މޫސުން ގޯސްވެގެން ފަސްކުރި މި އަހަރުގެ މިނިވަންދުވަހުގެ ރަސްމީ ޕެރޭޑު އަންނަ ހުކުރު ދުވަހު ބާއްވަން ނިންމައިފި އެވެ.
އެމްއެންޑީއެފްގެ ރަސްމީ އެކްސް އެކައުންޓުން މިއަދު ކުރި ޕޯސްޓެއްގައި މިނިވަންދުވަހުގެ ޕެރޭޑު އޮގަސްޓު 2، ގައި ބާއްވަން ނިންމާފައިވާ ކަން ވަނީ ކަށަވަރުކޮށްދީފަ އެވެ.
މިނިވަންދުވަހުގެ ޕެރޭޑަކީ ސިފައިންނާއި ކެޑޭޓުން ކޮންމެ އަހަރެއްގެ ޖުލައި 26، ގެ ހަވީރު ކުރިއަށް ގެންދާ ރަސްމީ ހަރަކާތެކެވެ. މި ހަރަކާތް ބައްލަވާލައްވަން އޭރަކު ހުންނަވާ ރައީސާއި އަނބިކަނބަލުން ވަޑައިގަންނަވަ އެވެ.
ނަމަވެސް މޫސުން ގޯސްވެ، މިއަދު ޕެރޭޑާއި އެ ހަރަކާތާ ގުޅިގެން ހަވީރު 4-6 އަށް މާލޭގެ މަގުތަކުގައި އުޅަނދުތައް ދުއްވުން މަނާކުރަން ނިންމި ނިންމުންވެސް ވަނީ ބާތިލްކޮށްފަ އެވެ.
މާލޭގެ އިތުރުން ރާއްޖޭގެ ބޮޑު ސަރަހައްދަކަށް މިއަދު މޫސުން ގޯހެވެ. އެގޮތުން އައްޑޫ ފިޔަވާ ރާއްޖޭގެ ހުރިހާ ސަރަހައްދަކަށް މޫސުން ގޯސްވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ވައިޓު އެލާޓު ނެރުނެވެ.
