ހޯމް މިނިސްޓަރު އަލީ އިހުސާންގެ އާއިލާއިން ހިންގާ ހެޕީމާކެޓު ކުންފުނީގެ ވެހިކަލެއް ފުލުހުން ޓޯކުުރުމުން އެއީ އެންމެންގެ މައްޗަށް ގާނޫނު ހިނގާނެ ކަން ދައްކުވައިދޭ ކަމެއްގެ ގޮތުގައި ހޯމް މިނިސްޓަރު އަލީ އިހުސާން ސިފަކުރައްވައިފި އެވެ.
ފުލުހުން ގޮސް ހެޕީމާކެޓުގެ ވެހިކަލެއް ޓޯކުރާ މަންޒަރު ފެންނަ ފޮޓޯއަކާއެކީ، ހޯމް މިނިސްޓަރުގެ ރަސްމީ އެކްސް އެކައުންޓުން ކުރި ޕޯސްޓުގައި މިނިސްޓަރު އިހުސާން ވިދާޅުވީ އެންމެންގެ މައްޗަށް ގާނޫނު ހިންގުމަކީ ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ގޮތް ކަމަށެވެ.
"ރައީސުލްޖުމްހޫރިއްޔާ މުއިއްޒު އަންގަވާފައިވަނީ ގާނޫނު ތަންފީޒު ކުރުމުގައި ވަކި މީހެއް އިސްތިސްނާ ނުވަތަ ހާއްސަ ނުކުރުމަށް، އެންމެނަށް ވެސް ހަމަހަމަކޮށް ގާނޫނު ތަންފީޒު ކުރުމަށް، ފުލުހުން އަދި އެހެން ތަންފީޒީ އިދާރާތަކުން ވެސް އެ ގޮތުގައި ރާއްޖޭގެ ގާނޫނުތައް ތަންފީޒު ކުރާނެ،" އިހުސާން ލިޔުއްވާފައިވެ އެވެ.
ހެޕީމާކެޓަކީ އިހުސާންގެ ބަފައިބެގެ ކުންފުންޏެކެވެ. އެ ވިޔަފާރި ހިންގެވުމުގައި އިސްކޮށް އޭނާ ވެސް އުޅުއްވާފައިވެ އެވެ. ވަޒީރު ކަމާ ހަވާލުވެވަޑައިގަތުމާ ހަމައަށް އޭނާ ހުންނެވީ އެ ކުންފުނީގެ އިސްމަގާމެއްގަ އެވެ. ކުންފުނިތަކުގެ މަގާމު ފުރުމާއި ވިޔަފާރި ކުރުމަކީ ވަޒީރުންނަށް މަނާ ކަމެކެވެ.
