ރައްޔިތުންގެ މަޖިލީހުގައި މުޅިން އަލަށް ގެދޮރުވެރިކަމާ ބެހޭ ކޮމެޓީއެއް އުފައްދައި މުގައްރިރަކު ހޮވައި މަސައްކަތް ފަށައިފި އެވެ.
ގެދޮރުވެރިކަމާ ބެހޭ ކޮމެޓީގައި ހިމެނިވަޑައިގަންނަވަނީ ވެރިކަން ކުރާ ޕީއެންސީގެ ނުވަ މެންބަރުންނާއި އެމްޑީޕީގެ ދެ މެންބަރުންނެވެ. ކޮމެޓީގެ މުގައްރިރަކަށް ހޮވާފައި ވަނީ އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ.
މިއަދު ކުރިއަށް ގެންދިޔަ އެ ކޮމެޓީގެ ފުރަތަމަ ބައްދަލުވުމުގައި ފަލާހު ވިދާޅުވީ މަޖިލީހުގެ އެކި ކޮމެޓީތަކުން ބަލަމުންދާ ގެދޮރުވެރިކަމާ ގުޅޭ މައްސަލަތައް ގެދޮރުވެރިކަމާ ބެހޭ ކޮމެޓީއަށް ގެނެސް، އެ މައްސަލަތައް ދެން ބަލަމުން ދާނީ އެ ކޮމެޓީން ކަމަށެވެ.
ކޮމެޓީގައި ހިމެނިވަޑައިގަންނަވާ މެންބަރުން:
- ހުޅުމާލެ އުތުރު ދާއިރާގެ މެންބަރު ހުސައިން ޝަރީފް
- ހެންވޭރު ހުޅަނގު ދާއިރާގެ މެންބަރު ހުސައިން އިމްރާން ލަތީފް
- މައްޗަންގޮޅި މެދު ދާއިރާގެ މެންބަރު އަހުމަދު ޒަމީރު
- މާފަންނު މެދު ދާއިރާގެ މެންވަރު އަސްމާ ރަޝީދު
- ވިލިމާލެ ދާއިރާގެ މެންބަރު މުހައްމަދު އިސްމާއިލް
- ކުޅުދުއްފުށި އުތުރު ދާއިރާގެ މެންބަރު މުހައްމަދު ދާއޫދު
- އިނގުރައިދޫ ދާއިރާގެ މެންބަރު އިބްރާހިމް ފަލާހު
- ފުވައްމުލަކު މެދު ދާއިރާގެ މެންބަރު އަލީ ފަޒާދު
- ހިތަދޫ އިތުރު ދާއިރާގެ މެންބަރު މުހައްމަދު ސިނާން
- ގަލޮޅު އިތުރު ދާއިރާގެ މެންބަރު މުހައްމަދު އިބްރާހިމް
- ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
ގެދޮރުވެރިކަމާ ބެހޭ ކޮމެޓީއެއް ވުޖޫދު ކުރުމުގެ ބޭނުމަކީ ގެދޮރުވެރިކަމާ ބެހޭ ހުރިހާ މައްސަލަތަކަށް ދާއިމީ ހައްލެއް ހޯދައިދިނުން ކަމަށް މީގެ ކުރިން މަޖިލީހުގެ ނައިބު ރައީސް، އަހުމަދު ނާޒިމް ވިދާޅުވެފައިވެ އެވެ.
ގެދޮރުވެރިކަމާ ބެހޭ ކޮމެޓީ ވުޖޫދު ކުރުމުން އެކަމާ ގުޅޭ މައްސަލަތަކަށް ހާއްސަ އިސްކަމެއް ދީގެން ދިރާސާކޮށް ހައްލު ހޯދުމަށް މަގުކޮށިގެންދާނެ ކަމަށް ވެސް ނާޒިމް ވިދާޅުވެފައިވެ އެވެ.
ގެދޮރުވެރިކަމާ ބެހޭ މައްސަލަތައް މީގެ ކުރިން ބަލަމުން ދިޔައީ މަޖިލީހުގެ އެކި ކޮމެޓީތަކުންނެވެ.
