ނޭޝަނަލް ޕްރޮޓެކްޝަން އޭޖެންސީން އެކި ފަރާތްތަކަށް ނުދައްކައި ހުރި ފައިސާގެ އަދަދު 871 މިލިއަން ރުފިޔާއަށްވުރެ އިތުރު ކަމަށް އެ އިދާރާއިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް އަންގައިފި އެވެ.
އެންސްޕާއިން ނުދައްކައި ހުރި ފައިސާގެ ތަފްސީލު ހޯދުމަށް މާލިއްޔަތު ކޮމިޓީން އެދުނީ ރާއްްޖޭގައި ހިންގާ އެންމެ ބޮޑު އަމިއްލަ ހޮސްޕިޓަލް ކަމަށްވާ, އޭޑީކޭ ހޮސްޕިޓަލުން އާސަންދަ އަދި އެންސްޕާއަށް ދީފައިވާ ހިދުމަތްތަކަށް ބިލުކޮށްފައިވާ 144 މިލިއަނަށް ވުރެ ގިނަ ރުފިޔާ ނުލިބިވާ ކަމަށް މިދިޔަ އަހަރު ފޮނުވާފައިވާ ސިޓީއަކާ ގުޅިގެންނެވެ.
އެ މައްސަލައިގައި މާލިއްޔަތު ކޮމިޓީން އެދިގެން އެންސްޕާއިން ދިނީ ނޮވެމްބަރު 17, 2023 ގެ ނިޔަލަށް ނުދައްކައި ހުރި ފައިސާގެ ތަފްސީލެވެ.
އެ ކޮމިޓީގެ އިދާރީ މޭޒުން އެ މައުލޫމާތު އިއްވަމުން ހާމަކުރި ގޮތުގައި އެންސްޕާއިން އެ މުއްދަތުގެ ނިޔަލަށް 871,976,442ރ. (އަށް ސަތޭކަ ހަތްދިހަ އެއް މިލިއަން ނުވަ ލައްކަ ހަތްދިޔަ ހަ ހާސް ހަތަރު ސަތޭކަ ސާޅިސް ދެ ރުފިޔާ) ސަރުކާރާއި ޕްރައިވެޓް ވެންޑަރުންނަށް ނުދައްކައި އެބައޮތެވެ.
އެންސްޕާ ވުޖޫދަށް އައީ އޮގަސްޓު 27, 2008 ގަ އެވެ. އެ އޭޖެންސީއަކީ ގައުމީ އިޖުތިމާއީ ސިއްހީ އިންޝުއަރަންސް ސްކީމު ހިންގާ ބެލެހެއްޓުމާއި އިޖުތިމާއީ ރައްކާތެރި ކަމުގެ ގާނޫނުގެ ދަށުން ކަނޑައެޅިފައިވާ ޕްރޮގްރާމްތައް ރާވާ ހިންގުމެވެ.
