ބޭންކް އޮފް މޯލްޑިވްސް އާއި އިދިކޮޅު މޯލްޑިވިއަން ޑިމޮކްރެޓިކް ޕާޓީ ގުޅިގެން އާދީއްތަ ދުވަހު ހިންގަން އުޅުނު ކަމަށް ސަރުކާރުން ތުހުމަތު ކުރާ ބަގާވަތަށް 48 ގަޑިއިރު ފާއިތުވި އިރު ވެސް އެ މައްސަލައިގެ ތުހުމަތުގައި އެއްވެސް މީހަކު ހައްޔަރެއް ނުކުރި އެވެ.
ފުލުހުން ބުނަނީ ބީއެމްއެލްއިން ދިވެހި ރުފިޔާ އެކައުންޓުތަކަށް ދެމުން ދިޔަ ޑޮލަރު ސަޕޯޓު ކަނޑާލުމަށްފަހު، އިދިކޮޅުން އިގްތިސާދީ ހާލަތް ކިޔައިދޭން ޕްރެސް ކޮންފެރެންސެއް ބޭއްވުމަށްފަހު، ފޭކު އެކައުންޓުތަކެއް ބޭނުންކޮށްގެން ސަރުކާރު ވައްޓާލަން މަގުތަކަށް ނުކުތުމަށް ގޮވާލާފައިވާ ކަމަށެވެ.
ބަގާވާތް ކުރަން އުޅުނު މައްސަލަ ތަހުގީގު ކުރަން ފެށި ކަމަށް ފުލުހުން ބުނީ ރޭ 9:04 ގަ އެވެ. ނަމަވެސް މިހާތަނަށް ސަރުކާރު ވައްޓާލަން އުޅުނު ކަމަށް ބުނާ މައްސަލައިގައި މީހަކާ ސުވާލެއް ވެސް ނުކުރެ އެވެ. އަދި އެއްވެސް މީހަކު ހައްޔަރެއް ވެސް ނުކުރެ އެވެ.
ދިވެހި ރުފިޔާ އެކައުންޓުތަކަށް ދެމުން އައި 250 ޑޮލަރުގެ ސަޕޯޓު ކަނޑާލުމުގެ އިތުރުން ކްރެޑިޓް ކާޑުގެ ޑޮލަރުގެ ލިމިޓު ވެސް 100 ޑޮލަރަށް ބީއެމްއެލް އިން ތިރި ކުރި އެވެ. ނަމަވެސް ބޭންކުގެ ރެގިއުލޭޓަރު މޯލްޑިވްސް މަނިޓަރީ އޮތޯރިޓީން އަންގައިގެން ހަމަ އެ ދުވަހު އެ ނިންމުން ވަނީ ބާތިލުކޮށްފަ އެވެ.
އާދީއްތަ ދުވަހު ގެންނަން އުޅުނު ކަމަށް ބުނާ ބަގާވާތާ ގުޅޭ ގޮތުން ރޭ ރައީސް ޑރ. މުހައްމަދު މުއިއްޒު ވެސް ވާހަކަ ދެއްކެވި އެވެ. އެމަނިކުފާނު ވިދާޅުވީ ގެންނަން އުޅުނީ ބަގާވާތެއް ކަމަށް "ބުއްދި ހުރި ކޮންމެ މީހަކަށް" ވެސް އެނގޭނެ ކަމަށެވެ.
"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު މި ދެންނެވި ހުރިހާ ޑޮޓުތަކެއް ގުޅިގެންދާކަން އެނގޭނެ، މިކުރި ކަންތައް މިއީ، ހަމަ ޝިޔާމު [މިނިސްޓަރު ޝިޔާމު] ވެސް ފާހަގަކުރެއްވި ގޮތަށް ވާނީ ހަމަ އެޓެމްޕެޑް ކޫއަކަށް، އެކުރި ބަޔަކު ކުރީ،" ވެރިކަން ހިންގާ ޕީއެންސީގެ ޖަލްސާގައި ވާހަކަ ދައްކަވަމުން ރައީސް މުއިއްޒު މުއިއްޒު ވިދާޅުވި އެވެ.
އާދީއްތަ ދުވަހު ގެންނަން އުޅުނީ ބަގާވާތެއް ކަމަށް ސަރުކާރުން ބުނާތީ އިދިކޮޅު ޕާޓީގެ ޗެއާޕާސަން ފައްޔާޒް އިސްމާއިލް އެކަން ސިފަ ކުރެއްވީ ޖޯކެއް ގޮތުގަ އެވެ. އަދި ވަރަށް ގިނަ އާންމުންގެ ފާޑުކިޔުން ވެސް އެކަމަށް އަމާޒުވި އެވެ.
