ސްރީ ލަންކާގައި ކުރިއަށްދާ އެ ގައުމުގެ ނެޝަނަލް އެންޑް ނެޝަނަލް ޖޫނިއާ ނެޝަނަލް ލޯންގް ކޯސް ސްވިމިން ޗެމްޕިއަންޝިޕްސްގައި ވާދަކުރި ރާއްޖޭގެ ޖޫނިއާ އަންހެން ޓީމުން ލޯ މެޑަލް ހޯދައިފި އެވެ.
ޖޫނިއާ ނެޝަނަލް ކެޓަގަރީގެ 4 ގުނަ 100 މީޓަރު މެޑްލޭ ރިލޭ އިވެންޓުގެ ލޯމެޑަލް ހޯދައިދިން ދިވެހި ޓީމުގައި ހިމެނެނީ އަމްނާ ތަޒްކިޔާ މިރުސާދު، ޒޯހާ އަޒްލީ ނަސީމް، މަލައިކާ ލިންޑާ އިމްރާން އަދި ޒާހާ ޒައިދުލް ހަލީލް އެވެ.
ރެކޯޑް ހެދިއިރު، ޖޫނިއާ އަންހެން ޓީމުގެ ޓައިމިން އަކީ 5 މިނިޓް، 38.03 ސިކުންތެވެ.
ލަންކާ މުބާރާތުގައި އިންޑިވިޖުއަލީ އެންމެ ކާމިޔާބު ދިވެހި އެތުލީޓަކީ، 13 އަހަރުގެ ތަޒްކިޔާ އެވެ. އޭނާ ވަނީ ދެ ގައުމީ ރެކޯޑް އާ ކޮށްފަ އެވެ. އެއީ، އަންހެނުންގެ ލޯންގް ކޯސް 100 މީޓަރު ފްރީސްޓައިލް އިވެންޓް އާއި އަންހެނުންގެ ލޯންގް ކޯސް 200 މީޓަރު ބެކްސްޓްރޯކް އިވެންޓުގެ ޤައުމީ ރެކޯޑް އެވެ.
ތަޒްކިޔާ، 100 މީޓަރު ފްރީސްޓައިލް އިވެންޓު ނިންމާފައިވަނީ 01:05.53 ޓައިމިން އަކުންނެވެ. ތަޒްކިޔާގެ މި ޓައިމިން އަކީ، މިއީ ގައުމީ ރެކޯޑެކެވެ. މި ރެކޯޑް އެންމެ ފަހުން އާ ކުރެވިފައިވަނީ މީގެ އަށް އަހަރު ކުރިންނެވެ. މި އިވެންޓްގެ ގައުމީ ރެކޯޑް އެންމެ ފަހުން އާކޮށްފައިވަނީ އާމިނަތު ޝަޖަން އެވެ. އެއީ 2016 ވަނަ އަހަރު ބޭއްވުނު ރިއޯ 2016 އޮލިމްޕިކް ގޭމްސްގައި 01:05.71 އިން ރޭސް ފުރިހަމަކޮށްގެންނެވެ. އެހެންކަމުން، ތަޒްކިޔާ މި އާ ކޮށްފައިވަނީ، ގިނަ އަހަރުތަކެއް ވަންދެން އާ ނުކުރެވި އޮތް ރެކޯޑެކެވެ.
ހުނަރުވެރި ފެތުންތެރިޔާ، ތަޒްކިޔާ 200 މީޓަރު ބެކްސްޓްރޯކް އިވެންޓުގެ ގައުމީ ރެކޯޑް އާކޮށްފައިވަނީ 02:51.26 އިން ރޭސް ނިންމައިގެންނެވެ. މި އިވެންޓުގެ ގައުމީ ރެކޯޑް އެންމެ ފަހުން އާކޮށްފައިވަނީ 2022 ވަނަ އަހަރު ބޭއްވުނު 19 ވަނަ ފީނާ ވޯލްޑް ޗެމްޕިއަންޝިޕްސްގައި ވާދަކުރި ގައުމީ ފެތުންތެރިޔާ، އައިޝަތު ސައުސަން އެވެ. އެ ފަހަރު، ސައުސަން، އިވެންޓް ފުރިހަމަކޮށްފައިވަނީ 02:53.55 އިންނެވެ.
