ރައްޔިތުންގެ މަޖިލީހުގެ ހިތަދޫމެދު ދާއިރުގެ މެންބަރު އަހުމަދު އަޒާންގެ އަނބިކަނބަލުން އިންޑިއާއަށް ވަޑައިގަތުމުން އެ ގައުމުން ބޭރުކޮށްފި އެވެ.
މިދިޔަ އާދީއްތަ ދުވަހު އަޒާންގެ އަނބިކަނބަލުން އިންޑިއާގެ ކޮޗިންއަށް ވަޑައިގެންނެވިއިރު، އަޒާން ހުންނެވީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަން ޖައިޝަންކަރު ރާއްޖެއަށް ކުރެއްވި ރަސްމީ ދަތުރުގައި އައްޑޫ ސިޓީއަށް ވަޑައިގަންނަވާތީވެ، މަރުހަބާ ދެންނެވުމަށް އައްޑޫގަ އެވެ.
"އަދަދު" އަށް އެނގިފައިވާ ގޮތުގައި އަޒާންގެ އަނބިކަނބަލުން ކޮޗިންއަށް ވަޑައިގަތީ އާއިލާގެ ބޭފުޅަކު އޮޕަރޭޝަނެއް ކުރާތީ އެވެ. ނަމަވެސް އޭނާގެ ނަން އިންޑިއާގެ "ބްލެކް ލިސްޓެއްގައި" އޮތުމުން ގިނަ އިރުތަކެއް ވަންދެއް ކޮޗިންގެ އިމިގްރޭޝަންގައި ހިފެހެއްޓި އެވެ.
ކޮޗިންއަށް އެތެރެވުމަށް އަޒާންގެ އަނބިކަނބަލުންނަށް ހާއްސަ ހުއްދައެއް ދިނީ، އެންމެ އަވަހަށް އޮންނަ ޝެޑިއުލް ފްލައިޓަކުން ރާއްޖެ ފުރަން ޖެހޭ ގޮތަށް ކަމަށް މައުލޫމާތު އެނގޭ ބައެއް މީހުން "އަދަދު" ނޫހަށް ވިދާޅުވި އެވެ.
"އެހެންވެ، އިއްޔެ ހެނދުނު އޭނާ މާލެ އައީ،" މައުލޫމާތު ދިން މީހަކު ބުންޏެވެ.
އަޒާން ވިދާޅުވީ އަނބިކަނބަލުން އިންޑިއާއިން ބޭރުކުރީ ނޫން ކަމަށާއި ކޮޗިންގެ އިމިގްރޭޝަނުން ކަންކަން ކުރި ގޮތުން، އަނބުރައި ގެންނަން ބޭނުންވީ ކަމަށެވެ.
"[އަންހެނުން އިންޑިއާ އަށް] ނުވައްދަން އުޅުނު، އެކަމަކު ވެއްދި. [އެހެންވެ] މަ ބޭނުން ނުވީ ދެން އެތާ ހުންނަން، އެހެން ހެދީމަ. އަހަރެން ބުނެގެން [އަންހެނުން] އައީ،" އަޒާން ވިދާޅުވި އެވެ.
އަޒާންއަކީ ރާއްޖޭގައި ގާއިމުވެފައި އޮތް އިންޑިއާގެ އަސްކަރިއްޔާ އަނބުރައި ފޮނުވާލުމަށް "އިންޑިއާ އައުޓު" ގެ ނަމުގައި އެންމެ ފުރަތަމަ ކެމްޕޭނު ހިންގި އެކަކެވެ. އެ ކެމްޕޭނުގައި އިސްކޮށް އުޅުނު ފަރާތްތަކާއި އެފަދަ ބައެއް މީހުންގެ އާއިލާގެ ބައެއް މެންބަރުންނަށް އިންޑިއާ އަށް ދިޔުމުން އަނބުރައި ފޮނުވާލާފައިވެ އެވެ.
