ޕްރޮސެކިއުޓާ ޖެނެރަލްގެ މަގާމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ގާތް ބޭފުޅަކު ގެންނަން އެމަނިކުފާނު ލޮބީކުރައްވާ ކަމަށް ކުރީގެ ރައީސް އަބްދުﷲ ޔާމީނު އަބްދުލް ގައްޔޫމު ކުރެއްވި ތުހުމަތު އަބްދުއްރަހީމް ދޮގުކުރައްވައިފި އެވެ.
ސަންގުޓީވީއަށް އަބްދުއްރަހީމް ދެއްވި ހާއްސަ އިންޓަވިއުއެއްގައި ވިދާޅުވީ އެމަނިކުފާނާ ގުޅުން އޮތް މީހަކު ޕްރޮސެކިއުޓާ ޖެނެރަލްގެ މަގާމަށް ވަޑައިގެންފާނެ ކަމަށް ތުހުމަތުކުރައްވާ ބޭފުޅުން އެގޮތަށް ހީކުރައްވަނީ އާއިލާގައި ގާބިލު ބޭފުޅުން ތިއްބެވީމާ ކަމަށެވެ. ޔާމީނު އެގޮތަށް ވާހަކަ ދައްކަވަނީ އަބްދުއްރަހީމް ތުހުމަތުކުރެއްވި ގޮތުގައި އެގޮތަށް ކަންތައްވެއްޖެ ނަމަ ޔާމީނުގެ މައްސަލަތައް ބެލުން އަވަސްވެދާނެތީ އެވެ.
"ފުރަތަމަ ކަމަކަށް އަޅުގަނޑު ލޮބީއެއް ނުކުރަން [އާއިލީ ބޭފުޅަކު ޕްރޮސެކިއުޓާ ޖެނެރަލްގެ މަގާމަށް ގެންނާކަށް]، އަނެއް ކަމަކީ އެބޭފުޅުންނަށް ހީވަނީ ވަކި ބޭފުޅަކު، މިސާލަކަށް އަޅުގަނޑާ ގުޅުން އޮތް މީހަކު އެމަގާމަށް އަތުވެދާނޭ، އެއީ އެވަރުގެ އިލްމީ ގާބިލު މީހުން އަޅުގަނޑުގެ ފެމިލީގައި ތިބީމާތާ އެގޮތަށް ޝައްކު އުފައްދަން ޖެހޭނީ،" އަބްދުއްރަހީމް ވިދާޅުވި އެވެ.
އާއިލީ ބޭފުޅު ޕްރޮސެކިއުޓާ ޖެނެރަލްގެ މަގާމަށް ގެންނަވަން އަބްދުއްރަހީމް މަސައްކަތްކުރައްވާ ކަމަށް ކުރީގެ ރައީސް ޔާމީނާއި އެމަނިކުފާނުގެ އަރިސް ބޭފުޅުން ތުހުމަތުކުރައްވަނީ އަބްދުއްރަހީމް ސިފަކުރެއްވި ގޮތުގައި އެ ބޭފުޅުންގެ އޮތް ކަންބޮޑުވުމަކާ ހެދި އެވެ.
"ދެން އަނެއް ކަމަކީ އަޅުގަނޑާ ގާތްމީހަކު އައިސްފިއްޔާ އަނެއްކާ ޔާމީނުގެ މައްސަލަ އިތުރަށް، މާ ސްޕީޑްބާރުކޮށް ކުރިއަށް ހިނގައިދާނެ ކަމަށް ބިރުގަންނަނީ،" އެމަނިކުފާނު ވިދާޅުވި އެވެ.
ޔާމީނާއި އެމަނިކުފާނުގެ އަރިސްބޭފުޅުން ތުހުމަތުކުރައްވާ ގޮތުގައި ޕްރޮސެކިއުޓާ ޖެނެރަލްގެ މަގާމަށް އާއިލީ ބޭފުޅަކު ގެންނަން އަބްދުއްރަހީމް މަސައްކަތްކުރައްވަނީ އެމްއެމްޕީއާރުސީގެ މައްސަލަތައް ބަލައިފާނެތީ އެވެ.
އަބްދުއްރަހީމް ވިދާޅުވީ އެމްއެމްޕީއާރުސީގެ މައްސަލަ ބަލައިފާނެތީ އެމަނިކުފާނު އެއްގޮތަކަށް ވެސް ކަންބޮޑުވެވަޑައިނުގަންނަވާ ކަމަށާއި އެ ހިޔާނާތުގައި އެއްވެސް ބައިވެރިވުމެއް ނޯންނާނެ ކަމަށެވެ.
