ކުރީގެ ރައީސް އަބްދުﷲ ޔާމީނުގެ ވެރިކަމުގައި ހިންގި އެމްއެމްޕީއާރްސީގެ ބޮޑު ހިޔާނާތަކީ "ސިޔާސީ ވަރުގަދަ މަސައްކަތަކަށް ކުރި އިންވެސްޓްމެންޓް"އެއް ކަމަށާއި އެ މައްސަލައިގެ ދައުލަތުގެ ބޮޑުންގެ ތެރޭގައި ހިމެނޭ ގިނަ މީހުންގެ ބައިވެރިވުން އޮތް ކަމަށް އެމަނިކުފާނު ރޭ ވިދާޅުވެއްޖެ އެވެ.
ޕީޕީއެމް/ޕީއެންސީއާ ފެއަށް ޖެހި ޔާމީން އުފެއްދެވި ޕީޕަލްސް ނޭޝަނަލް ފްރޮންޓް (ޕީއެންއެފް)ގެ ފްރޮންޓް އޮފީސް ޖަލްސާގައި ޔާމީން ވަނީ މި ސަރުކާރުން އަލުން އެމްއެމްޕީއާރުސީގެ މައްސަލަ ބައްލަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެކަމުގައި ދެކެވަޑައިގަންނަވާ ގޮތް ހިއްސާކުރައްވާފަ އެވެ.
"އެމްއެމްޕީއާރުސީ ކަންތަކުގައި ދިލަ ނުޖެހޭ, ދައުލަތުގެ ބޮޑުންގެ ތެރޭގައި މަދު މީހަކު ނޫނިއްޔާ އެ ލިސްޓުން އުންޏެއް ނުވާނެ. އެނގޭތޯ. އެމްއެމްޕީއާރުސީގެ މައްސަލަ ހިނގީކީ އެއްގޮތަކަށް ވެސް މީހަކަށް ހެޔޮހިތުން ލާރި ދޭކަށެއް ނޫން. އެއީ ސިޔާސީ ވަރުގަދަ މަސައްކަތަކަށް ކުރި އިންވެސްޓްމެންޓެއް. އެހެންވީމައި އޭގައި ހުންނާނީ ރައްޔިތުންގެ މަޖިލިސް މެންބަރުން އޭގައި ގިނައިން ނަގާފައި ހުންނާނީ އެމްޑީޕީއާ ޕީޕީއެމްގެ. އެއީ އެކަން ހިނގާފައި އޮތް ގޮތް," ޔާމީން ދެކެވަޑައިގަންނަވާ ގޮތް ހާމަކުރެއްވި އެވެ.
އޭގެ ތެރޭގައި ދެން ހިމެނެނީ ދައުލަތުގެ ބޮޑު މުއައްސަސާތަކުގެ މީހުންނަށް ލިބުނު ފައިސާ ކަމަށާއި އެ މަންފާ ލިބުނު ފަރާތްތައް މިވަގުތު ވެސް ރައީސް އޮފީހުގެ އިސް މަގާމުތަކުގައި ތިއްބެވި ކަމަށް ޔާމީން ވިދާޅުވި އެވެ. އެމްއެމްޕީއާރުސީގެ ހިޔާނާތް ހިންގެވީ އޭރު އެމަނިކުފާނުގެ ޓޫރިޒަމް މިނިސްޓަރަކަށް އަދި ފަހުން ނައިބަކަށް ހުންނެވި އަދީބު ކަމަށް ރޭ ވެސް ޔާމީން ވިދާޅުވި އެވެ.
"އަދީބު މިކަން ކޮށްފައި ހުރީ ވަރަށް ރަނގަޅަށް. އެއީ އޭނާ ފައިސާ ދިން މީހަކަށް ފައިސާ ފޮނުވާއި އެވަރުން ނިންމައެއް ނުލާ. އޭނަ އެގްރީމެންޓެއް ނުކުރާނެ. ހަމަ ވަޓްސްއެޕް އެސްއެމްއެސްއަކުން ފޮނުވާލާނީ އޭ ބްރޯ މިވެނި ވަރަކަށް ފައިސާ ފޮނުވީމޭ ލިބުނުހޭ. މި ލިބުނު މީހާ އެބަ ބުނޭ އޭ ބްރޯ ތެންކިޔު އޭ, ތިވަރު ލިބިއްޖެޔޭ," އަމާޒުވި ސުވާލަކަށް ޖަވާބު ދެއްވަމުން ޔާމީން ވިދާޅުވި އެވެ.
އެކަމާ ގުޅޭ ހުރިހާ ކިތާބީ ހެއްކެއް އަދީބު އަތުގައި ހުންނާނެ ކަމަށާއި އަދީބުގެ އަތުގައި ހުރި ހުރިހާ މައުލޫމާތެއް ފުލުހުންގެ އަތުގައި ވެސް ހުރި ކަމަށް ޔާމީން ވިދާޅުވި އެވެ.
