މާލޭގެ ރަސްމީ ފާލަން، އިއްޒުއްދީން ފާލަން ތަރައްގީކުރުމުގެ މަސައްކަތް ހުއްޓިފައިވާތާ ގިނަ ދުވަސްތަކެއް ވެއްޖެ އެވެ.
މާލޭގެ އެންމެ މުހިއްމު، އަދި ޓޫރިސްޓުން އަރައި ފައިބާ ސަރަހައްދުގައި ހުރި އިއްޒުއްދީން ފާލަމުގެ ޑިޒައިނަށް ބޮޑު ބަދަލެއް ގެނައުމަށް ކުރިން ހުރި ފާލަން ރޫޅާލައި އަލުން ތަރައްގީކުރުމުގެ މަސައްކަތް ފެށީ މި އަހަރުގެ މެއި މަހު ކުރީކޮޅު އެވެ.
އެ މަސައްކަތް 11.7 މިލިއަން ރުފިޔާ އަށް ހަވާލުކޮށްފައި ވަނީ، ކުރިން ހުރި ފާލަން ވެސް ހެދި އެމްޓީސީސީއާ އެވެ.
ސަރުކާރުގެ މެޖޯރިޓީ ހިއްސާ އޮންނަ އެމްޓީސީސީގެ ސީނިއާ އޮފިޝަލަކު "އަދަދު" ނޫހަށް ވިދާޅުވީ ފާލަމުގެ މަސައްކަތް ނުހުއްޓޭ ކަމަށާއި މަސައްކަތް ކުރިއަށް ދަނީ "ތަންކޮޅެއް ލަސް ދުވެލީގައި" ކަމަށެވެ.
ފާލަމުގެ މަތީ އޮނިގަނޑު ރޫޅާލައި ނަގާފައިވާ މިހާރު އެތައް ދުވަހެއް ވެއްޖެ އެވެ. އެ ސަރަހައްދަށް އަދަދުގެ ނޫސްވެރިން މިއަދު ހެނދުނު ގޮސް ބެލިއިރު، މަސައްކަތް ކުރާ އެއްވެސް މީހަކު ނެތެވެ. އަދި މަސައްކަތް ކުރިއަށް ގެންދާކަން ވެސް ފާހަގައެއް ނުކުރެވެ އެވެ.
ބައްތެއްޔެއްގެ ޑިޒައިނަށް ކުރިން ފަރުމާކުރި އިއްޒުއްދީން ފާލަން ހުޅުވީ މީގެ އެންމެ ނުވަ އަހަރު ކުރިން ޖުލައި، 2015، ގަ އެވެ. ނަމަވެސް ފާލަމުގައި ދަބަރު ޖެހުމާއި ބައްތެލީގެ ރިޔާ ގޮތަށް ސިފަވާ ގޮތަށް ހުރި ސަތަރިގަނޑު ހަލާކުވެގެން ދެ ފަހަރަކު މަރާމާތު ކުރަންޖެހުނެވެ. އެއީ ޗައިނާ ސަރުކާރުގެ އެހީގައި ސިފައިން އެޅި ފާލަމެކެވެ.
ރައީސުލްޖުމްހޫރިއްޔާ އަދި ރާއްޖެއަށް ވަޑައިގަންނަވާ އިއްޒަތްތެރިން ބޭނުން ކުރުމަށް ރަސްމީ ފާލަމެއް ބޭނުން ކުރަން ފެށީ 1953 ވަނަ އަހަރެވެ. ކުރިން އެ ފާލަމަށް ކިޔައި އުޅުނީ އެއް ނަންބަރު ޖެޓީ އެވެ. ނަމަވެސް ރާއްޖޭގެ މިނިވަންކަމަށް 50 އަހަރު ފުރުމާ ދިމާކޮށް އަލުން ހަދައި ހުޅުވީ އިއްޒުއްދީން ފާލަމުގެ ނަމުގަ އެވެ.
