ރާއްޖޭގައި އަރަމުން އަންނަ އެހެން އެތުލީޓުންނެކޭ އެއްގޮތަށް، މުހައްމަދު އާން ހުސެއިން ވެސް، ގައުމީ ފެތުންތެރިންގެ ޓީމާ ހަމައަށް ކުރި ދަތުުރުގައި، އެހެން ކުޅިވަރު ދަނޑުތަކުގައި ވެސް ތަޖުރިބާތަކެއް ކުރި އެެވެ. އެ ގޮތުން، ހޭންޑްބޯޅަ އާއި ފުޓްބޯޅަ އަދި އެތުލެޓިކްސްގައި ވެސް ކުޅުނު އާން، ފެތުމުގެ ތެރެއަށް ނުކުތީ 2012 ވަނަ އަހަރު ގްރޭންޑް ދޭއްގައި އުޅެމުންނެވެ.
މޯލްޑިވްސް ލައިފްގާޑް އެސޯސިއޭޝަން (އެމްއެލްއޭ)އާ ގުޅި ފަތަން ދަސްކުރުމުން ފެށިގެން، ގައުމީ ލެވަލްގެ އެތުލީޓަކާ ހަމައަށް ދިއުމުގައި، އާން، 19، އެކި ކަންކަން ތަޖުރިބާކޮށްފައިވެ އެވެ. އޭގެ ތެރެއިން އެއް ކަމަކީ، ދެ ކޮނޑަށް ލިބުނު އަނިޔާ އެވެ.
އޮލިމްޕިކްސްގައި މި ފަހަރު ވާދަކުރާ ފަސް އެތުލީޓުންނާ ގުޅޭ ތައާރަފެއް ދެމުން ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވެސް ވަނީ، އާން އަށް ކުރިމަތިވި ބޮޑު އަނިޔާއިން ރިކަވާވެ، އޮލިމްޕިކްސްއާ ހަމައަށް ކުރި ދަތުރުން އެހެން އެތުލީޓުން އިބްރަތް ހާސިލްކުރަން ޖެހޭ ކަމަށް ވިދާޅުވެފަ އެވެ.
ޕެރިހުގައި މިހާރު ކުރިއަށްދާ އޮލިމްޕިކްސްގައި އާންގެ އިވެންޓް އޮތީ މިއަދު ހެނދުނު އެވެ. ޕެރިހަށް ފުރުމުގެ ކުރިން، "އަދަދު" އަށް ދިން އިންޓަވިއުއެއްގައި އާން ބުނީ، އަނިޔާ ވެގެން އެ ހޭދަކުރަން ޖެހުނު މުއްދަތުގައި، އޭނާގެ ވިސްނުން ބެހެއްޓީ ޕޮޒިޓިވްކޮށް ކަަމަށެވެ.
"އެހާ ބޮޑަށް އަޅުގަނޑު އެކަމާ ދެރަ ނުވެ، މުސްތަގުބަލަށް ބަލާފައި، ތަންކޮޅެއް، ބޮޑު ޓާގެޓަކާ އެއްކޮށް ގަދައަޅާ މަސައްކަތްކުރީ އަދި ބައިވަރު އެހެނިހެން މީހުންގެ އެހީތަކާ އެއްކޮށް، މަސައްކަތްކުރީމަ ވަރަށް ރަނގަޅު،" އާން ބުންޏެވެ.
ކޮމަންވެލްތު ގޭމްސްގެ އިވެންޓެއްގެ ތެރެއިން އާން ފަތަނީ.--- ފޮޓޯ: ގެޓީއިމޭޖަސް
އުމުރުން 17 އަހަރުގައި ވޯލްޑް ޗެމްޕިއަންޝިޕްގައި ވާދަކުރި އާން ވަނީ، ވޭދުވެދިޔަ އަހަރުތަކުގައި، ގައުމީ ޓީމުގައި ހިމެނިގެން، ބައިނަލްއަގުވާމީ ލެވަލްގައި ގިނަ ތަޖުރިބާތަކެއްކޮށްފަ އެވެ. އޭގެ ތެރޭގައި، އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި ކޮމަންވެލްތުގޭމްސްގައި ވާދަކުރުން ހިމެނެ އެވެ.
އެކަމަކު، ދުނިޔޭގެ ލެވެލްގެ އެހެން ގިނަ އެތުލީޓުންނެކޭ އެއްގޮތަށް އާންގެ ވެސް އޮތީ ބޮޑު އުންމީދެކެވެ.
"ފަސް ވަރަކަށް އަހަރުވެއްޖެ، އަޅުގަނޑު ނެޝަނަލް ޓީމަށް އެރިއްސުރެ، އަޅުގަނޑުގެ ހުވަފެނެއް އެއީ އޮލިމްޕިކްސް އަށް ދިއުމަކީ، އައިމް ވެރީ ތޭންކްފުލް، ވަރަށް ޝުކުރުވެރިވަން، އެމްއޯސީ އާއި އެސޯސިއޭޝަނަށް، ދެން އަޅުގަނޑުގެ ކޯޗަށް، ދެން، އަޅުގަނޑުގެ މައިންބަފައިން ކޮށްދިން މަސައްކަތަށް،" ބޮޑު ހުވަފެން ހަގީގަތަކަށް ވުމުގެ ޝުކުރުގެ ލިސްޓު ހިއްސާކުރަމުން އާން ބުންޏެވެ.
އާން ވަނީ އޭނާގެ ސްވިމިން ކެރިއަރު ބައްޓަންކޮށްދިން، މޯލްޑިވްސް ލައިފްގާޑް އެސޯސިއޭޝަން އަށް ވަރަށް ބޮޑު ޝުކުރެއް އަދާކޮށްފަ އެވެ.
ފަތަން ދަސްކުރަން ފުރަތަމަ މޫދަށް އެރި، ފަހުން ފެތުމަށް އުފެދުނު ޝައުގާއި އަމިއްލަ ގައިގައި ހުރި ފެތުމުގެ ހުނަރު ވަޒަންކުރެެވެން ފެށި ހިސާބުން، އާންގެ އުންމީދުތައް ގުޅިފައިވާ އޮލިމްޕިކްސްގެ ސްޓޭޖުން އޭނާ މިއަދު ފެނިގެންދާނެ އެވެ.
އާން، މި ފަހަރުގެ އޮލިމްޕިކްސްގައި ވާދަކުރަން ހަމަޖެހިފައިވަނީ، ފިރިހެނުންގެ 50 މީޓަރު ފްރީސްޓައިލް އިވެންޓްގަ އެވެ. އާންގެ އުންމީދަކީ، 24 ސިކުންތަށް ވުރެ އަވަހަށް މި އިވެންޓް ނިންމުމެވެ. އާން ވަނީ، މި އަހަރު މެލޭޝިއާގައި ކުރިއަށްދިޔަ އިވެންޓެއްގައި، 24.28 ސިކުންތުން އެ އިވެންޓް ނިންމައިފަ އެވެ.
