އެމްއެމްއޭގެ ގަވަރުނަރު އަލީ ހާޝީމް ވަކިކުރަން ރައީސަށް ލަފާ ދޭން ރައްޔިތުންގެ މަޖިލީހުން ހިންގާ މައްސަލައިގައި ޖަވާބުދާރީވާން، އާލާސްކަންފުޅާ އުޅުއްވާތީ މިއަދު ވެސް އޭނާ ހާޒިރުވެވަޑައިގެންފައި ނުވާތީ މާދަމާ އޮންނަ ބައްދަލުވުމުގައި ލިޔުމުން އޭނާ ފޮނުވާފައިވާ ޖަވާބަށް ބަލައި ވަކި ގޮތެއް އެ މައްސަލައިގައި ނިންމާނެ ކަމަށް މާލިއްޔަތު ކޮމިޓީގެ މުގައްރިރު ގާސިމް އިބްރާހިމް މިއަދު ވިދާޅުވެއްޖެ އެވެ.
ގަވަރުނަރުގެ ޒިންމާ އަދާނުކުރެވޭ ކަމަށް ބުނެ ހާޝިމް ވަކިކުރަން ލަފާ ދިނުމުގެ މައްސަލައިގައި ކޮމިޓީގައި މިއަދާއި އިއްޔެ ވެސް އޮތީ އޭނާއަށް ޖަވާބުދާރީވާން ފުރުސަތު ދިނުމެވެ. މިއީ މަޖިލީހުގެ ގަވާއިދުގެ ދަށުން އޭނާއަށް ދޭން ޖެހޭ ފުރުސަތެއް، އަދި ކޮންމެހެން ފުރިހަމަ ކުރަން ޖެހޭ އިޖުރާއަތެކެވެ.
"މިއަދު ވެސް އޮތީ ގަވަރުނަރުގެ މައްސަލަ ރައީސުލްޖުމްހޫރިއްޔާއަށް ދެންނެވުމަށް މަޖިލީހުގެ ފްލޯއަށް, ސެންޓްރަލް ބޭންކްގެ ގަވަރުނަރު ވަޒީފާއިން ވަކިކުރުމާ ގުޅޭގޮތުން އިތުބާރު ނެތް ކަމުގެ ވޯޓާ މެދު ގޮތެއް ނިންމަން. މިއަދު މިއީ ދެވަނަ ދުވަސް ދަންނަވާ. މިއަދު ވެސް ވަޑައިނުގެންނެވުނު," ގާސިމް ވިދާޅުވި އެވެ.
މިއަދު ވެސް އާލާސްކަންފުޅާ އުޅުއްވާތީ ހާޒިރުވެވެން ނެތް ކަމަށް ޑެޕިއުޓީ ގަވަރުނަރު ސޮއިކުރައްވައި މާލިއްޔަތު ކޮމިޓީއަށް ފޮނުވި ސިޓީއެއް މެދުވެރިކޮށް ގަވަރުވަނަރު ވަނީ އަންގަވާފަ އެވެ.
"މާދަމާ ވެސް އަނެއްކާ އެ މައްސަލަ މިޖަހަނީ. އެންމެ ފަހު ދުވަސް ކަމަށް މި ބަލަނީ. މާދަމާ ގަވަރުނަރު ވަޑައިގަތަސް ނުގަތަސް އެމަނިކުފާނު ފޮނުވާފައިވާ ސިޓީއަށް ބަލައި ގޮތެއް ނިންމުމަށް ކޮމިޓީން ވަނީ ނިންމާފައި," މާމިގިލީ ދާއިރާގެ މެންބަރުކަން ވެސް ކުރައްވާ ގާސިމް ވިދާޅުވި އެވެ.
ކޮމިޓީއަށް ހާޒިރުވެވަޑައި ނުގެންނެވި ނަމަވެސް، ހާޝިމް ވަނީ އޭނާއަށް ޒިންމާ އަދާނުކުރެވޭނެ ކަމަށް މަޖިލީހުން ފާހަގަަކުރި ކަންކަމަށް ޖަބާވުދާރީވެ، މަޖިލީހަށް ލިޔުމުން ޖަވާބެއް ފޮނުއްވާފަ އެވެ.
ގަވަރުނަރުގެ ޒިންމާ އަދާނުކުރެވޭ ކަމަށް ބުނާ މައްސަލާގައި ކޮމިޓީއަށް ފޮނުއްވި ލިޔުމުގައި، މިކަމަށް އިންކާރުކުރައްވަމުން ހާޝިމް ވިދާޅުވީ، އިގުތިސޯދީ ކާރިސާއެއް އައުމުގެ ކުރިން އެ ފަދަ ހާލަތަކުން ގައުމު ސަލާމަތްކުރަން ބޭނުންވާ މައުލޫމާތާއި އިރުޝާދު ދީ، އަޅަން ޖެހޭ ފިޔަވަޅުތައް އެޅުމުގެ މުހިންމު ކަން އޭނާ އާއި އެމްއެމްއޭއިން ސަރުކާރާ ހިއްސާކޮށްފައިވާނެ ކަމަށެވެ.
މި މައުލޫމާތުތައް މާލިއްޔަތު ކޮމިޓީއާ ވެސް ހިއްސާކުރައްވާފައިވާނެ ކަން ފާހަގަކުރައްވަމުން، ހާޝިމް އިތުރަށް ވިދާޅުވީ މިއަދު ބޯމަތިވެފައިވާ އިގުތިސޯދީ މުސްތަގުބަލާ މެދު އޮތް ބިރުވެރިކަމުގެ އަސްލަކީ އެމްއެމްއޭ އާއި ބައިނަލްއަގުވާމީ މާލީ އިދާރާތަކުން އިރުޝާދާއި ލަފާ، ސަރުކާރުން އަޑުނޭހުން ކަމަށެވެ.
