މާލެއަށް އިއްޔެ ބޯކޮށް ވާރޭވެހި ފެންބޮޑުވެ ރަށް ފެނު އަޑީގައި އޮއްވައި، ސިފައިން ފެން ހިންދަން ނުކުތީ މެންދުރު ފަހު ކަމަށް މައުލޫމާތު ލިބިއްޖެ އެވެ.
އިއްޔެ ހެނދުނުން ފެށިގެން މާލެއަށް ބޯކޮށް ދިޔައީ ވާރޭ ވެހެމުންނެވެ. ނަމަވެސް "އަދަދު" އަށް އެނގިފައިވާ ގޮތުގައި ސިފައިން ފެން ހިންދަން ނުކުމެފައި ވަނީ މެންދުރުފަހު 2:00 އާއި 3:00 އާ ދެމެދު އެވެ.
"މާލޭގައި މެންދުރު ފެން ހިންދަން ފެށި ކަމަށް ބެލެވެނީ. ޔަގީންކޮށް ބުނަން އެނގެނީ 2:45 ހާއިރު ހަ ސަރަހައްދެއްގައި އަށް ޕަމްޕް ބަހައްޓައިގެން ފެން ހިންދަމުން ދިޔަކަން،" އެންޑީއެމްއޭގެ އޮފިޝަލަކު ވިދާޅުވި އެވެ.
އިއްޔެ ޑިފެންސް މިނިސްޓަރު ގައްސާން މައުމޫން ވިދާޅުވީ ވިއްސާރައަށް އެމްއެންޑީއެފް އޮތީ ތައްޔާރުވެފައި ކަމަށެވެ. ނަމަވެސް ކުރީ ބައިގައި ފެން ހިންދުމުގެ މަސައްކަތް ނުކުރުމުން ގިނަ ބައެއްގެ ފާޑު ކިޔުން އަމާޒުވި އެވެ.
އިއްޔެ މޫސުން ގޯސް ވާނެ ކަމަށް ކުރީ ބައިގައި މެޓް އިން ލަފާކުރި އެވެ. އެއާއެކު ސްކޫލްތައް އިއްޔެ ބަންދު ނުކުރުމުން އެކަމަށް ވެސް ގިނަ ބައެއްގެ ފާޑު ކިޔުން އަމާޒުވި އެވެ.
މޫސުން މިއަދު ރަނގަޅަށް އޮތްއިރު މިއަދު ސަރުކާރު ބަންދު ކުރުމުން ވެސް އެކަމަށް ގިިނަ ބައެއްގެ ފާޑުކިޔުން ދަނީ އަމާޒުވަމުންނެވެ.
މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ބުނީ ފާއިތުވި 24 ގަޑިއިރު ތެރޭގައި އެންމެ ބޯކޮށް ވާރޭވެހުނީ މާލެއަށް ކަމަށެވެ. އެއީ 89.4 މިލިމީޓަރުގެ ވާރެ އެވެ.
ހުޅުލެއަށް 63.4 މިލިމީޓަރުގެ ވާރޭ ވެހުނު ކަމަށާއި ހުޅުމާލެއަށް 42.1 މިލިމީޓަރުގެ ވާރޭ ވެހުނު ކަމަށް ވެސް މެޓް އިން ބުނި އެވެ.
މާލެއަށް ޑިސެމްބަރު 5، 2018 ގައި 223 މިލިމީޓަރުގެ ވާރޭ ވެހުނުއިރު އެއީ މިހާތަނަށް އެންމެ ބޯކޮށް މާލެއަށް ވާރޭ ވެހުނު ދުވަހެވެ. އަދި ޑިސެމްބަރު 11، 1998 ގައި މާލެއަށް 200 މިލިމީޓަރުގެ ވާރޭ ވެހުނެވެ.
