އިދިކޮޅު އެމްޑީޕީއިން ބުރާސްފަތި ދުވަހުގެ ރޭ ބޭއްވި ޖަގަހަ ޖަލްސާއެއް ފެށުމުގެ ގޮތުން ގުރުއާން ކިޔެވި ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ މުވައްޒަފަކު އެ ކުންފުނިން ވަކިކޮށްފި އެވެ.
އެ މުވައްޒަފަކީ އެޗްޑީސީގެ އޮޕަރޭޝަންސް އޮފިސަރު އަހުމަދު ޝާއިން އެވެ. އެ ކުންފުނިން އޭނާއަށް ފޮނުވި ޗިޓުގައި ބުނެފައިވަނީ ވަޒީފާއިން ވަކިކުރީ ތިން ދުވަހަކު ވަޒީފާއަށް ނުނިކުތުމާ ގުޅިގެން ކަމަށެވެ. ޗިޓު ފޮނުވާފައިވަނީ މިއަދު އެވެ.
ނަމަވެސް, އެމްޑީޕީން ބުނަނީ އޭނާ ވަކިކުރީ ޕޯޑިއަމުގައި ގުރުއާން ކިޔެވުމުން ކަމަށެވެ.
މިކަމާ ގުޅިގެން "އަދަދު" އާ ވާހަކަ ދައްކަވަމުން އެމްޑީޕީގެ ޗެއާޕާސަން ނައިބު އިދާރީ އިބްރާހިމް ވަހީދު ވިދާޅުވީ، ޝާއިން އެ ރޭގެ ޖަލްސާގައި ގުރުއާން ކިޔެވީ ޖަލްސާގައި ކިޔަވަން ހަމަޖެއްސި މީހާ ލަސްވުމުން އެ ތަނުގައި ހުރި މީހުންގެ ތެރެއިން އޭނާ ރީތިކޮށް ގުރުއާން ކިޔަވާ ވާހަކަ ފާހަގަކުރުމުން ކަމަށެވެ.
"އެމްޑީޕީގެ ޕޯޑިއަމުގައި ގުރުއާން ކިޔަވައިގެން ވަޒީފާއިން ވަކިކުރުމަކީ ދެވޭ ވަރަށް ބޮޑު އަނިޔާއެއް،" އޭނާ ވިދާޅުވި އެވެ.
އަދި، މިއީ އެމްޑީޕީގެ ޕޯޑިއަމެއްގައި ޝާއިން ގުރުއާން ކިޔެވި ފުރަތަމަ ފަހަރުކަން ވެސް އޭނާ ފާހަގަކުރެއްވި އެވެ.
އެޗްޑީސީގެ ސިޓީގައި ބުނެފައިވަނީ އެ ކުންފުނީގެ ޑިސިޕްލިނަރީ އުސޫލުގެ ތެރޭގައި އެއްޗެސް މުވައްޒަފަކު ސަބަބެއް ނެތި އަހަރެއްގެ ތެރޭގައި ތިން ދުވަހު މަސައްކަތަށް ނުނިކުމެއްޖެނަމަ ވަޒީފާއިން ވަކިކުރުމުގެ އިހުތިޔާރު ކުންފުންޏަށް ލިބިފައިވާ ކަމަށެވެ.
އެ ކުންފުނިން ބުނެފައިވާ ގޮތުގައި ޝާޖިންގެ އަހަރީ ޗުއްޓީއަށްފަހު އޮފީހަށް ނުކުމެފައި ނުވަނީ މި މަހުގެ 2 އަދި 3 ގައި ކަމަށާއި އޭގެ އިތުރުން މިއަދުވެސް ސައިން އިން ކުރުމަށްފަހު އޮފީހަށް ނުނިކުންނަ ކަމަށެވެ. ނަމަވެސް އެ ކުންފުނިން މިހާތަނަށް މިކަމާ ގުޅިގެން ރަސްމީ ބަހެއް ބުނެފައެއް ނުވެ އެވެ.
އެކަމާ ގުޅިގެން އެޗްޑީސީގެ މީޑިއާގެ ބަހެއް ހޯދުމަށް ކުރި މަސައްކަތް ކާމިޔާބު ނުވި ނަމަވެސް އެ ކުންފުނީގެ އޮފިޝަލަކު ވިދާޅުވި ގޮތުގައި އޭނާ ވަކިކުރީ ގުރުއާން ކިޔަވައިގެން ނޫން ކަމަށާއި އޭނާ ވަކިކުރީ ހާޒިރީ މައްސަލަތަކުގެ ސަބަބުން ކަމަށެވެ. އަދި, އޭނާއަކީ އެ ކުންފުނީގެެ ދާއިމީ މުވައްޒަފެއް ނޫން ކަމަށް ވެސް އޮފިޝަލު ވިދާޅުވި އެވެ.
