އާއިލީ މައްސަލައެއްގައި ހިނގި އަރައިރުމެއްގެ ތެރެއިން މާލޭ ގަލޮޅު އަވަށުގައި ހުންނަ ގެއަކުން މީހުންނަށް ވަދެނިކުމެ ނުވެވޭ ގޮތަށް ފާރެއް ރޭނި މައްސަލަ ބަލަމުންދާ ކަމަށް މާލެ ސިޓީ ކައުންސިލުން ބުނެފި އެވެ.
މި މައްސަލަ ފެންމަތިވުމުން އިތުރު މައުލޫމާތު ހޯދުމަށް ފުލުހުންނަށް ގުޅުމުން އެ ހިދުމަތުގެ އޮފިޝަލަކު ވިދާޅުވީ، އެ މައްސަލަ ފުލުހުންނަށްވެސް ރިޕޯޓުކޮށްފައވާ ކަމަށެވެ. ނަމަވެސް ގޯތިގެދޮރުގެ މައްސަލައެއް ކަމުން އެ މައްސަލަ ބަލާނީ ސިޓީ ކައުންސިލުން ކަމަށްވެސް އޭނާ ވިދާޅުވި އެވެ.
އިތުރު ތަފުސީލު ހޯދުމަށް "އަދަދު" އިން ސުވާލުކުރުމުން މީޑިއާ އޮފިޝަލް އާމިނަތު ޝަތުފާ ވިދާޅުވީ ސިޓީ ކައުންސިލުން އެފަދަ މައްސަލައެއް ބަލަމުންދާ ކަމަށެވެ. ނަމަވެސް ހިނގަމުންދާ މައްސަލައެއް ކަމުން ތަފުސީލު ދެވެން ނެތް ކަމަށްވެސް އޭނާ ވިދާޅުވި އެވެ.
އަދި، މި މައްސަލާގައި ކޯޓާ ހަމައަށް ދާން ޖެހިދާނެތީ އެންމެ ރަނގަޅު ގޮތަކީ ތަފުސީލުތައް މިވަގުތަށް ހާމަނުކުރުން ކަންވެސް އޭނާ ފާހަގަކުރި އެވެ.
މައުލޫމާތު ލިބިފައިވާ ގޮތުގައި ޖެހިގެން އުޅެނީ ބަންޑާރަ ގޯއްޗެއް ބެހުމަށްފަހު ލިބުނު ބިމުގެ މައްސަލައެކެވެ. ނަމަވެސް މިކަމާ ގުޅޭ އިތުރު ތަފުސީލު ހޯދުމަށް އެ އާއިލާއަށް ގުޅަން ކުރި މަސައްކަތް ކާމިޔާބުވެފައެއް ނުވެ އެވެ.
