މޫސުން ގޯސްވެ ކަނޑު ގަދަވުމުގެ ސަބަބުން ތިމަރަފުށީ ގޮނޑުދޮށަށް ސަފާރީއެއް އުރި، ކަނޑުމަތީގައި އިތުރު ހާދިސާތަކެއް ހިނގައިފި އެވެ.
އެމްއެންޑީއެފް އިން ބުނީ ދެކުނުގެ އަތޮޅުތަކަށް މޫސުން ގޯސްވެ ކަނޑުމަތީގެ ހާދިސާތަކެއް ހިނގައިފައިވާ ކަމަށެވެ. އަދި މި ހާދިސާތަކާ ގުޅިގެން އެމްއެންޑީއެފް ސެންޓްރަލް އޭރިއާ ކޮމާންޑް، ކޯސްޓްގާޑުގެ ތާޑް ސްކޮޑްރަންއިން ހަރަކާތްތެރިވަމުން ދާ ކަމަށެވެ.
އެމްއެންޑީއެފްއަށް ރިޕޯޓު ލިބުނު އިތުރު ހާދިސާތައް
- ލ. ހިތަދޫ 11 މޭލު ދުރުން ދޯނީގެ އިންޖީނަށް މައްސަލައެއް ދިމާވުން
- ލ. ހިތަދޫ 23 މޭލު ދުރުން ދޯންޏެއް ދިޔަވުން
- ތ. އަތޮޅުގެ މުދާ އުފުލާ ބޯޓެއް ދިޔަވުން
- ބާޖެއްގެ ވާ ކެނޑުން
އެމްއެންޑީއެފްއިން މި ހާދިސާތަކާ ގުޅޭ އިތުރު ތަފުސީލެއް ނުދެ އެވެ. ނަމަވެސް މިހާތަނަށް ރިޕޯޓުކުރި އެއްވެސް ހާދިސާއެއްގައި އެއްވެސް މީހަކަށް ހާނިއްކައެއް ނުވާ ކަމަށް އެ އިދާރާއިން ބުނެފައިވެ އެވެ.
މޫސުން ގޯސްވުމާ ގުޅިގެން މެޓް އޮފީހުން ވަނީ ކަނޑު ދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށާއި ދަތުރުކުރާއިރު މޫސުމާ ބެހޭ އެންމެ ފަހުގެ މައުލޫމާތު ހޯދުމަށް އިލްތިމާސްކޮށްފަ އެވެ.
މެޓް އޮފީހުން ވަނީ ތ. އަތޮޅުން ފެށިގެން ގދ. އަތޮޅަށް ބޯކޮށް ވާރޭވެހި ގުގުރާނެ ކަމަށާއި އަދި ވިލާގަނޑުގައި ގާތްގަނޑަކަށް 40 މޭލަށް ވައިގަދަވާނެ ކަމަށް ލަފާކޮށް ވައިޓް އެލާޓެއް ނެރެފަ އެވެ.
