އައްޑޫ ސިޓީގެ ގުޅިފައިވާ ރަށްތައް ކަމަށްވާ ސ. ހިތަދޫ، ސ. މަރަދޫ، ސ. މަރަދޫފޭދޫ އަދި ސ. ފޭދޫއަށް ކަރަންޓު ދޭ މެއިން ކޭބަލަކަށް މައްސަލަ ދިމާވެ، ކަރަންޓުގެ ހިދުމަތަށް ބުރޫ އަރައިފި އެވެ.
އައްޑޫގެ ގުޅިފައިވާ ރަށްތަކަށް ކަރަންޓު ކެނޑުމުގެ މައްސަލަ ދިމާވީ ރެއިން ފެށިގެންނެވެ. އެ ފަހުން އެކި ވަގުތުތަކުގައި، އެކި ރަށްރަށުން ކަރަންޓު ކެނޑި، ރައްޔިތުންނަށް އަންނަނީ އުނދަގޫތައް ދިމާވަމުންނެވެ.
ކަރަންޓަށް ދިމާވެގެން އުޅޭ މައްސަލައިގެ މައުލޫމާތު "އަދަދު" އާ ހިއްސާކުރައްވަމުން ފެނަކަ ކޯޕަރޭޝަންގެ އެމްޑީ މުއާޒް މުހައްމަދު ރަޝީދު ވިދާޅުވީ އައްޑޫގެ ގުޅިފައިވާ ރަށްތަކަށް ކަރަންޓު ދޭ މެއިން ކޭބަލަކަށް މައްސަލަ ދިމާވެފައިވާ ކަމަށާއި މައްސަލަ ދިމާވި ކޭބަލް ދެނެގަތުމުގެ މަސައްކަތް ކުރަމުންދާ ކަމަށެވެ.
"މައްސަލަ ހައްލުކުރަން ކުރަމުންދާ މަސައްކަތުގެ ތެރެއިން ބައެއް ތަންތަނުން ކަރަންޓުގެ ހިދުމަތް މެދުކެނޑޭނެ. އެނގޭ ކަމަކީ މައްސަލަ ދިމާވެގެން އުޅެނީ އެޗްވީ ކޭބަލަކަށް ކަން ގެއްލުން ވެގެން [ކަން]. މަސައްކަތް ކުރަނީ މައްސަލަ ހައްލުކުރަން،" މުއާޒް ވިދާޅުވި އެވެ.
އައްޑޫ ސިޓީން މީގެ ކުރިން ވެސް މެއިން ކޭބަލަކަށް މައްސަލަ ދިމާވެ، ގުޅިފައިވާ ރަށްތަކުން ކަރަންޓު ކެނޑުނެވެ. އެ ފަހަރު ކޭބަލަށް މައްސަލަ ދިމާވީ މަގު ހެދުމުގެ މަސައްކަތް ކުރަމުން ދަނިކޮށެވެ.
އައްޑޫ ސިޓީއަށް ދޭތެރެ ދޭތެރެއިން ކަރަންޓުގެ ހިދުމަތް މެދުކެނޑޭތީ އެ ސިޓީގެ ރައްޔިތުން އަންނަނީ ކަންބޮޑުވަމުންނެވެ. އަދި ސިޓީގެ މޭޔަރު އަލީ ނިޒާރު ވެސް ވަނީ ކަރަންޓުގެ ހިދުމަތަށް ބުރޫ ނާރާގޮތަށް ދިމާވާ މައްސަލަތަކަށް ފުރިހަމަ ހައްލެއް ގެނައުމަށް ގޮވާލާފަ އެވެ.
