ފްރާންސްގެ ޕެރިހުގައި މިހާރު ކުރިއަށްދާ ދުނިޔޭގެ އެންމެ ބޮޑު ކުޅިވަރު ހަރަކާތް، އޮލިމްޕިކްސްގެ ޓޭބަލް ޓެނިސް އިވެންޓްގް ޕްރިލިމިނަރީ ބުރުން ޕޮލަންޑްގެ ކަޓާރްޒައިނާ ވޭގަޖަން އަތުން ރާއްޖޭގެ ގައުމީ ޓީޓީ ތަރި، ފާތިމަތު ދީމާ އަލީ ބަލިވެއްޖެ އެވެ.
ކަޓާރްޒައިނާ އަކީ ދުނިޔޭގެ ޓޭބަލް ޓެނިސް ރޭންކިންގް އަށް ބަލާއިރު, 135 ވަނައިގައި އޮތް ކުޅުންތެރިޔާ އެވެ. ގަދަ 64 ކުޅުންތެރިންގެ ބުރުން ޖާގަ ހޯދުމަށް ކުޅުނު މި މެޗު ކަޓާރްޒައިނާ ކާމިޔާބުކުރީ ސީދާ ހަތަރު ސެޓުންނެވެ.
މެޗުގެ ސެޓުތައް ދިޔައީ 11-05, 11-05, 11-02 އަދި 11-08 އިންނެވެ.
މި މެޗުގެ ފުރަތަމަ ސެޓު ފަށައިގެން ކަޓާރްޒައިނާ ދެ ޕޮއިންޓްގެ ލީޑެއް ނެގި ނަމަވެސް ދީމާ ވަނީ ފަހަތުން އަރާ އެއްވަރުކޮށްފަ އެވެ. އެކަމަކު، އޭގެ ފަހުން، ކަޓާރްޒައިނާ ވަނީ އަލުން ލީޑު ނަގާ ލީޑާ ބޮޑު ލީޑެއްގައި ކުޅެފަ އެވެ. މި ސެޓު ކަޓަގީނާ ގެންދިޔައީ 11-05 އިންނެވެ.
ދެ ވަނަ ސެޓު ފަށައިގެން ވެސް ކަޓަގީނާ ވަނީ އަށް ޕޮއިންޓްގެ ލީޑެއް ނަގައިފަ އެވެ. އެކަމަކު، ސެޓުގެ ފަހު ކޮޅު ދީމާ ވަނީ ކައިރިކައިރިން ތިން ޕޮއިންޓް ހޯދައި، ކަޓާރްޒައިނާ އަށް، ކޮންމެ ވެސް ވަރެއްގެ ޕްރެޝަރެއް ކޮށްފަ އެވެ. އެކަމަކު، މި ސެޓު ކަޓާރްޒައިނާ ކާމިޔާބު ކުރީ 11-05 އިންނެވެ.
ތިން ވަނަ ސެޓު ފަށައިގެން ވެސް ކޮންފިޑެންސާ އެކު ފެނުނު، ކަޓާރްޒައިނާ ވަނީ ފަސް ޕޮއިންޓްގެ ލީޑެއް ނަގައިފަ އެވެ. މި ސެޓުގައި ދީމާގެ ފަރާތުން ފެނިގެންދިޔައީ ފުރަތަމަ ދެ ސެޓާ އަޅާ ބަލާއިރު ދަށް ކުޅުމެކެވެ. މި ސެޓު ކަޓަގީނާ ކާމިޔާބުކުރީ 11-02 އިންނެވެ.
ހަތަރު ވަނަ ސެޓު ފަށައިގެން ފުރަތަމަ ޕޮއިންޓް ހޯދީ ދީމާ އެވެ. އެކަމަކު، ކައިރިކައިރީގައި ދީމާގެ ފަރާތުން ބޮޑު ދެ ގޯސް ހެދި ކަޓާރްޒައިނާ ވަނީ 4-2 އިން ލީޑު ނަގައިފަ އެވެ. މުޅި މެޗުގައި ވެސް ފެނިގެންދިޔަ އެންމެ ފޯރިގަދަ ސެޓުގައި ދީމާ ވަނީ ކަޓާރްޒައިނާ އަށް ޕްރެޝަރުކޮށް ބޮޑު ލީޑެއް ނެގިޔަ ނުދީ ކުޅެފަ އެވެ. މި ސެޓު ކަޓާރްޒައިނާ ކާމިޔާބުކުރީ 11-08 އިންނެވެ.
އުމުރުން 16 އަހަރުގެ ދީމާ އަކީ އޮލިމްޕިކްސް އަށް ކޮލިފައިވެގެން މުބާރާތުގައި ވާދަކުރި ދިވެހި ހަމައެކަނި އެތުލީޓެވެ. ރާއްޖޭން އަންނަނީ، 1988 އިން ފެށިގެން އޮލިމްޕިކްސްގައި ވާދަކުރަމުންނެވެ. މި ފަހަރުގެ އޮލިމްޕިކްސް އަކީ އެންމެ ގިނަ ކުޅިވަރުން ރާއްޖެ ފެންނާނެ އޮލިމްޕިކްސް އެވެ. އެ ގޮތުން، ޓީޓީގެ އިތުރުން ބެޑްމިންޓަނާއި ސްވިމިންގެ އިތުރުން އެތުލެޓިކްސް ހިމެނޭ ގޮތަށް، ޖުމްލަ ފަސް ދިވެހި އެތުލީޓުން އޮލިމްޕިކްސްގައި ފެންނާނެ އެވެ.
އޮލިމްޕިކްސްގައި ދެން އެންމެ އަވަހަށް ރާއްޖޭގެ އެތުލީޓަކަށް މެޗެއް އޮތީ، މާދަމާ ބެޑްމިންޓަން ތަރި، ފާތިމަތު ނަބާހާ އާއި އިންޑިއާގެ ޕީވީ ސިންދޫ ބައްދަލުކުރާ މެެޗެވެ.
