ރާއްޖޭގައި ޑޮލަރުގެ ދަތިކަން އިންތިހާއަށް ގޮސްފައިވާ ކަމަށް ބުނެ އިގްތިސާދީ އިސްލާހީ ފިޔަވަޅުތައް އަވަސް ކުރަން މޯލްޑިވްސް ޓްރޭޑް އެސޯސިއޭޝަން (އެމްޓީއޭ) އިން ސަރުކާރަށް ގޮވާލައިފި އެވެ.
އެމްޓީއޭއިން އާދީއްތަ ދުވަހު ނެރުނު ބަޔާނެއްގައި ބުނީ ފާއިތުވި މަސްތަކުގައި ރާއްޖޭގައި ޑޮލަރުގެ ދަތިކަން އިތުރުވަމުން އައިސް، މިހާރު ވަނީ ޑޮލަރު ލިބުމުގެ ދަތިކަން އިންތިހާއަށް ބޮޑުވެ، ޑޮލަރުގެ އަގު މިއިން ޒަމާނަކު މަތި ނުވާ ދަރަޖައަށް މަތިވެފައިވާ ކަމަށެވެ.
އޭގެ ސަބަބުން ވިޔަފާރިތަކާއި އާންމު ރައްޔިތުންނަށް އިގްތިސާދީ އަދި މާލީ ބޮޑެތި ގޮންޖެހުންތަކާ ވަނީ ކުރިމަތިލާން ޖެހިފައި ކަމަށް ވެސް އެ ޖަމިއްޔާއިން ބުންޏެވެ.
"މޯލްޑިވްސް މަނިޓަރީ އޮތޯރިޓީ އިން ހާމަކޮށްފައިވާ މައުލޫމާތުގެ މައްޗަށް ބިނާކޮށް ބަލާއިރު، ފާއިތުވި ތިން މަސްދުވަހުގެ ތެރޭގައި ޑޮލަރުގެ ރަސްމީ ރޭޓާއި ނުރަސްމީ ރޭޓާ ދެމެދުގައިވާ ތަފާތު ވަނީ 20 އިންސައްތައަށްވުރެ އިތުރުވެފައި. ނުރަނގަޅު މި ބޮޑު ބަދަލުގެ ސަބަބުން އާންމު ފަރުދުންނާއި އާންމު ވިޔަފާރިވެރިން ޑޮލަރު ގަތުމަށް ބޮޑު އަގެއް މިވަނީ ދައްކަން ޖެހިފައި،" އެމްޓީއޭއިން ބުންޏެވެ.
ރާއްޖޭގައި ޑޮލަރު ތާށިކަން އިތުރުވެ، ބޭންކް ބީއެމްއެލްގެ ރުފިޔާ ކާޑުތަކުން ކުރެވޭ ބޭރުގެ މުއާމަލާތްތައް ހަނިކުރުމަށް ހަރުކަށި ފިޔަވަޅުތަކެއް އަޅާފައިވާކަން އެމްޓީއޭއިން ވަނީ ފާހަގަކޮށްފަ އެވެ. ނަމަވެސް އެމްއެމްއޭއިން އަންގައިގެން ބޭންކުން ވަނީ އެ ނިންމުން އިއްޔެ ބަދަލުކޮށްފަ އެވެ.
އެމްޓީއޭއިން ބުނީ އޭގެ ތެރޭގައި ރުފިޔާ ކާޑުތަކުން ކުރެވޭ ބޭރުގެ މުއާމަލާތްތައް މުޅިން ހުއްޓާލުމާއި، ބައެއް ކްރެޑިޓް ކާޑުތަކުގެ ޑޮލަރު ލިމިޓް އިތުރަށް ތިރިކުރުން ބޭންކުން އަޅާފައިވާ މި ފިޔަވަޅުތަކުގެ ނަތީޖާއެއްގެ ގޮތުން ކުދި އަދި މެދުފަންތީގެ ވިޔަވާރިވެރިން ކުރަމުން އަންނަ މުއާމަލާތްތަކަށް އިތުރު ދަތިތަކާ ވަނީ ކުރިމަތިލާން ޖެހިފައި ކަމަށެވެ.
"މިހާލަތުގައި، އިގްތިސާދަށް ކުރިމަތިވަމުންދާ ގޮންޖެހުންތަކުން އަރައިގަނެ، އާންމު ވިޔަފާރިވެރިންނަށް ކުރިމަތިވަމުންދާ ގޮންޖެހުންތައް ކުޑަކުރުމަށް ސަރުކާރުން ކުއްލި ފިޔަވަޅުތަކެއް އަޅަން ޖެހިފައިވާކަން މިޖަމިއްޔާއިން ދެކެން. އޭގެ ތެރޭގައި ބޭރު ފައިސާ ލިބޭ މައިގަނޑު ދާއިރާތަކުން، ހާއްސަކޮށް ފަތުރުވެރިކަމުގެ ދާއިރާއިން ލިބޭ ޑޮލަރު ސީދާ ސަރުކާރަށް ވިއްކުމަށް ބާރުއެޅުމާއި، އަދި ޑޮލަރު ބޭނުންކުރެވޭނެ ދާއިރާތައް ވަގުތީގޮތުންނަމަވެސް ހަނިކުރަންޖެހޭކަމަށް މި ޖަމިއްޔާއިން ދެކެން،" އެމްޓީއޭއިން ބުންޏެވެ.
ހަމައެއާއެކު ދައުލަތުގެ ހަރަދު ކުޑަކޮށް، ސިޔާސީ ވަޒީފާތައް މަދުކޮށް، ދައުލަތުގެ ކުންފުނިތަކުގައި ހިނގަމުންދާ ކޮރަޕްޝަންގެ އަމަލުތައް ހުޓުވުމަކީ މިހާރުން މިހާރަށް ސަރުކާރުން މުހިންމު ފިޔަވަޅުތަކެއް އަޅަންޖެހިފައިވާ މައްސަލަތަކެއް ކަމަށް ވެސް އެމްޓީއޭއިން ބުންޏެވެ.
ރާއްޖޭގެ އިގްތިސާދަށް ކުރިމަތިވަމުންދާ ބޮޑެތި ގޮންޖެހުންތަކުން އަރައިގަނެ، މި ހާލަތުގައި ވިޔަފާރިތަކަށް މުދާ އެތެރެކުރުމަށް ބޮޑެތި ގޮންޖެހުންތަކާ ކުރިމަތިލާން ޖެހިފައިވާކަން ފާހަގަކޮށް އެމްޓީއޭއިން ބުނީ މިހާލަތުން އަރައިގަތުމަށް އަވަސް ހައްލެއް ހޯދައިދިނުމަށް ހަރުދަނާ ފިޔަވަޅުތައް އެޅުމަށް ސަރުކާރަށް ގޮވާލާ ކަމަށެވެ.