އެކަން ހިނގާފައިވާ ގޮތް އެންމެ ރަނގަޅަށް އެނގޭނީ ފުލުހުންނަށް ކަމަށާއި އޭގެ މައްސަލައަކީ ހުރިހާ މައުލޫމާތެއް ހުރެ ދައުލަތުގެ ސިއްރެއްގެ ގޮތުގައި އޮތް ލިސްޓެއް ގެންދިޔުން ކަމަށް ޔާމީން ވިދާޅުވި އެވެ. ކުރީގެ ރައީސް އިބްރާހިމް މުހައްމަދު ސޯލިހު އާއި ކުރީގެ ރައީސް ނަޝީދު އެ ލިސްޓު ގެންދެވި ކަމަށާއި އެ މައުލޫމާތު އެ ބޭފުޅުންގެ އަތުގައި ހުންނަވާނެ ކަމަށް ވެސް ޔާމީން ވިދާޅުވި އެވެ.
އެމްއެމްޕީއާރްސީގެ ބޮޑު ހިޔާނާތުން ގެއްލުނު ހުރިހާ ފައިސާއެއް ހޯދައި، އެ ވައްކަމުގައި ކޮންމެ މީހަކު ބައިވެރިވެފައި އޮތަސް އެމީހަކަށް އަދަބު ދެއްވާނެ ކަމަށް ރައީސް ޑރ. މުހައްމަދު މުއިއްޒު ވެސް ވަނީ މިފަހުން ފުރަތަމަ ފަހަރަށް ވިދާޅުވެފަ އެވެ. އެ ހިޔާނާތް ހިނގިއިރު އެމަނިކުފާނު ހުންނެވީ ޔާމީން ސަރުކާރުގެ ކެބިނެޓް މިނިސްޓަރަކަށެވެ.
އެމްއެމްޕީއާރްސީގެ މައްސަލައިގައި މިހާތަނަށް ކުށް ސާބިތުވީ ކުރީގެ ނައިބު ރައީސް އަހުމަދު އަދީބުގެ މައްޗަށެވެ. އެ މައްސަލައިގައި އަދީބު 20 އަހަރަށް ޖަލަށްލާން ކޯޓުން ހުކުމް ކުރި އެވެ. ނަމަވެސް އޭނާގެ އަދަބު ލުއިކޮށް ކުރީގެ ސަރުކާރުން ވަނީ އަދީބު މިނިވަންކޮށްފަ އެވެ.
އެމްއެމްޕީއާރްސީގެ މައްސަލައިގައި ޔާމީންގެ މައްޗަށް ދެ ފަހަރަކު ޖިނާއީ ހުކުމެއް އިއްވި އެވެ. އެއީ ފަސް އަހަރުގެ ހުކުމަކާއި 11 އަހަރުގެ ހުކުމެކެވެ. ނަމަވެސް އެ ދެ ހުކުމް ވެސް މަތީ ކޯޓުތަކުން ވަނީ ބާތިލުކޮށްފަ އެވެ.
އެމްއެމްޕީއާރުސީގެ ބޮޑު ހިޔާނާތް ހިންގީ ޔާމީންގެ ވެރިކަމުގައި، ރާއްޖޭގެ ރަށްތައް އެމްއެމްޕީއާރުސީން ނު އަގުގައި ވިއްކައި، އެއިން އިންވެސްޓަރުންގެ އަތުން ފައިސާ ނަގައިގެންނެވެ. އަދި ނުއަގުގައި ވިއްކިއިރު، ދައުލަތަށް ވަންނަންޖެހޭ ގިނަ ފައިސާ ވެސް ނުވައްދައި، އެ ޗެކްތައް އެހެން އެކައުންޓުތަކަށް ބަދަލުކޮށް ގިނަ ފައިސާތަކެއް ނެގި އެވެ.
އެމްއެމްޕީއާރުސީގެ ހިޔާނާތުގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)ން ތަހުގީގުކޮށް 2019 ގައި ނެރުނު ރިޕޯޓުގައި ބުނެފައިވާ ގޮތުގައި އެމްއެމްޕީއާރުސީގެ ހިޔާނާތް 1.4 ބިލިއަން ރުފިޔާ އަށް އަރަ އެވެ. އެމްއެމްޕީއާރުސީން ދޫކުރި 57 ތަންތަން (ރަށްތަކާއި ފަޅުތަކަށް) ދައުލަތަށް ލިބެންޖެހޭ 77.4 މިލިއަން ޑޮލަރުގެ ތެރެއިން ލިބިފައި ވަނީ 12 މިލިއަން ޑޮލަރު ކަމަށް އޭސީސީން ބުނެފައިވެ އެވެ.
ނިމިގެން ދިޔަ އެމްޑީޕީގެ ވެރިކަމުގައި އެމްއެމްޕީއާރުސީން ގެއްލުނު ފައިސާ ހޯދަން އެސެޓް ރިކަވަރީ ކޮމިޝަނެއް ހަދައިގެން މަސައްކަތް ފެށި އެވެ. އެމްއެމްޕީއާރުސީ މެދުވެރިކޮށް ނުއަގުގައި ވިއްކި ރަށްތައް ހަމައަގުގައި ހިސާބުކުރުމުން 220 މިލިއަން ޑޮލަރު ދައުލަތަށް ލިބެން ޖެހޭ ކަމަށް، އެސެޓް ރިކަވަރީ ކޮމިޝަންގެ ރައީސަކަށް ހުންނެވި އަހްމަދު އައްސަދު ވިދާޅުވެފައިވެ އެވެ.
