އިދިކޮޅު މައި ޕާޓީ އެމްޑީޕީގެ ދަފުތަރުގައި ގިނައީ ދޮށީ އުމުރުގެ މެންބަރުން ކަމަށާއި ޕާޓީއަށް ޒުވާނުން އިތުރުކުރުމުގެ މަސައްކަތް ކުރައްވާނެ ކަމަށް އެ ޕާޓީގެ މާލެ ދާއިރާގެ ރައީސް ކަމަށް ވާދަކުރައްވާ، މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
އަދަދު ނޫހުގެ "އެތެރެފުށް" ޕްރޮގްރާމްގައި ވާހަކަދައްކަވަމުން އާޒިމް ވިދާޅުވީ، އެމްޑީޕީ ދަފުތަރުގައި އެވްރެޖްކޮށް މިހާރު ތިބީ 40 އަހަރުން މަތީގެ މީހުން ކަމަށެވެ. ޕާޓީގެ 90 އިންސައްތަ މެންބަރުން އެ އުމުރުގައި ތިބިއިރު ބާކީ ތިބި މެންބަރުންގެ ތެރެއިން ފަސް އިންސައްތަ އަކީ 35 އަހަރުން މަތީގެ މެންބަރުން ކަމަށެވެ.
"އަޅުގަނޑަށް އެމްޑީޕީގެ ދަފްތަރުން 20 ވަރަކަށް އަހަރުގެ މީހަކު ފެންނަނީ ވަރަށް މަދުން، މުޅި ދަފްތަރު އޮތީ ދުވަސްވެފަ، އެހެންވީ އަޅުގަނޑަކީ މީހުންނާ ގުޅޭ މީހަކަށްވާތީ އަދި ޒުވާނުންނާ އެއްކޮށް ވެސް ހަރަކާތްތައް ހިންގޭ މީހަކަށް ވާތީ އެމްޑީޕީގައި ޒުވާން ޖީލެއް ބިނާކުރަން އެބަޖެހޭ،" އާޒިމް ވިދާޅުވި އެވެ.
އެމްޑީޕީގެ މެންބަރުން މިހާރު ބޭނުންވަނީ މާދަމާއަށް ވިސްނަން ކަމަށާއި އިއްޔެގެ ކަންކަމާ މެދު ވިސްނުން ގެންގުޅެން ޕާޓީގެ މެންބަރުން ބޭނުން ނުވާ ކަމަށް ވެސް އާޒިމް ވިދާޅުވި އެވެ.
އެމްޑީޕީގެ އެތެރޭގެ އިންތިހާބާ ގުޅޭ ގޮތުން އިތުރަށް ވާހަކަ ދައްކަވަމުން އާޒިމް ވިދާޅުވީ ނިމިދިޔަ އެމްޑީޕީގެ ވެރިކަމުގައި އޭނާ އާ ހަވާލުކުރި މަސައްކަތެއް ވިއްޔާ އެންމެ ފުރިހަމައަށް އަދާކޮށްފައިވާނެ ކަމަށެވެ. އޭގެ މިސާލު ދެއްވަމުން އާޒިމް ވަނީ މެނޭޖިން ޑިރެކްޓަރުކަން ކުރެއްވި އެސްޓީއޯ އަދި އެމްޓީސީސީ ފާހަގަކުރައްވާފަ އެވެ.
އާޒިމް ދެކޭ ގޮތުގައި އޭނާ ހަވާލުވާ ކޮންމެ ތަނެއް ވެސް އޮތް ހާލަތަށްވުރެ މާ ރަނގަޅު ހާލަތަކަށް ގެންދެވުމުން، އެމްޑީޕީއަށް ވެސް އެ މަގު ފެންނަ ކަމަށެވެ.
"އަޅުގަނޑަށް މާލެ ދާއިރާގެ ރައީސްކަން ދީފި ނަމަ އެމްޑީޕީއަށް ޒުވާން ޖީލެއް ވައްދައިދޭނަން، ކޮންމެ ގޮތެއް ވިޔަސް ޒުވާން ޖީލެއް އެމްޑީޕީ ތެރެއަށް ނުގެނެސްފިނަމަ އެމްޑީޕީގެ ކުރިމަގު ރަނގަޅެއް ނޫން،" އޭނާ ވިދާޅުވި އެވެ.
އާޒިމް އިތުރަށް ވިދާޅުވީ ދާއިރާގެ ރައީސްގެ ހައިސިއްޔަތުން ތިން މަހުން އެއް މަހު ދާއިރާގެ މެންބަރުން އެއްކޮށް، މަސައްކަތްތައް ބާރަށް ކުރިއަށް ގެންދާނެ ކަމަށެވެ. އަދި ނިމިދިޔަ ރިޔާސީ އަދި މަޖިލިސް އިންތިހާބުގައި މާލެއިން އެމްޑީޕީއަށް ލިބުނު ނާކާމިޔާބީއަށް ވިސްނާ، ޒުވާން ޖީލަކާއެކު އެކަން ބަދަލުކުރައްވާނެ ކަމަށް ވެސް އޭނާ ވިދާޅުވި އެވެ.
