ޕެރިސް (ޖުލައި 27) - ނިއު ޒީލެންޑް އަންހެން ފުޓްބޯޅަ ޓީމުގެ ޓްރެއިނިން ކުރިއަށްދަނިކޮށް، އެ ތަނުގެ މަތިން، ކެނަޑާ ޓީމުގެ އޮފިޝަލަކު ޑްރޯން ދުއްވި މައްސަލައިގެ ތަހުގީގުގެ ތެރެއިން ކެނަޑާ އިން ކުރިން ވެސް ޑްރޯން ދުއްވާފައިވާކަމުގެ ރިޕޯޓްތަކެއް އާންމުވުމާ އެކު، ކެނަޑާ އަށް އެންމެ ފަހުން، ބޭއްވި ޓޯކިޔޯ އޮލިމްޕިކްސް އިން ލިބުނު ރަން މެޑަލް އަތުލަފާނެ ކަމުގެ ރިޕޯޓްތަކެއް އާންމުވެއްޖެ އެވެ.
މިދިޔަ ހޯމަ ދުވަހު، ސެއިން އެޓިއެންގައި ނިއު ޒީލެންޑުން ޕްރެކްޓިސް ކުރަމުން ދިޔަ ވަގުތެއްގައި ކެނަޑާ އޮފިޝަލަކު ވަނީ މަތިން ޑްރޯން ދުއްވައި، ވީޑިއޯ ކޮށްފަ އެވެ. ނިއު ޒީލެންޑް ޓީމުން މި މައްސަލަ، ޕޮލިހުންނަށް ރިޕޯޓްކުރުމާ އެކު، ޑްރޯން އެރުވި ފަރާތް، ފުލުހުން ހިފެހެއްޓިއިރު، އެއީ ކެނަޑާ ޓީމު އޮފިޝަލެކެވެ.
ކެނަޑާ އޮލިމްޕިކް ކޮމިޓީން ބުނީ، ފުލުހުން ހިފެހެއްޓި، ކެނަޑާގެ ޓީމު އޮފިޝަލަކީ މި ފަހަރުގެ މުބާރާތަށް އެކްރެޑިޓްކޮށްފައިވާ އޮފިޝަލެއް ނޫން ކަމަށެވެ. އެކަަމަކު، މި ފަދަ ކަމެއް ހިނގުމަކީ ދެރަ ކަމެއް ކަމަށާއި މި ކަމާ ނިއު ޒީލެންޑްގެ ކިބައިން މާފަށް އެދޭ ކަމަށެވެ. ކަންތައްތައް ދިމާވި ގޮތުން، އިންޓަނޭޝަނަލް އޮލިމްޕިކް ކޮމިޓީގެ އެންގުމާ އެއްގޮތަށް، ކެނަޑާ އިން ވަނީ، އެ ޓީމުގެ އެސިސްޓަންޓް ކޯޗު، ޖާސްމީން މެންޑާ އާއި އެކްރެޑިޓްކޮށްފައިނުވާ، އެނަލިސްޓް، ޖޯސެޕް ލޮމްބާޑީ ގެއަށް ފޮނުވާލައިފަ އެވެ.
ޓޯކިޔޯ 2020 އޮލިމްޕިކްސްގެ (ކޮވިޑް-19އާ ހެދި 2021 ގައި ބޭއްވި އޮލިމްޕިކްސް)، އަންހެން ފުޓްބޯޅައިން ރަން މެޑަލް ހޯދި ކެނަޑާ އަންހެން ޓީމުގެ ކޯޗަކީ، ބެވަލީ ޕްރީސްޓްމަން، 38، އެވެ. އޭނާ ވަނީ ޓީމު އޮފިޝަލުން ކުރި ކުށުގެ ޒިންމާ ނަގާ ކަމަށް ބުނެ، ފުރަތަމަ މެޗުގައި، ޓީމަށް އިރުޝާދުދިނުމުގައި ބައިވެރިނުވާން ނިންމައިފަ އެވެ. އެކަމަކު، ފަހުން ކެނަޑާ ފުޓްބޯޅަ ފެޑެރޭޝަނުން ވަނީ ޕްރީސްޓްމަން، މަގާމުން އެކަހެރިކޮށްފަ އެވެ.
އޭގެ ފަހުން، މީޑިއާގައި އާންމުވި ރިޕޯޓްތަކަކީ، ކެނަޑާގެ އަންހެން އަދި ފިރިހެން ގައުމީ ޓީމުން، މީގެ ކުރިން މުބާރާތްތަކުގައި ވެސް އިދިކޮޅު ޓީމުތަކުގެ މައުލޫމާތު ހޯދަން ޑްރޯން ދުއްވާފައިވާ ކަމެވެ.
ކެނަޑާ ފިރިހެން ޓީމާ ހަވާލުވެހުރި، ޖެސީ މާޝް އަށް، ދާދި ފަހުން، ނިމުނު ކޮޕަ އެމެރިކާ ފުޓްބޯޅަ މުބާރާތުގައި ވެސް އެ ޓީމުގެ އޮފިޝަލެއްގެ ފަރާތުން އެކަން ފެނުނު ކަމަށްވެ އެވެ. ކެނަޑާ ވަނީ ދާދި ފަހުން، ކުޅުނު ކޮޕަ އެމެރިކާގެ ސެމީ ފައިނަލަށް ވެސް ދަތުރުކޮށްފަ އެވެ.
ކެނަޑާ ފުޓްބޯޅަ ފެޑެރޭޝަނުގެ، ޗީފް އެކްޒެކްޓިވް ކެވިން ބްލޫ ދާދި ފަހުން، ވަނީ ޑްރޯންއާ ގުޅޭ މައްސަލައެއް އޭނާ އަށް ވެސް ލިބުނު ކަމަށް ބުނެފަ އެވެ.
ކެނަޑާ އޮލިމްޕިކް ކޮމިޓީގެ ޗީފް އެގްޒެކްޓިވް، ޑޭވިޑް ޝޫމޭކާ ވިދާޅުވީ، ކެނަޑާ އަންހެން ޓީމަށް އެންމެ ފަހުން އޮލިމްޕިކްސްގައި ލިބުނު ރަން މެޑަލް އަތުލަފާނެ ކަމުގެ މައުލޫމާތުތަކެއް އޭނާ އަށް ވެސް ލިބިފައިވާ ކަމަށެވެ. އެކަމަކު، މި ކަންކަމުގެ ސީދާ މައުލޫމާތު ލިބޭނީ، ކުރިއަށްދާ ތަހުގީގުތައް ނިމުމަށް ފަހު ކަމަށް ޝޫމޭކާ ވިދާޅުވި އެވެ.
