ނިސްބަތުން ބަލާއިރު، ކުރު މުއްދަތެއްގެ ތެރޭގައި، ބޮޑެތި ކުރިއެރުންތަކެއް ހޯދައި، ގިނަ ގައުމީ ރެކޯޑްތަކެއް މުގުރާލުމަށް ފަހު، އައިޝަތު އުލްޔާ ޝާއިގު، މި ފަހަރުގެ ޕެރިސް އޮލިމްޕިކްސްގެ ފުރުސަތު ހޯދުމަކީ އިބްރަތްތަކެއް ހޯދޭނެ ކަމެކެވެ. ނިކަން ބޮޑު ހިތްވަރެއް ދައްކައި، އެތުލީޓެއް ކެނޑިނޭޅި ކުރި މަސައްކަތެއްކަން ސާފެވެ. އެހެންކަމުން، މިއީ، އުލްޔާ ދެކޭ ގޮތުގައި، އޭނާ އަށް ލިބުނު އެންމެ ބޮޑު ޝަރަފެެކެވެ.
"ވަރަށް އުފަލުން މި ހުރީ އޮލިމްޕިކްސްގައި ރާއްޖެ ތަމްސީލް ކުރަން ލިބުނީމަ. ވަރަށް ބޮޑަށް ޝުކުރު އަދާކުރަން މައިންބަފައިންނާއި ކޯޗުންނަށް. ދެން، އެމްއެލްއޭ (މޯލްޑިވްސް ލައިފްގާޑް އެސޯސިއޭޝަން)ގެ ފެތުންތެރިންނަށް ވެސް ފާހަގަކުރަން. އުމުރުން އަށް އަހަރުން ފެށިގެން 21 އަހަރާ ހަމައަށް އަހަރެން ކުރިއަރުވަން ކުރި މަސައްކަތަށް ވެސް ޝުކުރުވެރިވަން. އެ މީހުން އެންމެ ފުރަތަމަ ދުވަހުން ފެށިގެން ވެސް އެންމެ ބޮޑު ސަޕޯޓަކީ،" މޯލްޑިވްސް ލައިފްގާޑް އެސޯސިއޭޝަނުން (އެމްއެލްއޭ އިން) އާންމުުކުރި ވީޑިއޯ އަކަށް ދިން އިންޓަވިއުއެއްގައި އުލްޔާ ބުންޏެވެ.
މާލޭގައި ފުރިހަމަ ކުރި ޓްރެއިނިންއެއްގެ ތެރެއިން އުލްޔާ.--- ފޮޓޯ: ސްވިިމިން އެސޯސިއޭޝަން އޮފް މޯލްޑިވްސް / އިސްމާއިލް ތޯރިގު
އޮސްޓްރޭލިއާގައި ފެތުމުގެ ޓްރެއިނިންތައް ހަދައި، ކެރިއަރެއް ބިލްޑް ކުރަން މަސައްކަތް ކުރަމުން އަންނަ އުލްޔާ އަށް މި ފަަހަރުގެ އޮލިމްޕިކްސް އިން ފުރުސަތު ލިބުނު އެންމެ ބޮޑު ސަބަބަކީ، މިދިޔަ ފެބްރުއަރީ މަހު ފިލިޕީންސްގައި ބޭއްވި އޭޝިއަން އޭޖް ގުރޫޕް މުބާރާތުގައި 50 މީޓަރު ފްރީސްޓައިލް އިވެންޓް، 29.29 ސިކުންތުން ނިންމައި، ގައުމީ ރެކޯޑަކާ އެކު، ހޯދި ޕޮއިންޓްތަކެވެ.
މި ފަހަރުގެ އޮލިމްޕިކްސް އަށް ރާއްޖޭގެ ހަތަރު ކުޅިވަރަކުން އެތުލީޓުން ދިޔައިރު، އެންމެ ފަހުން އިއުލާނުކުރީ ފެތުމުގެ އެތުލީޓުންނެވެ. އެ ގޮތުން، އުލްޔާ އަށް އޮލިމްޕިކްސްގެ ފުރުސަތު ލިބުނުކަން އެނގުނީ، މިދިޔަ ޖޫން މަހު ސިންގަޕޫރުގައި ބޭއްވި މުބާރާތަށް ފަހު އެވެ. އެ މުބާރާތަށް ދިޔައިރު، އަންހެން ދެ އެތުލީޓެއްގެ މެދުގައި އޮލިމްޕިކްސް އަށް ދިއުމުގެ ފުރުސަތުގެ ވާދަވެރިކަން އޮތެވެ.
