މޯލްޑިވްސް ފަންޑު މެނޭޖުމެންޓު ކޯޕަރޭޝަންގެ ބޯޑުން, ރައީސް އޮފީހުގެ މިނިސްޓަރު އާދަމް ރަމީޒުގެ ކޮއްކޮ ވަކިކޮށްފި އެވެ.
އާމިނަތު ޝީޒާ އަހުމަދު އެމްއެފްއެމްސީގެ ބޯޑަށް އައްޔަން ކުރީ މި އަހަރުގެ ޖެނުއަރީ މަހު އެވެ.
މި ހަފުތާތެރޭގައި އޭނާ މަގާމުން ވަކިކޮށްފައިވާކަން، ސަރުކާރުގެ ވިޔަފާރި ކުންފުނިތަކަށް ޑިރެކްޓަރުން އައްޔަން ކުރުމާއި ވަކިކުރުން އަދި ކުންފުނިތައް ބަލަހައްޓުމުގެ ޒިންމާ އޮންނަ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ގެ އޮފިޝަލަކު ކަށަވަރުކޮށް ދެއްވި އެވެ.
ރައީސް އޮފީހުން އަންގައިގެން ޝީޒާ ވަކިކުރިއިރު، ރައީސް މުއިއްޒުގެ "ކަނާތުގެ ގޮތުގައި" ކުރިން ހުންނެވި ރަމީޒު ވަޒީފާއިން ސަސްޕެންޑުކޮށްފައި ހުންނަތާ ދެ ހަފުތާ އަށް ވުރެ ގިނަ ދުވަސްވެއްޖެ އެވެ.
ރަމީޒު ސަސްޕެންޑުކުރީ، އޭނާގެ ކުރީގެ އަނބިކަނބަލުން އަދި އެންވަޔަރަމެންޓު މިނިސްޓްރީގެ ކުރީގެ ސްޓޭޓު މިނިސްޓަރު ޝަމްނާޒު ސަލީމް ޖޫން 23 ގައި ހައްޔަރުކުރި ހަބަރު ނޫސްތަކުގައި ޖެހި ފަހުންނެވެ.
އޭގެ މާކުރިން ވެސް ރައީސް މުއިއްޒު އާއި ރަމީޒުގެ ގުޅުން ގޯސްވެ، ރަމީޒު ހުރީ "ދުރުކޮށްފަ" އެވެ.
ރަމީޒުއާ ގުޅުން އޮންނަ މީހުން ދުރުކުރަނީ
ރައީސް މުއިއްޒު އާއި ރަމީޒުގެ ގުޅުން ކެނޑި، ރަމީޒު އެކަހެރިކޮށްފައި ހުންނަ ވާހަކަތައް ފެތުރެން ފެށި ހިސާބުން ރަމީޒުއާ ގުޅުން ހުރި ބައެއް މީހުން ވަޒީފާތަކުން ބަދަލުކޮށްފައިވެ އެވެ. އޭގެ ތެރޭގައި ފުލުހުންގެ އިންޓެލްގައި މަސައްކަތް ކުރަމުން ދިޔަ ދެ މީހަކު ހިމެނޭ ކަމަށް އަދަދު ނޫހަށް، މައުލޫމާތު ދެއްވި ސަރުކާރުގެ އޮފިޝަލަކު ވިދާޅުވި އެވެ.
ރައީސްގެ އާއިލާ ބޭފުޅުންނާއި ރަމީޒު ބާރުގައި ވަޒީފާ ދީފައިވާ ގިނަ ބަޔަކު މި ސަރުކާރުގެ އެކި ފަންތިތަކުގައި އެބަ ތިއްބެވި އެވެ. އެމީހުން މަގާމުތަކުން ދުރުކުރާނެ ކަމަށް ބެލެވޭ ކަމަށް އަދަދު ނޫހާ ވާހަކަ ދެއްކެވި އޮފިޝަލް ވިދާޅުވި އެވެ.
