މި ވަގުތު އެންމެ ބޮޑު ފޯކަސް އެއް ހުރީ ގައުމީ ޓޭބަލް ޓެނިސް މުބާރާތުގައި ކާމިޔާބު ހޯދުމާއި ތައިލެންޑާއި ވިއެޓްނާމްގައި ކުރިއަށް އޮތް އިންޓަނޭޝަނަލް މުބާރާތްތަކަށް ކަމަށް ގައުމީ ޓީޓީ ތަރި، ފާތިމަތު ދީމާ އަލީ ބުނެފި އެވެ.
ކޮލިފައިން އެއް ކާމިޔާބުކޮށް އޮލިމްޕިކްސްއެއްގައި ވާދަކުރި ފުރަތަމަ ދިވެހި އެތުލީޓުގެ ޝަރަފް ހޯދައި، މި ފަހަރުގެ ޕެރިސް އޮލިމްޕިކްސްގައި ވާދަކުރި ދީމާ، 16، ވަނީ ދާދި ފަހުން، ގައުމީ ރޭންކިންގައި ކުޅުނު ހުރިހާ މެޗަކުންނާއި އެސޯސިއޭޝަން ކަޕްގައި އެއް މެޗު ފިޔަވައި ހުރިހާ މެޗަކުން މޮޅުވެފަ އެވެ.
ދެ ވަނަ ފަހަރަށް އެސޯސިއޭޝަން ކަޕްގެ ސިންގަލްސް ޗެމްޕިއަންކަން ހޯދި ދީމާ ވަނީ މި ފަހަރުގެ މުބާރާތުގެ 19 އަހަރުން ދަށުގެ އަންހެން ސިންގަލްސް ޗެމްޕިއަންކަމާއި 19 އަަހަރުން ދަށުގެ މިކްސް ޑަބަލްސް ޗެމްޕިއަންކަން، އަހްޔާރު އަހުމަދު ހާލިދުއާ އެއް ޕެއާ އަކަށް ކުޅެގެން ހޯދައިފަ އެވެ. އެކަމަކު، ދީމާ އާއި އަހްޔާރު އަށް ޑިވިޝަން އެކެއްގެ މިކްސް ޑަބަލްސް އިން ލިބުނީ ރަނަރަޕް އެވެ.
އެސޯސިއޭޝަން ކަޕަށް ފަހު، "އަދަދު ސްޕޯޓްސް"އާ ވާހަކަ ދައްކަމުން ދީމާ ބުނީ، ޖުމްލަކޮށް ބަލާއިރު އެސޯސިއޭޝަން ކަޕް ދިޔައީ ވަރަށް ރަނގަޅަށް ކަމަށެވެ. އެ ގޮތުން، ގައުމީ ރޭންކިންގައި ކުޅުނު މެޗުތަކުން ކަންކަން ދަސްކޮށްގެން، އެސޯސިއޭޝަން ކަޕް ފައިނަލުގައި އައިޝަތު ރަފާ ނާޒިމް އަތުން 4-0 އިން މޮޅުވެވުނުކަން ދީމާ ފާހަގަކުރި އެވެ.
"ދީމާ ރޭންކިންގައި ވެސް ކުޅެން ޖެހުނު ރަފާއާ އެކު ވެސް ތިން ފަހަރު. ސޯ އައިތިންކް އެ މެޗުގެ ވީކް ޕޮއިންޓްސްއާ އެއްޗެހި އައި ޓްރައި ޓު ޔޫސް އެންޑް އިމްޕްލިމެންޓް. ދެން، މި މުބާރާތަށް ފަހު މި އޮތީ ގައުމީ، އިޓްސް ނޮޓް ޑަން ޔެޓް (އަދި މި ނިމުނީ އެއް ނޫން). ހޯޕިން ގައުމީ ގައި ވެސް ރަނގަޅަށް ކުޅެވޭތޯ،" ހަތަރު ފަަހަރު ގައުމީ ޗެމްޕިއަންކަން ހޯދާފައިވާ ދީމާ ބުންޏެވެ.
ދީމާ ބުނީ، ގައުމީ މުބާރާތް ނިންމާލުމަށް ފަހު، މި އަހަރު ތައިލެންޑާއި ވިއެޓްނާމްގައި އޮތް މުބާރާތްތަކެއްގައި ވާދަކުރާނެ ކަމަށެވެ. އަދި އެ މުބާރާތްތަކަށް ދިއުމުގެ ކުރިން ވެސް ފޯކަސް ކުރަން ޖެހޭ ކަންކަން ހުރިކަން ދީމާ ފާހަގަކުރި އެެެވެ.
"މި އަހަރު އެބަހުރި ބައިވަރު މުބާރާތްތައް، އެހެންވީމަ ދީމާ ފޯކަސް ކުރަނީ މެޗު އިމްޕްރޫވްކުރަން، މެޗުގެ ގޭމް އިމްޕްރޫވްކޮށްފައި. މުބާރާތްތައް ނިމުނީމަ ރަނގަޅު ލޯންގް ޓާމް ޓްރެއިނިން އަށް ދާން. ޑަބްލިއުޓީޓީ ބެންކޮކް، މި އޮތީ ގައުމީ އަށް ފަހު. ބެންކޮކް ނިންމާފައި، ދެން ދަނީ، ވިއެޓްނާމް އަށް ޑަބްލިއުޓީޓީ އެއްޗެއް،" ދީމާ ބުންޏެވެ.
މިދިޔަ ދޮޅު އަހަަރަކީ ދީމާ އަށް ރާއްޖޭން ބޭރުގައި ގިނަ ޓްރެއިނިންތަކަކާއި މުބާރާތްތަކެއް ކުޅެން ޖެހުނު މުއްދަތެކެވެ. އެ މުއްދަތުގެ ތަޖުރިބާތައް ހިއްސާކުރަމުން ދީމާ ބުނީ، ލިބެމުން އަންނަ ބްރޭކްތަކުގެ ބޭނުން ރަނގަޅަށް ހިފަމުން އަންނަ ކަމަށެވެ. އަދި އަނެއްކާ ވެސް ލޯންގް ޓާމްކޮށް ވިސްނައި، ޓްރެއިނިންތައް ފަށަން ކެތްމަދުވެފައި ހުރި ކަމަށް ދީމާ ވަނީ ބުނެފަ އެވެ.
ގައުމީ ޓީޓީ މުބާރާތް މިއަދު ފެށުމަށް ޓީޓީ އެސޯސިއޭޝަނުން އޮތީ ތާވަލުކޮށްފަ އެވެ.