"އޮލިމްޕިކްސް ޓީމުގައި ހިމެނޭކަން އެނގުނީ ޖޫން މަހުގެ ތެރޭގައި. އެއީ ސިންގަޕޫރުގައި ކުރިއަށްދިޔަ މުބާރާތަށް ފަހު. ވަރަށް ބޮޑު ހިތްހަމަޖެހުމެއް ލިބުނު އިހުސާސް ކުރެވުނީ ޓީމުގައި ހިމެނޭކަން އެނގުނީމަ،" އުލްޔާ ބުންޏެވެ.
އޮލިމްޕިކްސްގެ ކުރިން އުލްޔާ މި ވަނީ މަހެއްގެ ތެރޭގައި، ގައުމީ ރެކޯޑް ދެ ފަހަރެއްގެ މަތިން މުގުރާލައިފަ އެވެ. އެ ހިތްވަރަށް، ސްޕޯޓްސް މިިނިސްޓަރު، އަބްދުﷲ ރާފިއު (ރާއްޕެ) ވަނީ ތައުރީފުކުރައްވައިފަ އެވެ.
އޮސްޓްރޭލިއާގައި ކުރިއަށްދިޔަ ބްރޭކާސް ބިގް ސްޕްލޭޝް، ޖޫން 2024 މީޓް ގައި 50 މީޓަރު ފްރީސްޓައިލް އިވެންޓުގައި އުލްޔާގެ ޓައިިމިން އަކީ 28.81 ސިކުންތެވެ. އެއީ ގައުމީ ރެކޯޑެކެވެ. އެ ރެކޯޑް މުގުރާލީ، ޖުލައި މަހު، އޮސްޓްރޭލިއާ ގައި ކުރިއަށްދިޔަ ދި ޔުނިވާސިޓީ އޮފް ވެސްޓާން އޮސްޓްރޭލިއާ (ޔޫޑަބްލިއުއޭ) ވެސްޓް ކޯސްޓް ކްލަބް ނައިޓް ނަންބަރު 7 މީޓްގައި 28.75 ސިކުންތުން ރޭސް ނިންމައިގެންނެވެ.
އަށް ވަރަކަށް އަހަރު މުގުރާނުލެވި އޮތް ރެކޯޑެއް އެއް މަސް ތެރޭ ދެ ފަހަރަށް މުގުރާލުމަށް ފަހު އުލްޔާ، މިއަދު މެންދުރު ފަހު، ދުނިޔޭގެ އެންމެ ބޮޑު ކުޅިވަރު ހަރަކާތް، އޮލިމްޕިކްސްގައި ވާދަކުރާނެ އެވެ.
މިހާ ހިސާބަށް ކުރި ދަތުރުން އުލްޔާގެ ހިތްވަރު ޔަގީނުން ވެސް ފެނިއްޖެ އެވެ. އޮލިމްޕިކްސް އަކީ އޭނާ އަށް ބޮޑު ޝަރަފެކެވެ.
"ކުޑައިރުގައި ވެސް އެނގިފައި އޮތް ގޮތުން، އޮލިމްޕިކްސް އަކީ ދުނިޔޭގެ އެންމެ ބޮޑު ކުޅިވަރުގެ މުބާރާތް، ފެތުމުގައި ވެސް. ހަމަ ގިނަ ގައުމުތައް ވަރަށް ވަރުގަދަ އަށް ވާދަކުރާނެ. ވަރަށް އުފާކުރަން ދުނިޔޭގެ އެންމެ ވަރުގަދަ އެތުލީޓުންނާ އެއް ހަމައެއްގައި ވާދަކޮށްލަން ލިބޭތީ،" އޮލިމްޕިކްސްއާ ބެހޭގޮތުން މިއީ، އުލްޔާގެ ވިސްނުމެވެ.
