އެމްއެމްއޭގެ ގަވަރުނަރުކަމަށް އަހުމަދު މުނައްވަރު އައްޔަނު ކުރަން ފެންނަ ކަމަށް ރައްޔިތުންގެ މަޖިލީހުން ފާސްކޮށްފި އެވެ.
އެމްއެމްއޭގެ ގަވަރުނަރުކަމަށް މުނައްވަރު އައްޔަން ކުރަން ރުހުން ދޭން ފާސްކުރީ މިއަދުގެ ޖަލްސާގައި އެކަމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 78 މެންބަރުންގެ އިއްތިފާގުންނެވެ.
ފިނޭންސް މިނިސްޓަރުގެ އެޑްވައިޒަރުގެ މަގާމުގައި ހުންނެވި މުނައްވަރު ގަވަރުނަރުކަމަށް އައްޔަނު ކުރަން ރައީސް މުއިއްޒު ނިންމެވީ މިމަހުގެ 22 ވަނަ ދުވަހު އެވެ. މުނައްވަރުގެ ނަން މަޖިލީހަށް ހުށަހެޅުއްވުމުން އެ މައްސަލަ ދިރާސާ ކުރުމަށްފަހު މާލިއްޔަތު ކޮމެޓީން ނިންމީ ގަވަރުނަރުކަމަށް އޭނާ އައްޔަނު ކުރަން ރައީސްއަށް ލަފާ ދިނުމަށް ފެންނަ ކަމަށެވެ.
މާލިއްޔަތު ކޮމެޓީން މުނައްވަރުއާ އިންޓަވިއު ކުރުމަށްފަހު އޭނާއަށް 94.73 ޕަސެންޓު މާކްސް ދީފައިވެ އެވެ.
މުނައްވަރަކީ ކުރީގެ ރައީސް އަބްދުالله ޔާމީންގެ ވެރިކަމުގައި ފިނޭންސް މިނިސްޓަރުކަން ކުރެއްވި ބޭފުޅެކެވެ. އޭނާ އެ މަގާމަށް އައްޔަނުކުރީ ޖޫން 22, 2016 ގަ އެވެ. ޔާމީންގެ ވެރިކަން ނިމެންދެން އެ މަގާމު އޭނާ ފުރުއްވި އެވެ.
ފިނޭންސް މިނިސްޓަރުގެ އެޑްވައިޒަަރުގެ މަގާމަށް މިނިސްޓަރެއްގެ ފެންވަރުގައި އޭނާ އައްޔަނުކުރީ ޑިސެމްބަރު 12, 2023 ގަ އެވެ.
އެމްއެމްއޭގެ ގަވަރުނަރު ކަމުގައި ކުރިން ހުންނެވި އަލީ ހާޝިމް މަގާމުން ވަކި ކުރީ އެމްއެމްއޭގެ ގާނޫނުގައި ބަޔާންކޮށްފައިވާ އެ އޮތޯރިޓީގެ މަގުސަދުތަކާއި މަސައްކަތްތައް އަދާކުރުމުގެ ގާބިލުކަން އޭނާގެ ކިބައިގައި ނެތް ކަމަށް މާލިއްޔަތު ކޮމިޓީއަށް ސާބިތުވާ ކަމަށް ބުނެ އެވެ.
މި މައްސަލައިގައި ޖަވާބުދާރީވުމަށް ތިން ފުރުސަތެއް ހާޝިމަށް ކޮމިޓީގެ ފަރާތުން އެރުވި އެވެ. ނަމަވެސް, އެ ތިން ދުވަހު ވެސް އާލާސްކަންފުޅާ އުޅުއްވާތީ އޭނާ ހާޒިރުވެވަޑައިގެންފައި ނުވެ އެވެ. އޭގެ ބަދަލުގައި ދިފާއުގައި ލިޔުމުން ތަފްސީލީ ޖަވާބު ދެއްވި އެވެ.
އެމްއެމްއޭ ގާނޫނުގެ ދަށުން، އެ އޮތޯރިޓީގެ ގަވަރުނަރު ވަކިކުރަން ރައީސްއަށް ލަފާދިނުމަކީ މަޖިލީހަށް ކުރެވޭ ކަމެކެވެ.
ހާޝިމް ގަވަރުނަރުކަމުން ވަކިކުރަން ފެންނަ ކަމަށް މަޖިލީހުން ފާސްކުރީ 63 މެންބަރުންގެ ވޯޓާއެކު އެވެ. އެކަމާ ދެކޮޅަށް ވޯޓު ދެއްވީ ނުވަ މެންބަރުންނެވެ.
