ކުރީ ސަރުކާރުން އިންޑިއާއާއެކު ހެދި އެއްބަސްވުންތައް ހާމަކުރަންވީ ވައުދު ނުފުއްދައި، މި ސަރުކާރުންވެސް އެ ގައުމާއެކު އާ އެއްބަސްވުންތަކެއްގައި ސޮއިކުރަން ނިންމައިފި އެވެ.
މީހުން ބިނާކުރުމާއި ވިޔަފާރީގެ ދާއިރާއިން އިންޑިއާއާއެކު އެއްބަސްވުންތަކެއްގައި ސޮއިކުރަން ނިންމާފައިވަނީ އެ ގައުމުގެ އެކްސްޓާނަލް މިނިސްޓަރު ސުބްރަމާނިއަމް ޖައިޝަންކަރު މާދަމާއިން ފެށިގެން އާދިއްތަ ދުވަހުގެ ނިޔަލަށް ރާއްޖެއަށް ކުރައްވާ ރަސްމީ ދަތުރުގަ އެވެ.
މި ދަތުރުގައި ދެ ގައުމުގެ ދެމެދު އެމްއޯޔޫ ތަކެއްގައި ސޮއިކުރާނެ ކަމަށް ފޮރިން މިނިސްޓްރީން މިއަދު ނެރުނު ބަޔާނުގައި ބުނި ނަމަވެސް އެއްބަސްވުންތަކުގެ އަދަދެއް ނުބުނެ އެވެ.
ވެރިކަންކުރާ ޕީއެންސީއިން އިދިކޮޅުގައި އޮތް ފަސް އަހަރު، ނިމިދިޔަ އެމްޑީޕީގެ ސަރުކާރަށް އެންމެ ބޮޑަށް ފާޑުކީ އިންޑިއާއާއެކު ހެދި އެއްބަސްވުންތަކާ ގުޅުވައިގެންނެވެ. ރައީސް ޑރ. މުހައްމަދު މުއިއްޒުގެ ރިޔާސީ ކެމްޕޭނުގައިވެސް އެންމެ ހަރުއަޑުން ނުރުހުން ފާޅުކުރެއްވީ މި އެއްބަސްވުންތަކާ ބެހޭގޮތުންނެވެ. އެއީ "އަޑި ނޭނގޭ އެއްބަސްވުންތަކެއް" ކަމަށް ވެސް އޭރުގެ އިދިކޮޅުން ސިފަކުރި އެވެ.
އެމަނިކުފާނު ވެރިކަމަށް ވަޑައިގެންނެވިތާ ދެވަނަ ދުވަހު ސަރުކާރުން ވަނީ، މިދިޔަ ފަސް އަހަރުގައި ރާއްޖެއިން އިންޑިއާ އާއެކު 100 އަށްވުރެ ގިނަ އެއްބަސްވުން ހަދާފައިވާ ކަމަށް ބުނެފަ އެވެ.
ނޮވެމްބަރު 19، 2023، ގައި ރައީސް އޮފީހުގެ އަންޑާ ސެކެރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް ނޫސްވެރިންނާ ބައްދަލުކުރައްވާ ވިދާޅުވީ، އެ ހުރިހާ އެއްބަސްވުންތަކެއް ސަރުކާރުން ދިރާސާ ކުރާނެ ކަމަށެވެ.
"އެއްބަސްވުންތަކުގައި ސިޔާދަތަށް އުނިކަން ލިބޭ ގޮތަށް ހުރި މާއްދާތައް ހާމަ ކުރާނަން، އެހެންނަމަވެސް މީގެ ތެރޭގައި ހުންނާނެ އަސްކަރީ އެކިއެކި ޓެކްނިކަލް ޑީޓެއިލްތަކާ ގުޅޭ ކަންތައްތައް،" އެދުވަހު އޭނާ ވިދާޅުވި އެވެ.
ނަމަވެސް މިއަދާ ހަމައަށްވެސް އިންޑިއާއާއެކު ހަދާފައިވާ އެއްބަސްވުމެއް ހާމަކޮށްފައެއް ނުވެ އެވެ. އެ ގައުމާއެކު ހަދާފައިވާ ހައިޑްރޮގްރަފީ އެއްބަސްވުން ބާތިލުކުރަން ނިންމިއިރު އެ އެއްބަސްވުންވެސް ހާމައެއް ނުކުރެ އެވެ.
ސަރުކާރުން ބުނި ގޮތަށް އެއްބަސްވުންތައް ހާމަކުރަމުން ނުދާތީ މިހާރު އިދިކޮޅުގައި އޮތް އެމްޑީޕީންވެސް ދަނީ ފާޑުކިޔަމުންނެވެ. އެ ޕާޓީން ބުނާގޮތުގައި ސަރުކާރަށް އެކަން ކުރަން ނުކެރެނީ އެއްބަސްވުންތަކުގައި ގޯހެއް ނެތީމަ އެވެ.
"ރައްޔިތުންގެ ހިތުގައި ބިރުވެރިކަން އިތުރު ކުރުމަށްޓަކާ ދެން ވިދާޅުވި ވާހަކައަކީ ސަތޭކަ އެތައް އެގްރީމެންޓެއް އެބައޮތޭ އިންޑިއާއާ އެކީގައި ވެފަ، އޭގަ އެބަހުއްޓޭ އެތައް މާއްދާތަކެއް، މިނިވަންކަމާއި ސިޔާދަތައް ގެއްލުން ލިބޭ، އެހެންވީމަ އެ އެއްޗެހި މި ދަނީ ދިރާސާ ކުރަމުންނޭ، ނޯންނާނެއޭ، މި ދިވެހިރާއްޖޭގެ އެންމެ ވެލިފުކަކަށްވެސް، އެންމެ ވެލިފުކަކަށްވެސް ގެއްލުން ލިބިދާފަދަ އެގްރީމެންޓެއް އެމްޑީޕީގެ ސަރުކާރުގަ، ރައީސް އިބްރާހިމް މުހައްމަދު ސޯލިހުގެ ސަރުކާރުގެ ވެވަޑައިގެންފައެއް ނޯންނާނެ"
ޖެނުއަރީ 11، ގައި އެމްޑީޕީގެ ރައީސް އަދި އެ ޕާޓީގެ ވެރިކަމުގައި ފޮރިން މިނިސްޓަރުކަން ކުރެއްވި އަބްދުﷲ ޝާހިދު ވިދާޅުވި އެވެ.
