ކަންސަސް ސިޓީ، ޔުނައިޓެޑް ސްޓޭޓްސް (ސެޕްޓެމްބަރު 8) - ބައިނަލްއަގުވާމީ އެކުވެރިކަމުގެ މެޗެއްގައި ކެނަޑާ އިން 2-1 އިން އެމެރިކާ ބަލިކޮށްފި އެވެ.
މިއީ، ފާއިތުވި 67 އަހަރު ތެރޭ އެމެރިކާ ދަނޑުގައި އެ ޓީމާ ދެކޮޅަށް ކުޅުނު މެޗަކުން ކެނަޑާ މޮޅުވި ފުރަތަމަ ފަހަރެެެވެ. އެންމެ ފަހުން އެމެރިކާ ދަނޑުގައި އެ ޓީމާ ބައްދަލުކުރި މެޗަކުން ކެނަޑާ މޮޅުވީ، 1957 ވަނަ އަހަރު ސެއިންޓް ލުއިސްގަ އެެވެ.
އެ މެޗު ކުޅުނު ފަހުން، އެމެރިކާ އިން އަމިއްލަ ދަނޑުގައި ކެނަޑާއާ ބައްދަލުކުރި 27 މެޗުން ވެސް ބަލިނުވެ އޮތް ނަމަވެސް ވަގުތީ ކޯޗު، މިކޭ ވަރާސްއާ އެކު ނުކުމެ މި ވަނީ ނާކާމިޔާބާ ކުރިމަތިލާން ޖެހިފަ އެވެ.
މިއީ، އަމިއްލަ ގައުމުގައި ކުޅުނު ކޮޕަ އެމެރިކާ ފުޓްބޯޅަ މުބާރާތުގެ ގްރޫޕް ސްޓޭޖުން ކެޓި ފަހުން އެެމެރިކާ އިން ކުޅުނު ފުރަތަމަ މެޗެވެ. ކޮޕަ އެމެރިކާގެ ދަށް ނަތީޖާ އަށް ފަހު، އެމެރިކާގެ ކޯޗުކަމުން ގްރެގް ބާހޯލްޓާ ވަކިކުރިއިރު، އެމެރިކާ އިން އަންނަނީ ޗެލްސީ ކޯޗުކަމުން ދާދި ފަހުން ވަކިވި، މައުރީސިއޯ ޕޮޗެޓީނޯ، އެ ޓީމުގެ ކޯޗަކަށް ހަމަޖެއްސުމުގެ ކޮންޓްރެކްޓް ކަންކަން ނިންމަމުންނެވެ.
މި ފަހަރުގެ ކޮޕަ އެމެރިކާގެ ސެމީ ފައިނަލަށް ދަތުރުކުރި ކެނަޑާ ޓީމަށް ރޭގެ މެޗުގައި ލީޑުނަގައިދިނީ ޖޭކަބް ޝެފަލްބާގް އެވެ. ދެ ވަނަ ހާފުގައި ޖޮނަތަން ޑޭވިޑް ވަނީ ކެނަޑާގެ ލީޑުފުޅާކުރި ފަހުން، މެޗުގައި އެމެރިކާ އިން ޖެހި ހަމައެކަނި ގޯލު ކާމިޔާބުކުރީ، ލޫކަ ޑެ ލަ ޓޯރޭ އެވެ.
