ގައުމީ ފެތުންތެރިޔާ، މުބާލް އައްޒާމް އިބްރާހީމް، ރާއްޖޭގެ ފިރިހެނުންގެ ޝޯޓް ކޯސް 100 މީޓަރު އިންޑިވިޖުއަލް މެޑްލޭ އިވެންޓުގެ ގައުމީ ރެކޯޑް އާކޮށްފި އެވެ.
އޮސްޓްރޭލިއާގެ މެލްބަންގައި ކުރިއަށް ދިޔަ އަންކުލައުޑް ވިކްޓޯރިއަން އޯޕަން ޝޯޓްކޯސް ޗެމްޕިއަންޝިޕްސް 2024 ގައި ވާދަކޮށް މުބާލް، 100 މީޓަރު އިންޑިވިޖުއަލް މެޑްލޭ އިވެންޓުގެ ރެކޯޑް އާ ކުރީ، 1 މިނިޓް، 04.51 ސިކުންތުން ރޭސް ނިންމައިގެންނެވެ.
މި އިވެންޓްގެ ގައުމީ ރެކޯޑް ފެތުންތެރިއަކަށް މުގުރާލެވިފައިމިވަނީ ތިން ވަރަކަށް އަހަރު ފަހުންނެވެ. އެ ގޮތުން، މި ރެކޯޑް އެންމެ ފަހުން ހަދާފައިވަނީ އަލީ އިމްއާން އެވެ. އިމްއާން މި ރެކޯޑް ހެދީ 2021 ވަނަ އަހަރު ކުރިއަށްދިޔަ ފީނާ ސްވިމިން ވޯލްޑް ކަޕްގަ އެވެ.
އެ ފަަހަރު، 100 މީޓަރު، އިންޑިވިޖުއަލް މެޑްލޭ އިވެންްޓްގައި ވާދަކޮށް އިމްއާން ރޭސް ނިންމީ، 1 މިނިޓް، 04.93 ސިކުންތުންނެވެ.
ޓޯކިޔޯ 2020 އޮލިމްޕިކްސްގައި ރާއްޖޭގެ ދިދަ އުފުލި އެތުލީޓު، މުބާލް އަންނަނީ އޮސްޓްރޭލިއާގައި ތަމްރީން ފުރިހަމަ ކުރަމުންނެވެ. އަދި އެ ޓްރެއިނިންތަކުގެ ބޭނުންހިފައި ވޭތުވެދިޔަ ދެ އަހަރު އޭނާ ވަނީ ގައުމީ ސްވިމިން ޓީމުގައި ހިމެނިގެން ގިނަ މުބާރާތްތަކެއްގައި ވާދަކޮށްފަ އެވެ.
ޗައިނާގެ ހަންޒޫގައި މިދިޔަ އަހަރު ކުރިއަށްދާ 19 ވަނަ އޭޝިއަން ގޭމްސްގައި މުބާލް، ވަނީ 17 އަހަރުވީ ފިރިހެނުންގެ 100 މީޓަރުގެ ބްރެސްޓް ސްޓްރޯކްގެ ގައުމީ ރެކޯޑު މުގުރާލައިފަ އެވެ. އެ އިވެންޓުން، މުބާލް ގައުމީ ރެކޯޑު ހެދީ އެއް މިނެޓު 14.73 ސިކުންތުން ރޭސް ނިންމައިގެންނެވެ. މި ރެކޯޑު ކުރިން އޮތީ 17 އަހަރު ކުރިން 10 ވަނަ ސައުތު އޭޝިއަން ގޭމްސްގައި ފެތި ހަސަން އަޝްރަފް އަތުގަ އެވެ. އެއީ، 2006 ވަނަ ސްރީ ލަންކާގައި ކުރިއަށްދިޔަ ގޭމްސްގައި އަޝްރަފް ގައުމީ ރެކޯޑު ހެދީ އެއް މިނެޓު 16:33 ސިކުންތުން ރޭސް ނިންމައިގެންނެވެ.
