ގައުމީ ފެތުންތެރިޔާ، އައިޝަތު އުލްޔާ ޝާއިގް، އެއް މަސް ތެރޭ ދެ ވަނަ ފަހަރަށް އަންހެނުންގެ ގައުމީ ޝޯޓްކޯސް 50 މީޓަރު ފްރީ ސްޓައިލް އިވެންޓްގެ ގައުމީ ރެކޯޑް މުގުރާލައިފި އެވެ.
އަންހެނުންގެ ޝޯޓްކޯސް 50 މީޓަރު ފްރީސްޓައިލް އިވެންޓުގެ ޤައުމީ ރެކޯޑް އުލްޔާ މި ފަހަރު ހެދީ، އޮސްޓްރޭލިއާ ގައި ކުރިއަށްދިޔަ ދި ޔުނިވާސިޓީ އޮފް ވެސްޓާން އޮސްޓްރޭލިއާ (ޔޫޑަބްލިއުއޭ) ވެސްޓް ކޯސްޓް ކްލަބް ނައިޓް ނަންބަރު 7 މީޓްގަ އެވެ.
އުލްޔާ މި ފަހަރު، 50 މީޓަރު ފްރީސްޓައިލް އިވެންޓު ނިންމާފައިވާ ޓައިމިން އަކީ 28.75 ސިކުންތުންނެވެ.
މި އިވެންޓުގެ ޤައުމީ ރެކޯޑް އެންމެ ފަހުން އާކޮށްފައިވަނީ ވެސް އުލްޔާ އެވެ. އެއީ، މިދިޔަ ޖޫން މަހު، އޮސްޓްރޭލިއާގައި ކުރިއަށްދިޔަ ބްރޭކާސް ބިގް ސްޕްލޭޝް ޖޫން 2024 މީޓް ގަ އެެވެ. އެ ފަހަރު، 50 މީޓަރު ފްރީސްޓައިލް އިވެންޓުގައި އުލްޔާގެ ޓައިިމިން އަކީ 28.81 ސިކުންތެވެ.
އޭގެ ކުރިން މި ރެކޯޑް އޮތީ، 2016 ވަނަ އަހަރު ބޭއްވުނު 13 ވަނަ ފީނާ ވޯލްޑް ސްވިމިން ޗެމްޕިއަންޝިޕުގައި ވާދަކުރި އާމިނަތު ސަޖަން އަތުގަ އެވެ. ސަޖަން ރެކޯޑް ހެދީ 29.81 ސިކުންތުގެ ޓައިމިން އަކާ އެކު އެވެ.
އުލްޔާ އަކީ މި ފަހަރުގެ އޮލިމްޕިކްސްގައި ރާއްޖެ ތަމްސީލްކުރާނެ ފެތުންތެރިއެކެވެ. އަންނަ ހަފްތާގައި ފަށާ އޮލިމްޕިކްސްގައި ސްވިމިން އިން ރާއްޖެ އަށް ލިބިފައިވަނީ ޔުނިވާސިލިޓީ ޕްލޭސަސްގެ ދެ ފުރުސަތެެވެ. ކޮލިފައިނުވާ ގައުމުތަކަށް ދޭ ސްލޮޓްތަކުގެ ތެރެއިން ފުރުސަތު ހޯދައި ރާއްޖެ ތަމްސީލްކުރާނީ އުލްޔާގެ އިތުރުން، މުހައްމަދު އާން ހުސެއިން އެވެ.
އޮލިމްޕިކްސް އަށް ދާނެ ދިވެހި ދެ ފެތުންތެރިން ކަނޑައަޅަން އަމަލުކުރަން ޖެހޭ ގޮތަކީ، ފެތުމުގެ ބައިނަލްއަގުވާމީ ޖަމިއްޔާ، ވޯލްޑް އެކުއަޓިކްސް އިން ކަނޑައަޅާފައިވާ އުސޫލުތަކަށް ބަލައިގެންނެވެ. އެއީ، ފެތުމުގެ ވަކި މުބާރާތްތަކެއްގައި ވާދަކުރި ދިވެހި ފެތުންތެރިންގެ ތެރެއިން އެންމެ މަތިން ވޯލްޑް އެކުއަޓިކްސް ސްވިމިން ޕޮއިންޓް ލިބޭ އެތުލީޓުންނަށް ފުރުސަތު ލިބޭ ގޮތަށެވެ.
