އައްޑޫ ސިޓީގެ ކަރަންޓު މައްސަލައިގައި ފެނަކަ ކޯޕަރޭޝަންގެ އެމްޑީ މުއާޒް މުހައްމަދު ރަޝީދު ބަހަނާ ނުދައްކަވައި، ކަރަންޓު ދިނުމަށް މޭޔަރު އަލީ ނިޒާރު މިއަދު ގޮވާލައިފި އެވެ.
ކުރީ ސަރުކާރަށް ފަޑުކިޔައި މުއާޒް ފޭސްބުކްގައި ކުރި ޕޯސްޓަކަށް ރައްދު ދެއްވަމުން ނިޒާރު ވިދާޅުވީ އޭސީސީން ދައްކަން ޖެހޭ ވާހަކަ ނުދައްކައި އައްޑޫއަށް ދިމާވެފައިވާ ކަރަންޓުގެ މައްސަލަ ހައްލުކޮށްދޭން އެދޭ ކަމަށެވެ.
މުއާޒް ވިދާޅުވީ މިދިޔަ ސަރުކާރުން މާކެޓް ރޭޓުގައި 44 މިލިއަން ރުފިޔާއަށް ނިންމޭނެ އިމާރާތެއް 76 މިލިއަން ރުފިޔާ ހަރަދު ކުރިއިރުވެސް ނުނިމުން ކަމަށެވެ.
"މަނިކުފާން ހަވާލުވީ ފެނަކަ ހިންގަވަން. އައްޑޫގައި އަޅަން ފަށާފައިވާ ޕަވާ ހައުސް ނިންމަވައި ޖެނެރޭޓަރު ގެންނަވާ. ފައިސާ ހޯދަން އެނގެންވާނެ. ސަރުކާރުން ފައިސާ ލިބޭނެ. ނޭގޭނަމަ ކުރީގެ އެމްޑީ ސައީދުގެ މަޝްވަރާ ހޯއްދަވާ،" ނިޒާރު ވިދާޅުވި އެވެ.
މިއަދު އޮތް އައްޑޫ ސިޓީ ކައުންސިލް ބައްދަލުވުމުގައި ނިޒާރު ވިދާޅުވީ ދަރަނި ހުއްޖަތަކަށް ދައްކައިގެން، ރައްޔިތުންނަށް ދޭ ހިދުމަތްތަކުން ރެކޭނެ ފުރުސަތެއް ނޯންނާނެ ކަމަށައި ފެނަކައިގެ އެމްޑީ މުއާޒް މުހައްމަދު ރަޝީދުއަކީ މަގާމުގެ މަސްއޫލިއްޔަތު އަދާ ކުރެވޭ ވަރުގެ ބޭފުޅެއް ނޫން ކަމަށެވެ.
ފެނަކަ ހިންގަމުންދަނީ ސަރުކާރުން ފައިސާ ދީގެންކަން ފާހަގަކުރައްވާ ނިޒާރު ވިދާޅުވީ ފެނަކައަކީ އަސާސީ ހިދުމަތް ދޭ ކުންފުންޏެއް ކަމަށާއި އެ ކުންފުންޏަށް ސަރުކާރުން ފައިސާ ދޭނެ ކަމަށެވެ.
"ފައިސާ ހޯދަން ދަސްކުރަން ޖެހޭ. ފައިސާ ހޯދާ ގޮތް ދަސްކޮށްގެން ފައިސާ ހޯދައިގެން ދައުލަތް ހިންގޭނީ. 500 މިލިއަން ދީފައި ޑްރޯން ގަތީ. ހަމަ މުލިއާގެ މަރާމާތު ކުރަންވީމަ 20 މިލިއަން ހަރަދުވި. ހުވާ ކުރުމުގެ ރަސްމިއްޔާތަށް 26 މިލިއަން ހަރަދުވި. އެ ހުރިހާ ކަމެއް ކުރިއިރު ނުވިސްނެނީބާ ރައްޔިތުން މި ހާލަތަށް ވެއްޓޭނެކަން،" އޭނާ ވިދާޅުވި އެވެ.
ކަރަންޓުގެ މައްސަލަ ހައްލު ކުރެވޭނީ ސަރުކާރު ވެސް ހިންގަން އެނގިގެން ކަމަށާއި މިއަދާ ހަމައަށް ސަރުކާރު ހިންގަން އެނގޭތަނެއް ނުފެންނަ ކަމަށް ނިޒާރު ވިދާޅުވި އެވެ.
ފެނަކައިން މިއަދު ނެރުނު ބަޔާނެއްގައި ބުނީ އައްޑޫގައި މިހާރު ހަރު ކުރެވިފައި ހުރި ޖެންސެޓުތަކުގެ ތެރެއިން، 1.8 މެގަވޮޓްގެ އިންޖީނަށް ދިމާވެފައިވާ މައްސަލައަކާ ގުޅިގެން އައްޑޫއަށް ބޭނުންވާ މިންވަރަށް ކަރަންޓު އުފައްދަން ދަތިތައް ކުރިމަތިވެފައިވާ ކަމަށެވެ.
އެގޮތުން އެ އިންޖީނަށް ބޭނުންވާ ސްޕެއާއަކީ ރާއްޖެއިން ބޭރުން ހޯދަން ޖެހޭ ސްޕެއާއަކަށް ވުމުން، އެ ސްޕެއާ ހޯދައި އިންޖީނަށް ދިމާވެފައިވާ މައްސަލަ ހައްލު ކުރުމަށް މަސައްކަތް ކުރަމުންދާ ކަމަށް އެ ކޯޕަރޭޝަނުން ބުނެ އެވެ.
އައްޑޫއަށް ކަރަންޓުގެ އެކި މައްސަލަތައް ދިމާވަމުން އަންނަނީ މި އަހަރު ފެށުނު ފަހުންނެވެ. ނަމަވެސް މައްސަލަ އެއްކޮށް ހައްލު ކުރެވިފައެއް ނުވެ އެވެ. އެކަމާ ގުޅިގެން ރައްޔިތުން އަންނަނީ ކަންބޮޑުވުން ފާޅުކޮށް، ދަތިތައް ދިމާވާ ކަމަށް ބުނެ އަޑު އުފުލަމުންނެވެ.
