އިންޑިއާގެ އެހީގައި ރާއްޖޭގެ އިތުރު 1،000 ސިވިލް ސާވަންޓުން ތަމްރީންކުރުމުގެ އެއްބަސްވުން އާކޮށް، ނެޝަނަލް ސެންޓާ ފޯ ގުޑް ގަވަނަންސް އެންޑް ސިވިލް ސާވިސެސް ކޮމިޝަންއާއެކު ރާއްޖޭގެ ސިވިލް ސާވިސް ކޮމިޝަނުން އެމްއޯޔޫއެއްގައި ރޭ ސޮއިކޮށްފި އެވެ.
އެ އެމްއޯޔޫގައި ސޮއިކުރީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރާއްޖެއަށް ކުރައްވާ ރަސްމީ ދަތުރުގެ ތެރެއިން ފޮރިން މިނިސްޓްރީގައި ރޭ ބޭއްވި ރަސްމިއްޔާތެއްގަ އެވެ.އެމްއޯޔޫގައި ރާއްޖޭގެ ފަރާތުން ސޮއިކުރެއްވީ ސިވިލް ސާވިސް ކޮމިޝަންގެ ރައީސް މުހައްމަދު ނާސިހް އެވެ. އަދި އިންޑިއާގެ ފަރާތުން ސޮއިކުރެއްވީ އިންޑިއާއިން ރާއްޖެއަށް ކަނޑައަޅާފައިވާ ސަފީރު މުނޫ މަހާވަރު އެވެ.
"މި އެމްއޯޔޫގެ ދަށުން ސިވިލް ސާވަންޓުން ތަމްރީން ކުރުމުގެ އެއްބަސްވުން އާކުރެވިގެން މި ދިޔައީ. މި ޕްރޮގްރާމުގެ ދަށުން އިތުރު ހަރުފަތްތަކަށް ދެވޭނެ ކަމަށް އުންމީދުކުރަން،" އެ ރަސްމިއްޔާތުގައި ނޫސްވެރިންނަށް މައުލޫމާތު ދެއްވަމުން ޖައިޝަންކަރު ވިދާޅުވި އެވެ.
ސިވިލް ސާވިސް ކޮމިޝަނުން ބުނީ މި އެމްއޯޔޫގެ ސަބަބުން މުވައްޒަފުންނަށް ގިނަ ކުރިއެރުންތައް ލިބިގެންދާނެ ކަމަށެވެ.
އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް 2019 ގައި ކުރެއްވި ދަތުރުފުޅުގައި ވެސް 1،000 މުވައްޒަފުން ތަމްރީން ކުރުމަށް އެމްއޯޔޫއެއްގައި ސޮއިކުރި އެވެ. އެ އެމްއޯޔޫގެ ދަށުން ގިނަ އަދަދެއްގެ މުވައްޒަފުން މިހާތަނަށް ވަނީ އިންޑިއާގައި ތަމްރީން ފުރިހަމަކޮށްފަ އެވެ.
އެ ރަސްމިއްޔާތުގައި އިންޑިއާގެ އެހީގައި ކުޅުދުއްފުށި ރީޖަނަލް ހޮސްޕިޓަލުގައި ސްޕީޗް ތެރަޕީ ޔުނިޓް ގާއިމު ކުރުމާއި ރ. އުނގޫފާރު ރީޖަނަލް ހޮސްޕިޓަލުގައި މެންޓަލް ހެލްތު ޔުނިޓް ގާއިމުކުރުމުގެ މަޝްރޫއުގެ ނިންމުން ވަނީ ފާހަގަކޮށްފަ އެވެ.
މީގެއިތުރުން ގދ.ތިނަދޫ އަބޫބަކުރު ސްކޫލާއި އިހައްދޫ ސްކޫލާއި ހއ އެޑިއުކޭޝަން ސެންޓަރުގައި އިންކްލޫސިވް އެޑިއުކޭޝަން ސަޕޯޓް (އައިއީއެސް) ޔުނިޓް ގާއިމުކުރުމާއި ތ. ތިމަރަފުށި، ތ. ވޭމަންޑޫ، ގއ. ކޮނޑޭގައި މަގުބައްތި ހަރުކުރުމުގެ މަޝްރޫއު ނިންމުން ވަނީ ފާހަގަކޮށްފަ އެވެ.
