އެމްޑީޕީގެ ދާއިރާތަކުންނާއި ރަށްރަށުން ހުސްވެފައިވާ ނައިބު ރައީސްގެ މަގާމަށް ކުރިމަތިލުމުގެ ފުރުސަތު މިއަދު ހުޅުވާލައިފި އެވެ.
އެމްޑީޕީން މިއަދު ކުރި އިއުލާނުގައި ބުނެފައި ވަނީ އެ މަގާމަށް ކުރިމަތި ލެވޭނީ މިމަހުގެ އެއްވަނަ ދުވަހުގެ ކުރިން އެމްޑީޕީގެ މެންބަރެއްގެ ގޮތުގައި އިލެކްޝަންސްގެ ދަފުތަރުގައި ޖެހިފައިވާ މީހުންނަށް ކަމަށެވެ.
އަދި މަގާމަށް ކުރިމަތިލާ މީހުންނަކީ ފާއިތުވި ފަސް އަހަރު ތެރޭގައި އެމްޑީޕީގެ އަސާސީ ގަވާއިދާ ހިލާފުވެފައި ނުވާ މީހަކަށް ވާންޖެހޭ ކަމަށް ވެސް އިއުލާނުގައި ބުނެފައިވެ އެވެ.
ބައި އިލެކްޝަނުގައި ވާދަކުރަން ނަން ހުށަހެޅޭނެ އެންމެ ފަހު ސުންގަޑިއަކީ މިއަންނަ ހޮނިހިރު ދުވަހުގެ މެންދުރު 2:00 އެވެ.
އަންނަ އޯގަސްޓު 2، ގައި ބާއްވަން ހަމަޖެހިފައިވާ އިންތިހާބުގެ ވޯޓުލުން 103 ރަށަކާއި 13 ދާއިރާއެއްގައި ކުރިއަށް ދާނެ އެވެ. އެދުވަހު އެމްޑީޕީ ގައުމީ މަޖިލީހުގެ ހުސްވެފައިވާ މަގާމުތަކަށް މީހުން އިންތިހާބު ކުރަން ބާއްވާ ބައި އިލެކްޝަންގެ ވޯޓުލުން ވެސް އޮންނާނެ އެވެ.
