ރައްޔިތުންގެ މަޖިލީހުގެ މިއަދުގެ ޖަލްސާއަށް އެޖެންޑާކުރި ދެ ރިޕޯޓަށް ވެސް ބަހުސްކުރާނެ މެންބަރެއް ނެތުމާއި ސުވާލުކުރަން އެޖެންޑާކުރި ވަޒީރު މަޖިލީހަށް ވަޑައިނުގަތުމުން، ކުރާނެ މަސައްކަތެއް ނެތި، ފެށިތާ އެންމެ 10 މިނެޓްގެ ތެރޭގައި ޖަލްސާ މެދުކަނޑާލައިފި އެވެ.
މަޖިލީހުގެ މިއަދުގެ ޖަލްސާގެ އެޖެންޑާގައި ފުރަތަމަ ކަމަކަށް އޮތީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ހައުސިން މިނިސްޓަރު ޑރ. އަލީ ހައިދަރާ ސުވާލުކުރުމެވެ. އެޖެންޑާގެ އެ ނަންބަރު ކުރިއަށް ނުގެންދެވުނީ "އާއިލީ، ކުއްލިކަމެއް" ދިމާވެގެން ކަމަށް ވިދާޅުވެ، މިނިސްޓަރު ވަޑައިނުގެންނެވުމުންނެވެ.
މިއަދުގެ އެޖެންޑާގައި މެންބަރުން ބަހުސްކުރަން އޮތީ މަޖިލީހުގެ ދާއިމީ ކޮމިޓީތަކުން ހުށަހެޅި ދެ ރިޕޯޓަކަށެވެ. ފުރަތަމަ ރިޕޯޓަކީ ކޮމިއުނިކޭޝަން އޮތޯރިޓީގެ އޮޑިޓު ރިޕޯޓްތައް ދިރާސާކޮށް މާލިއްޔަތު ކޮމިޓީން އެކުލަވައިލި ރިޕޯޓެކެވެ.
މާލިއްޔަތު ކޮމިޓީގެ މުގައްރިރު އަދި މަޖިލީހުގެ މާމިނގިލި ދާއިރާގެ މެންބަރު ގާސިމް އެ ރިޕޯޓު ތަޅުމަށް ހުށަހެޅުއްވުމުން އެ ރިޕޯޓަށް ބަހުސްކުރަން ރިޔާސަތުން ހުޅުވައިލި ފުރުސަތު އެެއްވެސް މެމްބަރަކު ބޭނުމެއް ނުކުރައްވަ އެވެ.
ދެވަަނައަށް އޮތީ ފެމިލީ ޕްރޮޓެކްޝަން އޮތޯރިޓީގެ އޮޑިޓު ރިޕޯޓުތައް ދިރާސާކޮށް މާލިއްޔަތު ކޮމިޓީން އެކުލަވައިލި ރިޕޯޓެވެ. އެ ރިޕޯޓަށް ވެސް ބަހުސްކުރާނެ މެންބަރަކު މަތި ނުވުމުން ރިޔާސަތުން މަޖިލީހުގެ ރައީސް އަބްދުއްރަހީމް އަބްދުﷲ ނިންމެވީ ޖަލްސާ މެދުކަނޑައިލެއްވުމަށެވެ.
އެހެން ނަމަވެސް އެމަނިކުފާނު ފުރަތަމަ އިއްވެވީ މަޖިލީހުގެ ކޮމިޓީތަކުން މިއަދު ބާއްވާ ބައްދަލުވުންތަކުގެ ލިސްޓެވެ.
"އެހެންވީމާ ކޮމެޓީތަކުގެ މަސައްކަތަށް ޖާގަދިނުމުގެ ގޮތުން، މި ހާ ހިސާބުން މި ދަންފަޅީގެ މަސައްކަތް ނިންމައިލާނަން، ނިންމައިލާފައި ދެން އަޅުގަނޑުމެން މަސައްކަތް ފަށްޓާނީ 11:00 ޖަހާއިރު،" އަބްދުއްރަހީމް ވިދާޅުވި އެވެ.
މިއަދުގެ ޖަލްސާގެ ދެވަނަ ދަންފަޅީގައި ވެސް މެންބަރުން ކުރައްވާނެ ބަހުސެއް ނެތެވެ. ހަމަ އެކަނި އޮތް ކަމަކީ ވޯޓަށް އަހާ ހިސާބަށް ގޮސްފައިވާ ކަންތައްތަކަށް ވޯޓަށް އެހުމެވެ. އެއީ މިއަދު ބަހުސްކުރާނެ މެންބަރަކު ނެތުމުން، ބަހުސް ނިމިފައިވާ ދެ ރިޕޯޓް ފާސްކުރުމާ މެދު ގޮތެއް ނިންމުމެވެ.
މަޖިލީހުގެ މިއަދުގެ ޖަލްސާގައި ކުރާނެ ބަހުސެއް ނެތް އިރު، މަޖިލީހުގެ ހާޒިރީ ވެސް ދަށެވެ. ޖުމްލަ 93 މެންބަރުން ތިއްބަވާ އެ މަޖިލީހުގެ މިއަދުގެ ޖަލްސާއަށް ވަޑައިގެންނެވީ އެންމެ 50 މެންބަރުންނެވެ. ސަލާމުގައި ތިއްބެވީ އެންމެ ދެ މެންބަރުންނެވެ. އެހެން ކަމުން 41 މެންބަރަކު މިއަދު ވަޑައިނުގެންނެވީ ވަކި ސަބަބެއް ވެސް ނާންގަވަަ އެވެ.
