މާލެ ސިޓީ ކައުންސިލުގެ ސެކެރެޓަރީ ޖެނެރަލް (އެސްޖީ) ގެ މަގާމުގައި ހުންނެވި ވަޖީހު ނަސީރު އެ މަގާމުން ވަކިކުރުމަށް މިއަދު ބޭއްވި އެ ކައުންސިލުގެ ބައްދަލުވުމުގައި ފާސްކޮށްފި އެވެ.
މިއަދު އޮތް ކައުންސިލް ބައްދަލުވުމަށް އެސްޖީ މަގާމުން ވަކިކުރުމަށް ހުށަހެޅުއްވީ ޑެޕިއުޓީ މޭޔަރު އަހްމަދު ނަރީޝް އެވެ. މި މައްސަލައަކީ މީގެ ދެ ހަފްތާ ކުރިން ފޮނުވާފައި ވާ މައްސަލައެއް ކަމަށާއި މި މައްސަލަ މިއަދު އެޖެންޑާ ކުރަންޖެހޭނެ ކަމަށް ނަރީޝް ބައްދަލުވުމުގައި ވިދާޅުވި ކަމަށް ކައުންސިލުގެ އޮފިޝަލަކު މި ނޫހަށް މައުލޫމާތު ދެ އެވެ.
"މީގެ ދެ ހަފްތާކުރިން ހުށައެޅި މައްސަލައެއް މީ. މިއަދު ކޮންމެހެން މި މައްސަލަ އެޖެންޑާ ކުރަން ޖެހޭނެ ކަމަށް ބުނެ އެޖެންޑާ ކުރީ އެ. ޑެޕިއުޓީ މޭޔަރު އެޖެންޑާ ނުކުރީ ކީއްވެތޯ ސުވާލު ކުރުމުން މޭޔަރު ބުނި މިކަމަށް ޑިސްކަސް ކޮށްލަން ވަގުތު ބޭނުންވާ ކަމަށް," ކައުންސިލުގެ އޮފިޝަލު މައުލޫމާތު ދިނެވެ.
އެސްޖީ މަގާމުން ވަކިކުރުމަށް މައްސަލަ ހުށަހެޅީ ގާނޫނީ ޒިންމާ އަދާނުކުރެވޭ ކަމަށް ބުނެ އެވެ. އަދި ތަނުގެ މަސައްކަތް ނުހިނގާ ލަސްވާ ކަމަށާއި ކައުންސިލުގެ ބައެއް މުވައްޒަފުންނަށް ފިޔަވަޅު އަޅައިދޭން ބުނުމުން ނާޅާދޭ ކަންވެސް މި މައްސަލާގައި ފާހަގަކޮށްފައިވެ އެވެ. މާލެ ސިޓީ ކައުންސިލަށް ހުށައަޅާ ބިލުތަކަށް ލާރި ދޫނުކުރާ ކަމަށް ވެސް މި މައްސަލާގައި ބުނެފައިވެ އެވެ.
މިިކަމާއި ގުޅިގެން ވާހަކަ ދައްކަވަމުން ސިޓީ ކައުންސިލުގެ ގަލޮޅު އުތުރު ދާއިރާގެ ކައުންސިލަރު ސައިފް ފާތިހު އެ ބައްދަލުވުމުގައި ވިދާޅުވީ މި މައްސަލައަށް ލިޔުމުން ޖަވާބު ދިނުމުގެ ފުރަސަތު އެސްޖީއަށް ދޭން ވާނެ ކަމަށެވެ.
"އަޅުގަނޑުމެންގެ މިހުރި ހިތްހަމަ ނުޖެހުމަށް ލިޔުމުން ޖަވާބެއް އެރުވުމަށް ފުރުސަތު އެސްޖީއަށް ނަމަވެސް ދޭންޖެހޭނެ ކަމަށް އަޅުގަނޑު ގަބޫލުކުރަން" ސައިފް ވިދާޅުވި އެވެ.
އެސްޖީ ވަކިކުރީ މިއަދުގެ ބައްދަލުވުމުގައި ނެގި ވޯޓުގެ މެޖޯރިޓީންނެވެ. ނަމަވެސް މި ވޯޓުގައި ސައިފް އާއި މައްޗަންގޮޅި ދެކުނު ދާއިރާގެ މެންބަރު އައިޝަތު ނާޒިމާ ވޯޓުގައި ބައިވެރިވެފައި ނުވެ އެވެ.
