ޕަބްލިކް ސާވިސް މީޑިއާ (ޕީއެސްއެމް) ގެ އިމާރާތް ހުރި ބިން އެ ކުންފުނީގެ ނަމަށް ރަޖިސްޓަރީ ކޮށްދޭން މާލެ ސިޓީ ކައުންސިލުގައި ރައީސް އޮފީހުން އެދިއްޖެ އެވެ.
ކައުންސިލުގެ ހަތަރު ވަނަ ދައުރުގެ 157 ވަނަ ޖަލްސާގައި މޭޔަރު އާދަމް އާޒިމް ވިދާޅުވީ ޕީއެސްއެމް އިމާރާތް ހުރި ބިން އެތަނަށް ރަޖިސްޓްރީ ކޮށްދޭން ރައީސް އޮފީހުން އެދިފައިވަނީ އެ ކުންފުނިން އާ އިމާރާތެއް އެޅުމަށް ކަމަށެވެ.
މިހާރު އެ ބިން އޮތީ ކައުންސިލުގެ ނަމުގައި ކަމަށާއި ކައުންސިލުގެ ނަމުގައި އެ ބިން އޮތުމުން އެތަނުގައި އިމާރާތުގެ މަސައްކަތް ކުރެވެން ނެތުމުން ކަމަށް ރައީސް އޮފީހުން ބުނެފައިވާ ކަމަށް ވެސް މޭޔަރު ވިދާޅުވި އެވެ.
ރައީސް އޮފީހުން ސިޓީ ކައުންސިލަށް މިކަން އަންގަވައިފައި ވަނީ އީމެއިލް މެދުވެރިކޮށެވެ. އެހެންކަމުން ރަސްމީކޮށް އެ ސިޓީ އަލުން ހުށައަޅަން ރައީސް އޮފީހަށް އެންގުމަށް ނިންމައިފައިވާ ކަމަށް ވެސް މޭޔަރު ވިދާޅުވި އެވެ.
ޕީއެސްއެމްގައި އިމާރާތްކުރާ ތިން ބުރީގެ އިމާރާތެއް ކުރަހައި އަދި ބީއޯކިއު ހަދައިދޭނެ ބަޔަކު ހޯދަން މިދިޔަ މަހު އޮތީ އިއުލާނުކޮށްފަ އެވެ. މި އިއުލާނުގެ މުއްދަތުވަނީ މިދިޔަ މަހުގެ 30 ހަމަވެފަ އެވެ.
