މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އެސިސްޓަންޓު ގަވަރުނަރުގެ އުވާލައި އެ މަގާމުގައި ތިބި މީހުން އެޑްވައިޒަރުންގެ މަގާމާށް ޕްރޮމޯޓުކޮށްފި އެވެ.
އެމްއެމްއޭގެ އޮފިޝަލަކު "އަދަދު" އަށް ވިދާޅުވީ މިއީ ޒަމާނީ ސެންޓްރަލް ބޭންކަކަށް އަދި ހެޔޮ ނަތީޖާ ނެރޭ ބޭންކަކަށް އެމްއެމްއޭ ހެދުމަށްޓަކައި އޮނިގަނޑަށް ގެނައި ބަދަލުތަކެއް ކަމަށެވެ. މި ބަދަލުތަކުގެ ސަބަބުން އެމްއެމްއޭ އިން ކުރަމުންދާ މަސައްކަތްތައް މިހާރަށްވުރެ ހަރުދަނާވެ، ހެޔޮ ނަތިޖާތަކެއް ނެރުމަށް ފަސޭހަވާނެ ކަމަށް ވެސް އޮފިޝަލު ވިދާޅުވި އެވެ.
އެމްއެމްއޭގެ އެސިސްޓެންޓް ގަވަރުނަރުގެ މަގާމު އުވާލައި އޭގެ ބަދަލުގައި އުފެއްދީ މެނޭޖިން ޑިރެކްޓަރުގެ މަގާމެކެވެ. އަލަށް އުފެއްދި މެނޭޖިން ޑިރެކްޓަރުގެ މަގާމަށް ފަސް މީހަކު އައްޔަން ކުރާނެ އެވެ. އެ މަގާމުގެ ދައުރަކީ ފަސް އަހަރު ކަމަށާއި އެކަކަށް އެ މަގާމުގައި ހުރެވޭނީ ގިނަވެގެން ދެ ދައުރަށް ކަމަށް ވެސް އެމްއެމްއޭގެ އޮފިޝަލު ވަނީ މައުލޫމާތު ދެއްވާފަ އެވެ.
އެމްޑީންގެ މަގާމަށް ކުރިމަތިލުމުގެ ފުރުސަތު އެމްއެމްއޭގެ މުވައްޒަފުންނަށާއި އާންމުންނަށް ވެސް ހުޅުވާލަން އެ ބޭންކުން ވަނީ ނިންމާފަ އެވެ.
"މީގެ ސަބަބުން އެމްއެމްއޭގައި މިހާރު ތިބި ގާބިލު ފަރާތްތަކަށް އާ ފުރުސަތުތައް ހުޅުވިގެންދާނެ. އަދި ފަންނީ ގާބިލު މީހުންނަށް އެމްއެމްއޭ އަށް ވަނުމަށް ވެސް ފުރުސަތު ހުޅުވިގެންދާނެ،" މި ނޫހާ ވާހަކަ ދެއްކި އޮފިޝަލު ވިދާޅުވި އެވެ.
އެމްއެމްއޭގެ އޮނިގަނޑަށް ބޮޑު ބަދަލެއް ގެންނަން ނިންމާފައި މިވަނީ މަގާމުގެ މަސްއޫލިއްޔަތުތައް ރަނގަޅަށް އަދާނުކުރާ ކަމަށް ބުނެ ގަވަރުނަރުގެ ގޮތުގައި ހުންނެވި އަލީ ހާޝިމް އެ މަގާމުން ވަކިކުރަން ރައީސް ނިންމަވާ އާ ގަވަރުނަރުގެ ގޮތުގައި ކުރީގެ ފިނޭންސް މިނިސްޓަރު އަހުމަދު މުނައްވަރު އައްޔަން ކުރައްވާފައި ވަނިކޮށެވެ.
