެވެ. ރައީސް ވިދާޅުވީ އެމަނިކުފާނު ބޭނުންވެވަޑައިގަންނަވަނީ 2040 ވަނަ އަހަރު އަންނަންވާއިރު ރާއްޖެއަކީ ފުރިހަމައަށް ތަރައްގީވެފައިވާ ގައުމެއްގެ ގޮތުގައި އޮތުމަށް ކަމަށެވެ.
"[ބޭނުންވަނީ] ރާއްޖެއަކީ އެހެން ގައުމުތަކުގެ އިހްތިރާމް ލިބިފައިވާ، ރިލެވަންޓު، ދިމާވާ މައްސަލަތަކާ ކުރިމަތިލުމުގެ ގާބިލުކަން ލިބިފައިވާ ގައުމަކަށްވުމަށް. [ބޭނުންވަނީ] އިންސާފުވެރި އަދި އެންމެންގެ ބައިވެރިވުން ލިބޭ މުޖްތަމައެއް،" ރައީސް ވިދާޅުވި އެވެ.
ރައީސް ދިވެހިރާއްޖެއާ މެދު ގެންގުޅުއްވާ ތަސައްވުރު ހިއްސާ ކުރައްވަމުން އެމަނިކުފާނު އިތުރަށް ވިދާޅުވީ ރާއްޖޭގެ ހައުސިން މައްސަލަ އެއްކޮށް ހައްލުކޮށް، ޓުއަރިޒަމް ފުޅާކޮށް މިހާރަށް ވުރެ ބޮޑަށް ތަރައްގީ ކުރުމަކީ އެމަނިކުފާނުގެ އަމާޒެއް ކަމަށެވެ.
އޭގެ އިތުރުން، އިޒްރޭލުން ގާޒާގައި ހިންގާ ނަސްލުހޭދު ކުރުން ކުށްވެރި ކުރައްވައި، އެކަން ހުއްޓުވުމުގެ މަސައްކަތް ދުނިޔެއިން ކުރަންޖެހޭނެ ކަމަށް ވެސް ރައީސްގެ ތަގުރީރުގައި މިރޭ ވިދާޅުވި އެވެ. އަދި ވިދާާޅުވީ އިޒްރޭލުން ހިންގާފައިވާ އަދި ހިންގަމުންދާ ކުށްތަކަށް ޖަވާބުދާރީކޮށް އެކަށީގެންވާ އަދަބު ދޭންޖެހޭ ކަމަށެވެ.
