މާލެ އަތޮޅުން އައްޑު އަތޮޅާ ދެމެދުގެ ރަށްތަކަށް ކުރިއަށް އޮތް ވަގުތުތަކުގައި އުދަ އަރައިފާނެ ކަމަށް މީޓިއޮރޮލޮޖިކަލް އޮފީހުން ލަފާ ކޮށްފައި ވާތީ އެކަމަށް ސަމާލުވުމަށް ފުލުހުން އިލްތިމާސް ކޮށްފި އެވެ.
ދާދި ދެންމެއަކު ފުލުހުން އެކްސްގައި ކުރި ޕޯސްޓެއްގައި ބުނީ ކުރިއަށް އޮތް ވަގުތުތަކުގައި ސިނަމާލެ ބުރިޖު ބޭނުން ކުރާ ފަރާތްތަކާއި ރަށްރަށުގެ ގޮނޑުދޮށާ ކައިރީގައި އުޅޭ ފަރާތްތަކުން މުދަލާއި ގެދޮރުގެ ސަލާމަރާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅަން އިލްތިމާސް ކުރާ ކަމަށެވެ.
މެޓް އޮފީހުން ލަފާ ކޮށްފައި ވަނީ މިއަދުގެ މެންދުރުފަހު 1:15 އިން ހަވީރު 5:15 އަށް ކާފު އަތޮޅާއި އައްޑޫ އަތޮޅާއި ދެމެދުގެ ރަށްތަކަށް އުދަ އަރާނެ ކަމަށެވެ.
މިވަގުތުތަކުގައި ކަނޑުގެ ރާޅުތައް ވެސް ބިޔަވެފައި އުސް ވާނެ ކަމަށް މެޓު އޮފީހުން ލަފާ ކޮށްފައިވެ އެވެ.
އެކަންކަމަށް ސަމާލުވެތިބުމަށް މެޓުން ވަނީ އެ ދެމެދުގެ ރަށްރަށަށް ހުދު ސަމާލު ނެރެފަ އެވެ.
މި މޫސުމަކީ ކޮންމެ އަހަރަކުވެސް އާންމުކޮށް ރާއްޖޭގެ އެކި ސަރަހައްދުތަކަށް އުދަ އަރައި އެކި ވަރުގެ ގެއްލުން ވާ މޫސުމެކެވެ. މިދިޔަ އަހަރު ސިނަމާލެ ބުރިޖަށް އުދަ އަރައި އެތަނުން ދަތުރުކުރި މީހުންނަށް އެކިވަރުގެ ގެއްލުންވެފައިވެ އެވެ.
