ވިލާ ކޮލެޖުގެ ބެޗްލަރ އޮފް ފާމަސީ ކިޔަވާ 22 ދަރިވަރުން ހުވާކޮށް، ވައިޓް ކޯޓާ މިއަދު ހަވާލުވެއްޖެ އެވެ.
ވިލާ ކޮލެޖުގައި ހޯލުގައި ބޭއްވި އެ ހަފްލާގައި ޝަރަފުވެރި ކޮށްދެއްވީ މިނިސްޓްރީ އޮފް ހެލްތްގެ ޑިރެކްޓާ ޖެނެރަލް އޮފް ހެލްތް ސާވިސަސް، ޑރ. އަހުމަދު އަޝްރަފް އެވެ.
"ފާމަސިސްޓުން ނަކީ ހަމަ އެކަނި، ބޭސް ސިޓީއަށް ބޭސް ވިއްކަން ތިބޭ ބައެއް ކަމަށް، ޒަމާނުއްސުރެން ހީވެފައި އޮންނަ އޮތުން މިއަދު ދުނިޔޭގެ ތަރައްގީވެފައިވާ ގައުމުތަކުގައި، މިވަނީ ބަދަލުވެފައި. މި ކުށްހީ ރާއްޖޭގައިވެސް މިހާރު މަޑުމަޑުން ބަދަލުވަމުންދާކަމީ ވަރަށްވެސް ހިތްހަމަ ޖެހުން ލިއްބައިދޭ ކަމެއް." ފެކަލްޓީ އޮފް ހެލްތް ސައިންސްގެ ޑީން އައިޝަތު މާލާ ވިދާޅުވި އެވެ.
ބެޗެލަރ އޮފް ފާމަސީ ދަރިވަރުންނަށް ވައިޓް ކޯޓް ހަވާލުކޮށްދެއްވީ ވިލާ ކޮލެޖުގެ ރެކްޓާ ޑރ. އަހުމަދު އަންވަރު، ވައިސް ރެކްޓާ ޑރ. އަލީ ނަޖީބު އަދި ވިލާ ކޮލުގެ ފެކަލްޓީ އޮފް ހެލްތް ސައިންސް ގެ ޑީން އައިޝަތު މާލާގެ އިތުރުން ޝަރަފުވެރި މެހެމާނު، ޑރ. އަހުމަދު އަޝްރަފް އެވެ.
ދަރިވަރުން ހުވާ ލައި ދެއްވީ ފެކަލްޓީ އޮފް ހެލްތް ސައިންސަސްގެ ޑީން އައިޝަތު މާލާ އެވެ.
ވައިޓް ކޯޓު ހަވާލު ކޮށްދެއްވުމަށްފަހު ޑރ. އަހުމަދު އަޝްރަފް ވިދާޅުވީ ސިއްހީ ދާއިރާއިން ފަންނީ ބޭފުޅުން އުފެއްދުމަށް ވިލާ ކޮލެޖުން މަސައްކަތްކުރަމުންދާ ގޮތް ފާހަގަކުރައްވާ ކަމަށެވެ.
"ވިލާ ކޮލެޖުން މި ތަމްރީން ލިބުމުގެ ފުރުސަތު ހުޅުވިގެން ދިޔުމަކީ އަޅުގަނޑުމެންނަށް ވަރަށް ބޮޑަށް ދަތިވެފައި އޮންނަ އެއްކަމެއް ކަމުގައިވާ ޕްރޮފެޝަނަލުން ހޯދުމަށް ލިބުން ވަރަށް ބޮޑު ލުއި ފަސޭހަ ކަމެއް. ހެލްތު ސެކްޓަރަކީ އަޅުގަނޑުމެން ކޮންމެ މީހަކާވެސް ގުޅިފައިވާ ދާއިރާއެއް،" ޑރ. އަޝްރަފް ވިދާޅުވި އެވެ.
ހަފްލާގައި ޑރ. އަލީ ނަޖީބު ވަނީ މި ރަސްމިއްޔާތުގެ މުހިންމުކަމާއި، ވިލާ ކޮލެޖަކީ ފާމަސީ ދަރިވަރުންނަށް ވައިޓް ކޯޓް ހަވާލު ކުރާ ފުރަތަމަ ތައުލީމީ މުއައްސަސާކަން ފާހަގަ ކުރައްވާފަ އެވެ.
ރާއްޖޭގައި އަދި މި ޕްރޮފެޝަންއަށް ވިލާ ކޮލެޖުން ނިކުމެގެން ދާ ކުދިންނަކީ ޕްރޮފެޝަނަލް މުޖުތަމައު ގަބޫލުކުރާ އެތިކަލް ސްޓޭންޑާޑްސް ތަކަށް ފެތިގެން މަސައްކަތް ކުރާ ކުދިބަޔަކަށް ވުމުގެ މުހިއްމުކަމާއި އަބަދުވެސް ދަސްކުރާ މީހަކަށްވުމުގެ އަޒުމް އޮންނަން ޖެހޭނެ ބަޔަކަށް ވުމަށް ޑރ. އަލީ ނަޖީބު އިލްތިމާސް ކުރެއްވި އެވެ.
